13.04C Vancouver 13.04C VancouverFeb 25, 2026 3:39 PM - Connect Newsroom - Ramandeep Kaur
ਕੈਨੇਡਾ ਨੂੰ ਅਮਰੀਕੀ ਟੈਰਿਫਸ ਤੋਂ ਰਾਹਤ ਮਿਲਣ ਦੀ ਸੰਭਾਵਨਾ ਨਹੀਂ ਹੈ, ਰਾਸ਼ਟਰਪਤੀ ਡੋਨਲਡ ਟਰੰਪ ਦੇ ਮੁੱਖ ਵਪਾਰ ਪ੍ਰਤੀਨਿਧੀ ਨੇ ਸਪੱਸ਼ਟ ਸੰਦੇਸ਼ ਦਿੱਤਾ ਹੈ ਕਿ ਕੈਨੇਡਾ ਨਾਲ ਹੋਣ ਵਾਲੇ ਕਿਸੇ ਵੀ ਨਵੇਂ ਵਪਾਰਕ ਸਮਝੌਤੇ ਵਿਚ ਟੈਰਿਫ ਲਾਜ਼ਮੀ ਤੌਰ 'ਤੇ ਸ਼ਾਮਲ ਹੋਣਗੇ। ਉਨ੍ਹਾਂ ਸੰਕੇਤ ਦਿੱਤਾ ਕਿ ਸੀ.ਯੂ.ਐਸ.ਐਮ.ਏ. ਦੇ ਨਵੀਨੀਕਰਨ ਵਿਚ ਵੀ ਇਹ ਪੂਰੀ ਛੋਟ ਨਹੀਂ ਮਿਲੇਗੀ।
ਮੰਗਲਵਾਰ ਰਾਤ ਨੂੰ ਟਰੰਪ ਦੇ ਸਟੇਟ ਔਫ ਦਿ ਯੂਨੀਅਨ ਸੰਬੋਧਨ ਤੋਂ ਠੀਕ ਬਾਅਦ ਕੈਪੀਟਲ ਹਿੱਲ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਜੈਮੀਸਨ ਗ੍ਰੀਰ ਨੇ ਕਿਹਾ ਕਿ ਕੈਨੇਡਾ ਇਹ ਉਮੀਦ ਨਾ ਰੱਖੇ ਕਿ ਨਵਾਂ ਸਮਝੌਤਾ ਪੂਰੀ ਤਰ੍ਹਾਂ ਟੈਰਿਫ ਮੁਕਤ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਜੇਕਰ ਕੈਨੇਡਾ ਆਪਣੇ ਬਾਜ਼ਾਰ ਖਾਸ ਕਰਕੇ ਡੇਅਰੀ ਸੈਕਟਰ ਅਮਰੀਕਾ ਲਈ ਖੋਲ੍ਹਦਾ ਹੈ ਤਾਂ ਹੀ ਅੱਗੇ ਗੱਲਬਾਤ ਹੋ ਸਕਦੀ ਹੈ। ਇਹ ਟਰੰਪ ਪ੍ਰਸ਼ਾਸਨ ਵੱਲੋਂ ਹੁਣ ਤੱਕ ਦਾ ਸਭ ਤੋਂ ਸਪੱਸ਼ਟ ਸੰਕੇਤ ਹੈ ਕਿ 1994 ਵਿਚ ਐਨ.ਏ.ਐਫ.ਟੀ.ਏ. ਤੋਂ ਸ਼ੁਰੂ ਹੋਈ ਫਰੀ ਟਰੇਡ ਦੀ ਪਰੰਪਰਾ ਹੁਣ ਬਦਲਣ ਵਾਲੀ ਹੈ।
ਗ੍ਰੀਰ ਮੁਤਾਬਕ, ਟਰੰਪ ਪ੍ਰਸ਼ਾਸਨ ਸੀ.ਯੂ.ਐਸ.ਐਮ.ਏ. ਨੂੰ ਮੌਜੂਦਾ ਰੂਪ ਵਿਚ ਦੁਬਾਰਾ ਲਾਗੂ ਨਹੀਂ ਕਰਨਾ ਚਾਹੁੰਦਾ ਕਿਉਂਕਿ ਇਹ ਸਮਝੌਤਾ ਅਮਰੀਕਾ ਵਿਚ ਉਦਯੋਗਿਕ ਉਤਪਾਦਨ ਵਧਾਉਣ ਵਿਚ ਨਾਕਾਮ ਰਿਹਾ ਹੈ। ਗੌਰਤਲਬ ਹੈ ਕਿ ਇਹ ਤਿੰਨ ਪੱਖੀ ਫ੍ਰੀ ਟ੍ਰੇਡ ਸਮਝੌਤਾ ਨਵੀਆਂ ਸ਼ਰਤਾਂ ਨਾਲ ਅੱਗੇ ਵਧੇਗਾ ਜਾਂ ਇਸ ਨੂੰ ਖ਼ਤਮ ਹੋਣ ਦਿੱਤਾ ਜਾਵੇਗਾ, ਇਸ ਦੀ ਤਸਵੀਰ 1 ਜੁਲਾਈ ਨੂੰ ਸਾਫ ਹੋਵੇਗੀ।
