20.61C Vancouver 20.61C VancouverSep 11, 2025 11:03 PM - Connect Newsroom
ਲੈਂਗਲੀ 'ਚ 5 ਸਿਤੰਬਰ ਨੂੰ ਰਾਤ ਦੇ ਸਮੇਂ ਵਾਪਰੀ ਗੋਲੀ ਚੱਲਣ ਦੀ ਵਾਰਦਾਤ 'ਚ ਪੀੜਤ ਵਿਅਕਤੀ ਦੀ ਪਛਾਣ ਹੋ ਗਈ ਹੈ।
ਅੱਜ ਇੰਟੈਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ, ਜਾਣੀ ਕਿ ਆਈ.ਹਿਟ ਨੇ ਦੱਸਿਆ ਕਿ ਘਟਨਾ 'ਚ ਜਾਨ ਗਵਾਉਣ ਵਾਲਾ ਵਿਅਕਤੀ 24 ਸਾਲਾ ਤਰਨ ਪੰਧੇਰ ਸੀ।
ਇਹ ਵੀ ਦੱਸਿਆ ਗਿਆ ਕਿ ਮਾਮਲੇ ਦੀ ਜਾਂਚ ਹੁਣ ਆਈ.ਹਿਟ ਦੀ ਇੰਟੈਗ੍ਰੇਟਿਡ ਗੈਂਗ ਹੋਮੀਸਾਈਡ ਟੀਮ ਵੱਲੋਂ ਕੀਤੀ ਜਾ ਰਹੀ ਹੈ।
ਘਟਨਾ ਨੂੰ 200 ਸਟ੍ਰੀਟ ਅਤੇ 53 ਐਵੀਨਿਊ ਕੋਲ ਅੰਜਾਮ ਦਿੱਤਾ ਗਿਆ ਸੀ। ਘਟਨਾ ਉਸ ਵੇਲੇ ਵਾਪਰੀ ਜਦ ਪੀੜਤ ਇੱਕ ਟੈਕਸੀ 'ਚ ਸਵਾਰ ਸੀ।
ਪੁਲਿਸ ਅਨੁਸਾਰ ਪੰਧੇਰ ਬਾਰੇ ਪੁਲਿਸ ਜਾਣਦੀ ਸੀ ਅਤੇ ਉਸ ਨੂੰ ਸੰਗਠਿਤ ਅਪਰਾਧ ਨਾਲ ਜੁੜਿਆ ਮੰਨਿਆ ਜਾਂਦਾ ਸੀ।
ਜਾਂਚ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਇਹ ਘਟਨਾ ਗੈਂਗ ਹਿੰਸਾ ਸੰਬੰਧਤ ਸੀ।
ਆਈ.ਹਿਟ ਤੋਂ ਮੀਡੀਆ ਰਿਲੇਸ਼ਨਸ ਅਫ਼ਸਰ, ਕੌਰਪੋਰਲ ਸੁੱਖੀ ਢੇਸੀ ਦਾ ਕਹਿਣਾ ਸੀ, "ਸ਼ੂਟਿੰਗ ਸੰਬੰਧੀ ਅਜਿਹੀਆਂ ਕਈ ਇੰਡੀਕੇਸ਼ਨਸ ਹਨ ਜੋ ਇਸ ਦੇ ਗੈਂਗ ਸੰਬੰਧੀ ਹੋਣ ਦਾ ਇਸ਼ਾਰਾ ਕਰਦੀਆਂ ਹਨ।"
ਇਸ ਪੂਰੀ ਵਾਰਦਾਤ ਤੋਂ ਬਾਅਦ 5 ਸਿਤੰਬਰ ਦੀ ਰਾਤ ਕਰੀਬ 11 ਵਜੇ ਪੁਲਿਸ ਨੂੰ 64A ਐਵੀਨਿਊ ਦੇ 13250 ਬਲੌਕ ਕੋਲ ਇੱਕ ਵਾਹਨ ਅੱਗ ਦੇ ਹਵਾਲੇ ਹੋਇਆ ਮਿਲਿਆ ਸੀ।
ਇਸ ਵਾਹਨ ਨੂੰ ਵਾਰਦਾਤ ਨਾਲ ਸੰਬੰਧਤ ਮੰਨਿਆ ਜਾ ਰਿਹਾ ਹੈ।
