ਏਅਰ ਕੈਨੇਡਾ ਦੇ ਹਾਦਸੇ 'ਚ ਮਾਰੇ ਗਏ ਪਾਇਲਟਾਂ ਦੀ ਹੋਈ ਪਛਾਣ

ਏਅਰ ਕੈਨੇਡਾ ਦੇ ਜਹਾਜ਼ ਦੀ ਨਿਊਯਾਰਕ ਦੇ ਏਅਰਪੋਰਟ 'ਤੇ ਇੱਕ ਫਾਇਰ ਟਰੱਕ ਨਾਲ ਹੋਈ ਟੱਕਰ ਵਿਚ ਮਾਰੇ ਗਏ ਦੋਵੇਂ ਪਾਇਲਟਸ ਦੀ ਪਛਾਣ ਕਰ ਲਈ ਗਈ ਹੈ। ਇਨ੍ਹਾਂ ਵਿਚੋਂ ਇੱਕ ਪਾਇਲਟ ਐਂਟੋਇਨ ਫੋਰੈਸਟ ਦਾ ਸਬੰਧ ਕਿਊਬੈਕ ਨਾਲ ਸੀ ਅਤੇ ਸਹਿ-ਪਾਇਲਟ ਮੈਕੇਂਜੀ ਗੁੰਥਰ ਟੋਰੌਂਟੋ ਦੇ ਸੇਨੇਕਾ ਪੌਲੀਟੈਕਨਿਕ ਦੇ 2023 ਬੈਚ ਦਾ ਸਾਬਕਾ ਸਟੂਡੈਂਟ ਸੀ। ਉਸ ਨੇ ਹਾਲ ਹੀ ਵਿਚ ਜੈਜ਼ ਐਵੀਏਸ਼ਨ ਰਾਹੀਂ ਆਪਣਾ ਪੇਸ਼ੇਵਰ ਕਰੀਅਰ ਸ਼ੁਰੂ ਕੀਤਾ ਸੀ।

ਅਮਰੀਕੀ ਹਵਾਬਾਜ਼ੀ ਮਾਹਰ ਇਸ ਗੱਲ ਦੀ ਜਾਂਚ ਕਰ ਰਹੇ ਹਨ ਕਿ ਰਨਵੇਅ 'ਤੇ ਜਹਾਜ਼ ਅਤੇ ਫਾਇਰ ਟਰੱਕ ਵਿਚਕਾਰ ਤਾਲਮੇਲ ਦੀ ਕਮੀ ਕਿਵੇਂ ਹੋਈ। ਇਸ ਹਾਦਸੇ ਵਿਚ 40 ਤੋਂ ਵੱਧ ਲੋਕ ਜ਼ਖਮੀ ਹੋਏ ਸਨ ਜਿਨ੍ਹਾਂ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ ਸੀ। ਫਾਇਰ ਟਰੱਕ ਦੇ ਦੋ ਸਵਾਰਾਂ ਨੂੰ ਵੀ ਹਸਪਤਾਲ ਲਿਜਾਇਆ ਗਿਆ, ਜਿਨ੍ਹਾਂ ਨੂੰ ਛੁੱਟੀ ਮਿਲਣ ਦੀ ਉਮੀਦ ਹੈ।

ਗੌਰਤਲਬ ਹੈ ਕਿ ਏਅਰ ਕੈਨੇਡਾ ਐਕਸਪ੍ਰੈਸ ਦੀ ਫਲਾਈਟ ਮਾਂਟਰੀਅਲ ਤੋਂ ਨਿਊਯਾਰਕ ਸਿਟੀ ਦੇ ਲਾਗਾਰਡੀਆ ਏਅਰ ਪੋਰਟ 'ਤੇ ਐਤਵਾਰ ਰਾਤ ਕਰੀਬ 11.30 ਵਜੇ ਪਹੁੰਚੀ ਸੀ, ਹਾਦਸੇ ਸਮੇਂ ਇਸ ਵਿਚ 72 ਯਾਤਰੀ ਅਤੇ ਚਾਰ ਕਰੂ ਮੈਂਬਰ ਸਵਾਰ ਸਨ। ਇਹ ਫਲਾਈਟ ਜੈਜ਼ ਐਵੀਏਸ਼ਨ ਵਲੋਂ ਓਪਰੇਟ ਕੀਤੀ ਜਾ ਰਹੀ ਸੀ।