ਕੈਨੇਡਾ 'ਤੇ ਟਰੰਪ ਵਲੋਂ ਲਗਾਏ ਟੈਰਿਫ ਖਿਲਾਫ ਅਮਰੀਕੀ ਸਦਨ ਵਿੱਚ ਮਤਾ ਪਾਸ

ਕੈਨੇਡਾ ਅਤੇ ਅਮਰੀਕਾ ਵਿਚਕਾਰ ਵਪਾਰ ਵਿਵਾਦ ਵਿਚਾਲੇ ਯੂ.ਐਸ.ਹਾਊਸ ਔਫ ਰੀਪਰਸੈਂਟੇਟਿਵਸ ਨੇ ਬੁੱਧਵਾਰ ਨੂੰ ਰਾਸ਼ਟਰਪਤੀ ਡੌਨਲਡ ਟਰੰਪ ਵਲੋਂ ਔਟਵਾ'ਤੇ ਲਗਾਏ ਗਏ ਟੈਰਿਫ ਨੂੰ ਰੱਦ ਕਰਨ ਲਈ ਇੱਕ ਇਤਿਹਾਸਕ ਵੋਟਿੰਗ ਕੀਤੀ। ਇਸ ਮਤੇ ਦੇ ਪੱਖ ਵਿਚ 219 ਅਤੇ ਵਿਰੋਧ ਵਿਚ 211 ਵੋਟਾਂ ਪਈਆਂ। ਖਾਸ ਗੱਲ ਇਹ ਰਹੀ ਕਿ 6 ਰਿਪਬਲਿਕਨ ਨੇ ਪਾਰਟੀ ਲਾਈਨ ਤੋਂ ਬਾਹਰ ਜਾ ਕੇ ਡੈਮੋਕ੍ਰੇਟ ਦਾ ਸਾਥ ਦਿੱਤਾ,ਜੋ ਕਿ ਵ੍ਹਾਈਟ ਹਾਊਸ ਦੀ ਵਪਾਰਕ ਨੀਤੀ ਲਈ ਇੱਕ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ।

ਰਿਪਬਲਿਕਨ ਪਾਰਟੀ ਦੇ ਇਹ ਮੈਂਬਰਸ ਨੇਬਰਾਸਕਾ, ਪੈਨਸਿਲਵੇਨੀਆ, ਕੋਲੋਰਾਡੋ, ਕੈਲੀਫੋਰਨੀਆ, ਕੈਂਟਕੀ ਅਤੇ ਵਾਸ਼ਿੰਗਟਨ ਨਾਲ ਸਬੰਧਤ ਹਨ। ਟਰੰਪ ਨੇ ਬਗਾਵਤ ਕਰਨ ਵਾਲੇ ਮੈਂਬਰਾਂ ਨੂੰ ਚੋਣਾਂ ਵਿਚ ਨਤੀਜੇ ਭੁਗਤਣ ਦੀ ਧਮਕੀ ਦਿੱਤੀ ਹੈ। ਡੈਮੋਕ੍ਰੇਟ ਮੈਂਬਰ ਗ੍ਰੈਗਰੀ ਮੀਕਸ ਜਿਹਨਾਂ ਨੇ ਇਹ ਬਿੱਲ ਪੇਸ਼ ਕੀਤਾ, ਉਨ੍ਹਾਂ ਕਿਹਾ ਕਿ ਇਹ ਟੈਰਿਫ ਇੱਕ ਬਨਾਵਟੀ ਐਮਰਜੈਂਸੀ 'ਤੇ ਅਧਾਰਤ ਹਨ ਅਤੇ ਇਸ ਨਾਲ ਅਮਰੀਕੀ ਪਰਿਵਾਰਾਂ 'ਤੇ ਮਹਿੰਗਾਈ ਦਾ ਬੋਝ ਪੈ ਰਿਹਾ ਹੈ, ਉਹਨਾਂ ਸਾਫ ਕੀਤਾ ਕਿ ਕੈਨੇਡਾ ਕੋਈ ਖ਼ਤਰਾ ਨਹੀਂ ਹੈ ਬਲਕਿ ਸਾਡਾ ਦੋਸਤ ਅਤੇ ਸਾਡਾ ਸਹਿਯੋਗੀ ਹੈ। ​ਇਹ ਮਤਾ ਹੁਣ ਅਮਰੀਕੀ ਸੈਨੇਟ ਕੋਲ ਜਾਵੇਗਾ।

ਹਾਲਾਂਕਿ, ਟਰੰਪ ਕੋਲ ਇਸ ਨੂੰ ਰੱਦ ਕਰਨ ਦੀ ਪਾਵਰ ਹੈ। ਗੌਰਤਲਬ ਹੈ ਕਿ ਟਰੰਪ ਵਲੋਂ ਰਾਸ਼ਟਰੀ ਐਮਰਜੈਂਸੀ ਦੇ ਨਾਂ 'ਤੇ ਥੋਪੇ ਗਏ ਸਾਰੇ ਟੈਰਿਫਸ ਦਾ ਮਾਮਲਾ ਸੁਪੀਰਮ ਕੋਰਟ ਵਿਚ ਵੀ ਹੈ, ਜਿਸ 'ਤੇ ਫੈਸਲਾ 20 ਫਰਵਰੀ ਤੱਕ ਆ ਸਕਦਾ ਹੈ। ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਇਸ 'ਤੇ ਸਭ ਤੋਂ ਪਹਿਲਾਂ ਪ੍ਰਤੀਕਿਰਿਆ ਦਿੱਤੀ ਅਤੇ ਕਿਹਾ ਕਿ ਇਹ ਸਵਾਗਤਯੋਗ ਕਦਮ ਹੈ, ਸਾਨੂੰ ਮਿਲ ਕੇ ਕੰਮ ਕਰਨਾ ਚਾਹੀਦਾ ਹੈ।