10.15C Vancouver 10.15C VancouverOct 22, 2025 5:31 PM - Connect Newsroom
ਵੈਨਕੂਵਰ ਪੁਲਿਸ ਨੇ ਡਾਊਨਟਾਊਨ ਈਸਟਸਾਈਡ ਦੇ ਵੈਸਟ ਹੋਟਲ ਅਤੇ ਇਸ ਦੇ ਪੱਬ ਤੋਂ ਕੰਮ ਕਰ ਰਹੇ ਇੱਕ ਅਪਰਾਧਿਕ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ। ਪੁਲਿਸ ਨੇ ਕਿਹਾ ਕਿ ਉਸ ਦੀ ਟਾਸਕ ਫੋਰਸ ਬੈਰਾਜ ਨੇ ਅਗਸਤ ਵਿਚ ਸ਼ੁਰੂ ਕੀਤੀ ਗਈ ਛੇ ਹਫ਼ਤਿਆਂ ਦੀ ਜਾਂਚ ਤੋਂ ਬਾਅਦ 50 ਸਾਲ ਦੇ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ, ਜਿਨ੍ਹਾਂ ਪਾਸੋਂ $336,000 ਦੇ ਨਸ਼ੀਲੇ ਪਦਾਰਥ, ਕੈਸ਼ ਅਤੇ ਹਥਿਆਰਾਂ ਦੀ ਇੱਕ ਵੱਡੀ ਖੇਪ ਜ਼ਬਤ ਕੀਤੀ ਗਈ। 2.5 ਕਿਲੋ ਨਸ਼ੇ ਵਿਚ ਫੈਂਟਾਨਿਲ, ਕੋਕੀਨ, ਮੈਥਾਮਫੇਟਾਮਾਈਨ ਸਮੇਤ ਹੋਰ ਡਰੱਗ ਸ਼ਾਮਲ ਸਨ।
ਸਾਰਜੈਂਟ ਐਡੀਸਨ ਨੇ ਦੱਸਿਆ ਕਿ ਇਹ ਹੋਟਲ ਘੱਟ ਇਨਕਮ ਵਾਲੇ ਕਮਿਊਨਿਟੀ ਮੈਂਬਰਾਂ ਲਈ ਹੈ ਪਰ ਜਾਂਚ ਵਿਚ ਪਾਇਆ ਗਿਆ ਕਿ ਇਸ ਦੇ ਕਮਰੇ ਸੰਗਠਿਤ ਅਪਰਾਧੀ ਵਲੋਂ ਕਿਰਾਏ 'ਤੇ ਲਏ ਗਏ ਸਨ ਜੋ ਇਲਾਕੇ ਦੇ ਰਹਿਣ ਵਾਲੇ ਵੀ ਨਹੀਂ ਸਨ।
ਐਡੀਸਨ ਨੇ ਕਿਹਾ ਕਿ ਇਨ੍ਹਾਂ ਕਮਰਿਆਂ ਵਿਚ ਕੋਈ ਰਹਿ ਨਹੀਂ ਰਿਹਾ ਸੀ ਬਲਕਿ ਇਨ੍ਹਾਂ ਦਾ ਇਸਤੇਮਾਲ ਚੋਰੀ ਦੇ ਸਾਮਾਨ, ਹਥਿਆਰ ਤੇ ਗੈਰ-ਕਾਨੂੰਨੀ ਡਰੱਗਜ਼ ਰੱਖਣ ਲਈ ਕੀਤਾ ਜਾ ਰਿਹਾ ਸੀ। 25 ਸਤੰਬਰ ਨੂੰ ਮਲਟੀਪਲ ਵਾਰੰਟ 'ਤੇ ਇੱਥੇ ਤਲਾਸ਼ੀ ਲਈ ਗਈ, ਜਿਸ ਦੌਰਾਨ $35,000 ਕੈਸ਼ ਅਤੇ 9 ਗੰਨਜ਼, 200 ਰਾਊਂਡ ਕਾਰਤੂਸ ਵੀ ਬਰਾਮਦ ਹੋਏ। ਪੁਲਿਸ ਨੇ ਜਾਂਚ ਚੱਲ ਰਹੀ ਹੋਣ ਕਾਰਨ ਅਜੇ ਤੱਕ ਮਾਮਲੇ ਵਿਚ ਚਾਰਜ ਨਹੀਂ ਲਗਾਏ ਗਏ ਹਨ।
