19.22C Vancouver 19.22C VancouverMay 17, 2021 3:41 PM -
ਵੈਨਕੂਵਰ ਦੇ ਮੇਅਰ ਮੁਤਾਬਕ ਉਹ ਇਸ ਗੱਲ ਤੋਂ ਬੇਹੱਦ ਨਿਰਾਸ਼ ਹਨ ਕਿ ਸ਼ੁੱਕਰਵਾਰ ਸਵੇਰ ਨੂੰ ਸੈਰ ਲਈ ਨਿਕਲੇ ਬ੍ਰਿਟਿਸ਼ ਕੋਲੰਬੀਆ ਦੇ ਇੱਕ ਸੁਪਰੀਮ ਕੋਰਟ ਜਸਟਿਸ ਨੂੰ ਪੁਲਿਸ ਨੇ ਗਲਤੀ ਨਾਲ ਹਿਰਾਸਤ ਵਿਚ ਲੈ ਲਿਆ ਸੀ।
ਕੈਨੇਡੀ ਸਟੀਵਰਟ ਨੇ ਇੱਕ ਬਿਆਨ ਵਿੱਚ ਕਿਹਾ ਹੈ ਕਿ ਉਨ੍ਹਾਂ ਨੇ ਜਸਟਿਸ ਸੇਲਵਿਨ ਰੌਮਿਲੀ ਤੋਂ ਮੁਆਫੀ ਮੰਗੀ ਹੈ, ਜੋ ਕਿ ਅਦਾਲਤ ਵਿੱਚ ਨਿਯੁਕਤ ਕੀਤੇ ਗਏ ਪਹਿਲੇ ਸਿਆਹ ਰੰਗ ਦੇ ਵਿਅਕਤੀ ਸਨ।
ਵੈਨਕੂਵਰ ਪੁਲਿਸ ਦੇ ਸਾਰਜੈਂਟ ਸਟੀਵ ਐਡਿਸਨ ਅਨੁਸਾਰ ਇੰਗਲਿਸ਼ ਬੇਅ ਦੇ ਨਜ਼ਦੀਕ ਇੱਕ ਵਿਅਕਤੀ ਦੇ ਲੋਕਾਂ ਨੂੰ ਲੱਤਾਂ ਤੇ ਮੁੱਕੇ ਮਾਰਨ ਅਤੇ ਥੁੱਕਣ ਦੀਆਂ ਰਿਪੋਰਟਾਂ ਤੋਂ ਬਾਅਦ ਪੁਲਿਸ ਨੂੰ ਸਵੇਰ ਤਕਰੀਬਨ 9:15 ਵਜੇ ਓਥੇ ਭੇਜਿਆ ਗਿਆ।
ਉਨ੍ਹਾਂ ਕਿਹਾ ਕਿ ਅਫਸਰਾਂ ਨੇ ਸ਼ੱਕੀ ਦੇ ਵੇਰਵੇ ਨਾਲ ਮੇਲ ਖਾਂਦੇ ਇੱਕ ਵਿਅਕਤੀ ਨੂੰ ਦੇਖਿਆ ਅਤੇ ਘਟਨਾ ਸੰਬੰਧੀ ਹਿੰਸਕ ਰਿਪੋਰਟਾਂ ਦੇ ਮੱਦੇਨਜ਼ਰ ਹੱਥਕੜੀ ਬੰਨ੍ਹਦਿਆਂ "ਉਸਨੂੰ ਛਾਣਬੀਣ ਲਈ ਥੋੜ੍ਹੇ ਸਮੇਂ ਲਈ ਹਿਰਾਸਤ ਵਿੱਚ ਲੈ ਲਿਆ"।
ਐਡਿਸਨ ਅਨੁਸਾਰ ਆਦਮੀ ਨੇ ਅਫਸਰਾਂ ਦੀਆਂ ਹਦਾਇਤਾਂ ਦੀ ਪਾਲਣਾ ਕੀਤੀ ਅਤੇ ਆਪਣੇ ਆਪ ਨੂੰ ਇੱਕ ਰਿਟਾਇਰਡ ਜੱਜ ਦੱਸਿਆ ਜਿਸ ਤੋਂ ਬਾਅਦ ਅਫ਼ਸਰਾਂ ਨੇ ਉਸ ਤੋਂ ਮੁਆਫੀ ਮੰਗ ਕੇ ਤੁਰੰਤ ਹੱਥਕੜੀਆਂ ਹਟਾ ਦਿੱਤੀਆਂ।
ਪੁਲਿਸ ਮੁਤਾਬਕ ਜਦੋਂ ਇਹ ਸਪੱਸ਼ਟ ਹੋ ਗਿਆ ਕਿ ਉਹ ਸ਼ੱਕੀ ਨਹੀਂ ਸੀ ਅਤੇ ਉਸਨੇ ਕੁਝ ਗਲਤ ਨਹੀਂ ਕੀਤਾ ਸੀ, ਉਸ ਨੂੰ ਅਗਾਂਹ ਵਧਣ ਦੀ ਇਜਾਜ਼ਤ ਦੇ ਦਿੱਤੀ ਗਈ।
ਐਡਿਸਨ ਦਾ ਕਹਿਣਾ ਹੈ ਕਿ ਅਸਲ ਸ਼ੱਕੀ ਆਦਮੀ ਨੂੰ ਕੁਝ ਸਮੇਂ ਬਾਅਦ ਓਸੇ ਇਲਾਕੇ ਤੋਂ ਗ੍ਰਿਫਤਾਰ ਕਰ ਲਿਆ ਗਿਆ।
ਸਟੀਵਰਟ ਮੁਤਾਬਕ ਉਨ੍ਹਾਂ ਨੇ ਪੁਲਿਸ ਵਿਭਾਗ ਦੇ ਮੁਖੀ ਅਤੇ ਬੋਰਡ ਮੈਂਬਰਾਂ ਨਾਲ ਸੰਪਰਕ ਕੀਤਾ ਹੈ, ਅਤੇ ਬੋਰਡ ਘਟਨਾ ਦੀ ਪੜਚੋਲ ਕਰੇਗਾ।
