ਵੈਨਕੂਵਰ ਪੁਲਿਸ ਨੇ ਨਸ਼ਾ ਤਸਕਰੀ ਖ਼ਿਲਾਫ਼ ਕੀਤੀ ਕਾਰਵਾਈ, ਨਸ਼ੀਲੇ ਪਦਾਰਥ, ਨਕਦੀ ਅਤੇ ਹਥਿਆਰ ਬਰਾਮਦ

ਵੈਨਕੂਵਰ ਪੁਲਿਸ ਨੇ ਸ਼ਹਿਰ ਦੇ ਡਾਊਨਟਾਊਨ ਈਸਟਸਾਈਡ ਵਿਚ ਨਸ਼ਾ ਤਸਕਰੀ ਖ਼ਿਲਾਫ਼ ਇੱਕ ਟਾਰਗੇਟਿਡ ਜਾਂਚ ਦੌਰਾਨ $79,000 ਤੋਂ ਵੱਧ ਕੀਮਤ ਦੇ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥ, ਕੈਸ਼ ਅਤੇ ਹਥਿਆਰ ਜ਼ਬਤ ਕੀਤੇ ਹਨ। ਇਸ ਓਪ੍ਰੇਸ਼ਨ ਨੂੰ ਪ੍ਰੋਜੈਕਟ ਬਿੰਗੋ ਨਾਂ ਦਿੱਤਾ ਗਿਆ ਸੀ, ਜਿਸ ਦੀ ਸ਼ੁਰੂਆਤ ਦਸੰਬਰ 2025 ਵਿਚ ਈਸਟ ਹੇਸਟਿੰਗਜ਼ ਅਤੇ ਪ੍ਰਿੰਸੈਸ ਐਵੇਨਿਊ ਦੇ ਨੇੜੇ ਇੱਕ SRO ਇਮਾਰਤ ਵਿਚ ਸ਼ੱਕੀ ਗਤੀਵਿਧੀਆਂ ਦੇਖਣ ਤੋਂ ਬਾਅਦ ਹੋਈ ਸੀ।

ਲਗਭਗ ਛੇ ਮਹੀਨਿਆਂ ਦੀ ਲੰਬੀ ਜਾਂਚ ਅਤੇ ਪੁਖ਼ਤਾ ਸਬੂਤ ਇਕੱਠੇ ਕਰਨ ਤੋਂ ਬਾਅਦ ਪੁਲਿਸ ਨੇ ਪਿਛਲੇ ਮਹੀਨੇ ਸਰਚ ਵਾਰੰਟ 'ਤੇ ਇਸ ਇਮਾਰਤ ਵਿਚ ਛਾਪੇਮਾਰੀ ਕੀਤੀ, ਜਿਥੋਂ $65,922 ਦੀ ਕੁੱਲ ਕੀਮਤ ਦੇ ਫੈਂਟਾਨਿਲ, ਕੋਕੇਨ, ਮੈਥਾਮਫੇਟਾਮਾਈਨ, ਨਸ਼ੇ ਦੀਆਂ ਗੋਲੀਆਂ ਅਤੇ ਗੈਰ-ਕਾਨੂੰਨੀ ਸਿਗਰਟ ਦੀ ਬਰਾਮਦਗੀ ਹੋਈ।

ਇਸ ਤੋਂ ਇਲਾਵਾ ਪੁਲਿਸ ਨੇ ਮੌਕੇ ਤੋਂ $10,000 ਦੇ ਕਰੀਬ ਕੈਸ਼, ਇੱਕ ਹੈਂਡਗੰਨ, ਬੁਲੇਟਪਰੂਫ ਜੈਕਟ ਅਤੇ ਹੋਰ ਕਈ ਹਥਿਆਰ ਬਰਾਮਦ ਕੀਤੇ। ਮਾਮਲੇ ਦੇ ਸਬੰਧ ਵਿਚ ਵੈਨਕੂਵਰ ਦੇ ਇੱਕ 61 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕਰਕੇ ਪੁੱਛਗਿੱਛ ਕੀਤੀ ਗਈ ਹੈ, ਜਿਸ ਨੂੰ ਫਿਲਹਾਲ ਅਗਲੀ ਜਾਂਚ ਤੱਕ ਰਿਹਾਅ ਕੀਤਾ ਗਿਆ ਹੈ।