ਅਮਰੀਕੀ ਪ੍ਰਸ਼ਾਸਨ ਦੀ ਡਰੱਗਸ ਮਾਮਲੇ 'ਚ ਬੀ.ਸੀ. 'ਤੇ ਗੰਭੀਰ ਟਿੱਪਣੀ

ਬੀਸੀ ਸਰਕਾਰ ਅਤੇ ਅਮਰੀਕੀ ਪ੍ਰਸ਼ਾਸਨ ਫੈਂਟਾਨਿਲ ਡਰੱਗ ਦੇ ਮੁੱਦੇ 'ਤੇ ਆਹਮੋ-ਸਾਹਮਣੇ ਹਨ। ਟਰੰਪ ਦੇ ਐਫਬੀਆਈ ਦੇ ਮੁਖੀ ਨੇ ਵੈਨਕੂਵਰ 'ਤੇ ਅਮਰੀਕਾ ਵਿਚ ਫੈਂਟਾਨਿਲ ਸੰਕਟ ਵਧਾਉਣ ਦਾ ਦੋਸ਼ ਲਗਾਇਆ ਹੈ। ਕੈਸ਼ ਪਟੇਲ ਨੇ ਇੱਕ ਇੰਟਰਵਿਊ ਵਿਚ ਦਾਅਵਾ ਕੀਤਾ ਕਿ ਚੀਨ, ਰੂਸ ਅਤੇ ਈਰਾਨ ਸਮੇਤ ਹੋਰ ਵਿਦੇਸ਼ੀ ਤਾਕਤਾਂ ਦੇ ਸਮਰਥਨ ਵਾਲੇ ਕ੍ਰਿਮੀਨਲ ਨੈੱਟਵਰਕ ਕੈਨੇਡੀਅਨ ਰੂਟ ਰਾਹੀਂ ਖਾਸ ਕਰ ਵੈਨਕੂਵਰ ਦੇ ਆਸਪਾਸ ਹਵਾਈ ਤੇ ਸਮੁੰਦਰੀ ਰਸਤੇ ਫੈਂਟਾਨਿਲ ਦੀ ਤਸਕਰੀ ਕਰ ਰਹੇ ਹਨ।

ਬੀਸੀ ਸਰਕਾਰ ਨੇ ਇਸ ਦਾਅਵੇ ਨੂੰ ਸਿਰੇ ਤੋਂ ਖਾਰਜ ਕੀਤਾ ਹੈ। ਮੰਤਰੀ ਰਵੀ ਕਾਹਲੋਂ ਨੇ ਕਿਹਾ ਕਿ ਅਮਰੀਕੀ ਪ੍ਰਸ਼ਾਸਨ ਦਾ ਨਵਾਂ ਦਾਅਵਾ ਟੈਰਿਫ ਤੋਂ ਧਿਆਨ ਭਟਾਉਣ ਲਈ ਹੈ। ਉਨ੍ਹਾਂ ਕਿਹਾ ਕਿ ਅਮਰੀਕਾ ਦੇ ਆਪਣੇ ਅੰਕੜੇ ਦੱਸਦੇ ਹਨ ਕਿ ਕੈਨੇਡਾ ਸਰਹੱਦ 'ਤੇ ਬਹੁਤ ਘੱਟ ਫੈਂਟਾਨਿਲ ਦੀ ਜ਼ਬਤਗੀ ਹੋਈ ਹੈ।

ਅਮਰੀਕੀ ਸਰਹੱਦੀ ਸੁਰੱਖਿਆ ਏਜੰਸੀ ਦੇ ਅੰਕੜਿਆਂ ਮੁਤਾਬਕ, ਪਿਛਲੇ ਮਹੀਨੇ ਕੈਨੇਡਾ-ਅਮਰੀਕਾ ਸਰਹੱਦ 'ਤੇ ਮਹਿਜ 6.3 ਕਿਲੋਗ੍ਰਾਮ ਫੈਂਟਾਨਿਲ ਫੜ੍ਹ ਹੋਇਆ, ਜੋ ਮੈਕਸੀਕੋ-ਅਮਰੀਕਾ ਸਰਹੱਦ 'ਤੇ ਜ਼ਬਤ ਹੋਏ 300 ਕਿਲੋਗ੍ਰਾਮ ਦਾ ਨਾਮਾਤਰ ਹਿੱਸਾ ਹੈ।