ਅਮਰੀਕਾ ਨੇ ਬਰਡ ਫਲੂ ਦੇ ਆਪਣੇ ਪਹਿਲੇ ਗੰਭੀਰ ਮਨੁੱਖੀ ਕੇਸ ਦੀ ਕੀਤੀ ਪੁਸ਼ਟੀ

ਅਮਰੀਕਾ ਨੇ ਬਰਡ ਫਲੂ ਦੇ ਆਪਣੇ ਪਹਿਲੇ ਗੰਭੀਰ ਮਨੁੱਖੀ ਕੇਸ ਦੀ ਪੁਸ਼ਟੀ ਕੀਤੀ ਹੈ, ਇਹ ਮਰੀਜ਼ ਲੁਈਸਿਆਨਾ ਦਾ ਰਹਿਣ ਵਾਲਾ ਹੈ। ਅਮਰੀਕਾ ਦੇ ਰੋਗ ਨਿਯੰਤਰਣ ਕੇਂਦਰ ਨੇ ਕਿਹਾ ਕਿ ਲੁਈਸਿਆਨਾ ਦਾ ਇਹ ਮਰੀਜ਼ ਹਸਪਤਾਲ ਵਿਚ ਦਾਖ਼ਲ ਹੈ, 13 ਦਸੰਬਰ ਨੂੰ ਉਸ ਵਿਚ ਬਰਡ ਫਲੂ ਦੀ ਪੁਸ਼ਟੀ ਹੋਈ ਸੀ। ਉੱਥੇ ਹੀ, ਕੈਲੀਫੋਰਨੀਆ ਨੇ ਵਧਦੇ ਪ੍ਰਕੋਪ ਨਾਲ ਨਜਿੱਠਣ ਲਈ ਐਮਰਜੈਂਸੀ ਦੀ ਘੋਸ਼ਣਾ ਕੀਤੀ ਹੈ।

ਰੋਗ ਨਿਯੰਤਰਣ ਡਿਪਾਰਟਮੈਂਟ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਇਹ ਅਮਰੀਕਾ ਵਿਚ H5N1 ਬਰਡ ਫਲੂ ਦਾ ਇਹ ਪਹਿਲਾ ਗੰਭੀਰ ਮਨੁੱਖੀ ਮਾਮਲਾ ਹੈ। ਹਾਲਾਂਕਿ, ਅਪ੍ਰੈਲ ਤੋਂ ਹੁਣ ਤੱਕ ਅਮਰੀਕਾ ਵਿਚ ਬਰਡ ਫਲੂ ਦੇ ਕੁੱਲ 61 ਮਨੁੱਖੀ ਕੇਸ ਆ ਚੁੱਕੇ ਹਨ।

ਮਾਰਚ ਵਿਚ ਟੈਕਸਾਸ ਅਤੇ ਕੰਸਾਸ ਵਿਚ ਪਹਿਲੀ ਵਾਰ ਇਸ ਦਾ ਪਤਾ ਚੱਲਣ ਤੋਂ ਬਾਅਦ ਇਹ ਵਾਇਰਸ ਡੇਅਰੀ ਪਸ਼ੂਆਂ ਵਿਚ 16 ਰਾਜਾਂ ਵਿਚ ਫੈਲ ਚੁੱਕਾ ਹੈ।

ਉਥੇ ਹੀ, 3 ਨਵੰਬਰ ਨੂੰ ਬ੍ਰਿਟਿਸ਼ ਕੋਲੰਬੀਆ ਵਿਚ ਇੱਕ ਨਾਬਾਲਗ ਵਿਚ ਬਰਡ ਫਲੂ ਦਾ ਮਾਮਲਾ ਸਾਹਮਣੇ ਆਇਆ ਸੀ, 25 ਨਵੰਬਰ ਨੂੰ ਸੂਬੇ ਨੇ ਰਿਪੋਰਟ ਦਿੱਤੀ ਸੀ ਕਿ ਨੌਜਵਾਨ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ।