ਵੈਨਕੂਵਰ ਦੇ ਦੋ ਨੌਜਵਾਨਾਂ ਨੂੰ ਡਰੱਗਜ਼ ਦੀ ਤਸਕਰੀ ਕਰਨ ਦੇ ਦੋਸ਼ਾਂ ਤਹਿਤ ਕੀਤਾ ਗਿਆ ਚਾਰਜ

ਬੀ. ਸੀ. ਦੀ ਕੰਬਾਇਡ ਫੋਰਸਿਸ ਸਪੈਸ਼ਲ ਇਨਫੋਰਸਮੈਂਟ ਯੂਨਿਟ ਨੇ ਵੈਨਕੂਵਰ ਦੇ ਦੋ ਨੌਜਵਾਨਾਂ 31 ਸਾਲਾ ਅਸ਼ਨਿਲ ਬੌਬੀ ਸਿੰਘ ਅਤੇ ਲੈਨੀ ਮੌਰੀਸੀਓ ਉਮਾਨਜ਼ੋਰ ਖਿਲਾਫ਼ ਫੈਂਟਾਨਿਲ ਅਤੇ ਕੋਕੀਨ ਸਮੇਤ ਹੋਰ ਡਰੱਗਜ਼ ਦੀ ਤਸਕਰੀ ਦੇ ਦੋਸ਼ਾਂ ਤਹਿਤ ਚਾਰਜ ਲਗਾਏ ਹਨ। ਇਹ ਦੋਸ਼ ਫਰਵਰੀ 2024 ਵਿਚ ਸ਼ੁਰੂ ਹੋਈ ਜਾਂਚ ਨਾਲ ਸਬੰਧਤ ਹਨ।

ਸੀ.ਐਫ.ਐਸ.ਈ.ਯੂ.-ਬੀ.ਸੀ. ਦੀ ਐਂਟੀ-ਟ੍ਰੈਫਿਕਿੰਗ ਟਾਸਕ ਫੋਰਸ ਨੇ ਖੁਫੀਆ ਜਾਣਕਾਰੀ ਦੇ ਆਧਾਰ 'ਤੇ ਇਹ ਜਾਂਚ ਸ਼ੁਰੂ ਕੀਤੀ ਸੀ, ਜਿਸ ਤੋਂ ਪਤਾ ਲੱਗਾ ਸੀ ਕਿ ਇੱਕ ਸ਼ੱਕੀ ਸੰਗਠਿਤ ਨੈੱਟਵਰਕ ਰਾਹੀਂ ਫੈਂਟਾਨਿਲ ਅਤੇ ਹੋਰ ਪਾਬੰਦੀਸ਼ੁਦਾ ਡਰੱਗ ਦੀ ਵੱਡੀ ਮਾਤਰਾ ਵਿਚ region ਤਸਕਰੀ ਕਰ ਰਿਹਾ ਹੈ, ਜਾਂਚ ਨੂੰ ਅੱਗੇ ਵਧਾਉਂਦੇ ਹੋਏ ਬੌਬੀ ਸਿੰਘ ਅਤੇ ਉਮਾਨਜ਼ੋਰ ਦੋਵੇਂ ਹਿਰਾਸਤ ਵਿਚ ਲਏ ਗਏ ਅਤੇ ਉਨ੍ਹਾਂ ਪਾਸੋਂ 3 ਕਿਲੋਗ੍ਰਾਮ ਤੋਂ ਵੱਧ ਫੈਂਟਾਨਿਲ ਮਿਲਿਆ, ਜਿਸ ਤੋਂ ਇਲਾਵਾ ਥੋੜ੍ਹੀ-ਥੋੜ੍ਹੀ ਮਾਤਰਾ ਵਿਚ ਮੈਥਾਮਫੇਟਾਮਾਈਨ ਅਤੇ ਕੋਕੀਨ ਵੀ ਸ਼ਾਮਲ ਸਨ।

ਕਾਰਪੋਰੇਲ ਸਰਬਜੀਤ ਕੌਰ ਸੰਘਾ ਨੇ ਦੱਸਿਆ ਕਿ ਦੋਸ਼ਾਂ ਦੀ ਮਨਜ਼ੂਰੀ ਮਿਲਣ ਮਗਰੋਂ ਬੌਬੀ ਸਿੰਘ ਨੂੰ 9 ਅਕਤੂਬਰ 2025 ਨੂੰ ਰਿਚਮੰਡ ਤੋਂ ਗ੍ਰਿਫਤਾਰ ਕੀਤਾ ਗਿਆ ਅਤੇ ਉਮਾਨਜ਼ੋਰਨੇ 15 ਅਕਤੂਬਰ ਨੂੰ ਆਤਮ-ਸਮਰਪਣ ਕੀਤਾ। ਬੌਬੀ ਸਿੰਘ ਨੂੰ ਸ਼ਰਤਾਂ ਨਾਲ ਰਿਹਾਅ ਕੀਤਾ ਜਾ ਚੁੱਕਾ ਹੈ, ਜਦੋਂ ਕਿ ਦੂਜੇ ਮੁਲਜ਼ਮ ਨੂੰ ਉਸ ਦੀ ਅਗਲੀ ਅਦਾਲਤੀ ਪੇਸ਼ੀ ਤੱਕ ਰਿਹਾਅ ਕੀਤਾ ਗਿਆ ਹੈ।