18.38C Vancouver 18.38C VancouverMay 22, 2020 3:02 AM -
ਏਅਰ ਇੰਡੀਆ ਦੀ ਇੱਕ ਫਲਾਈਟ ਨੇ 20 ਮਈ ਨੂੰ ਯਾਨੀ ਕਿ ਬੁੱਧਵਾਰ ਨੂੰ ਵੈਨਕੂਵਰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਉਡਾਣ ਭਰੀ।
ਇਸ ਫਲਾਈਟ 'ਤੇ 200 ਭਾਰਤੀ ਸਵਾਰ ਸਨ।
ਵੰਦੇ ਭਾਰਤ ਮਿਸ਼ਨ ਤਹਿਤ ਦੁਨੀਆ ਦੇ ਵੱਖ-ਵੱਖ ਥਾਵਾਂ ਤੋਂ ਭਾਰਤੀਆਂ ਨੂੰ ਵਾਪਿਸ ਭਾਰਤ ਪਹੁੰਚਾ ਰਹੀਆਂ ਫਲਾਈਟਸ ਦੀ ਲੜੀ ਵਿੱਚ ਹੀ, ਇਹ ਵੈਨਕੂਵਰ ਤੋਂ ਉਡਾਣ ਭਰਨ ਵਾਲੀ ਫਲਾਈਟ ਵੀ ਸ਼ਾਮਿਲ ਸੀ।
ਇਸ ਮਿਸ਼ਨ ਤਹਿਤ ਵੈਨਕੂਵਰ ਤੋਂ ਉਡਾਣ ਭਰਨ ਵਾਲੀ ਇਹ ਏਅਰ ਇੰਡੀਆ ਦੀ ਪਹਿਲੀ ਫਲਾਈਟ ਦੱਸੀ ਗਈ ਹੈ।
ਇੱਕ ਫੇਸਬੁੱਕ ਪੋਸਟ ਵਿੱਚ ਵੈਨਕੂਵਰ 'ਚ ਭਾਰਤ ਦੇ ਕੌਂਸੂਲੇਟ ਜਨਰਲ ਨੇ ਲਿਖਿਆ, "ਏਅਰ ਇੰਡੀਆ-1190 ਨੇ ਵੈਨਕੂਵਰ ਤੋਂ ਦਿੱਲੀ ਅਤੇ ਅਮ੍ਰਿਤਸਰ ਲਈ ਉਡਾਣ ਭਰੀ ਹੈ।
ਇਸ 'ਤੇ ਸਵਾਰ ਭਾਰਤੀਆਂ ਵਿੱਚ ਵਡੇਰੀ ਉਮਰ ਦੇ ਲੋਕ, ਗਰਭਵਤੀ ਔਰਤਾਂ, ਬੱਚੇ ਅਤੇ ਵਿਦਿਆਰਥੀ ਸਵਾਰ ਸਨ।
ਕੋਵਿਡ-19 ਆਊਟਬ੍ਰੇਕ ਤੋਂ ਬਾਅਦ ਇਹ ਲੋਕ ਵਾਪਿਸ ਭਾਰਤ ਪਰਤਣਾ ਚਾਹੁੰਦੇ ਸਨ।"
ਇਹ ਵੀ ਜਾਣਕਾਰੀ ਦਿੱਤੀ ਗਈ ਕਿ ਵੈਨਕੂਵਰ 'ਚ ਪਹਿਲੀ ਵਾਰ ਏਅਰ ਇੰਡੀਆ ਦੀ ਫਲਾਈਟ ਉੱਤਰੀ ਹੈ।
ਇਸ ਫਲਾਈਟ 'ਤੇ ਪਹਿਲਾਂ ਮੰਗਲਵਾਰ ਨੂੰ ਭਾਰਤ ਤੋਂ ਸਵਾਰੀਆਂ ਨੂੰ ਕੈਨੇਡਾ ਲਿਆਂਦਾ ਗਿਆ ਸੀ।
ਭਾਰਤ ਤੋਂ ਆਈ ਫਲਾਈਟ 'ਤੇ 217 ਸਵਾਰੀਆਂ ਮੌਜੂਦ ਸਨ।
ਬੁੱਧਵਾਰ ਨੂੰ ਇਸ ਹਵਾਈ ਜਹਾਜ਼ ਨੇ ਵਾਪਿਸ ਭਾਰਤ ਲਈ ਉਡਾਣ ਭਰੀ।
ਹਵਾਈ ਜਹਾਜ਼ 'ਤੇ ਸਵਾਰ ਹੋਣ ਵਾਲੇ ਭਾਰਤੀ ਲੋਕਾਂ ਨੇ ਭਾਰਤ ਸਰਕਾਰ ਅਤੇ ਭਾਰਤੀ ਕੌਂਸੂਲੇਟ ਜਨਰਲ ਦਾ ਧੰਨਵਾਦ ਕੀਤਾ।
ਵੀਰਵਾਰ ਨੂੰ ਭਾਰਤ ਦੇ ਸਿਵਿਲ ਏਵੀਏਸ਼ਨ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਕਿਹਾ ਕਿ ਵੰਦੇ ਭਾਰਤ ਮਿਸ਼ਨ ਦੇ ਤਹਿਤ 20,000 ਤੋਂ ਵਧੇਰੇ ਭਾਰਤੀਆਂ ਨੂੰ ਵਤਨ ਵਾਪਿਸ ਲਿਆਂਦਾ ਗਿਆ ਹੈ।
ਇਸ ਮਿਸ਼ਨ ਦੇ ਪਹਿਲੇ ਪੜ੍ਹਾਅ ਨੂੰ ਭਾਰਤ 'ਚ 7 ਮਈ ਨੂੰ ਲਾਂਚ ਕੀਤਾ ਗਿਆ ਸੀ, ਜਦਕਿ ਦੂਜੇ ਪੜ੍ਹਾਅ ਦੀ ਸ਼ੁਰੂਆਤ 16 ਮਈ ਤੋਂ ਹੋਈ।
