20.26C Vancouver 20.26C VancouverAug 12, 2020 10:22 PM -
ਅਮਰੀਕਾ 'ਚ ਡੈਮੋਕਰੈਟਿਕ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਜੋ ਬਾਈਡਨ ਅਤੇ ਨਵੀਂ ਚੁਣੀ ਗਈ ਰਨਿੰਗ ਮੇਟ ਕਮਲਾ ਹੈਰਿਸ ਨੇ ਅੱਜ ਪਹਿਲੀ ਵਾਰ ਇਕੱਠਿਆਂ ਇੱਕ ਚੋਣ ਮੁਹਿੰਮ 'ਚ ਹਿੱਸਾ ਲਿਆ।
ਦੋਨਾਂ ਨੇ ਇੱਕ ਵਰਚੁਅਲ ਸੰਬੋਧਨ ਦੌਰਾਨ ਕਈ ਮੁੱਦਿਆਂ 'ਤੇ ਆਪਣੇ ਵਿਚਾਰ ਰੱਖੇ ਅਤੇ ਰਾਸ਼ਟਰਪਤੀ ਡੌਨਲਡ ਟ੍ਰੰਪ ਨੂੰ ਨਿਸ਼ਾਨੇ 'ਤੇ ਲਿਆ।
ਬਾਈਡਨ ਨੇ ਪਹਿਲੀ ਸਿਆਹ ਰੰਗ ਦੀ ਔਰਤ ਨੂੰ ਕਿਸੇ ਅਹਿਮ ਅਹੁਦੇ 'ਤੇ ਨੁਮਾਇੰਦੇ ਵਜੋਂ ਲਿਆਂਦੇ ਜਾਣ ਦੀ ਅਹਿਮੀਅਤ 'ਤੇ ਜ਼ੋਰ ਦਿੱਤਾ ਅਤੇ ਕਿਹਾ ਕਿ ਨੁਮਾਇੰਦਗੀ ਦਾ ਅਸਰ ਪੈਂਦਾ ਹੈ।
ਬਾਈਡਨ ਨੇ ਕਿਹਾ ਕਿ ਹੈਰਿਸ ਦੀ ਮੌਜੂਦਗੀ ਟ੍ਰੰਪ ਨੂੰ ਮਾਤ ਦੇਣ 'ਚ ਮਦਦ ਕਰੇਗੀ ਅਤੇ ਦੇਸ਼ ਸਾਹਮਣੇ ਖੜੀਆਂ ਤਿੰਨ ਮੁਸੀਬਤਾਂ, ਪੈਂਡੇਮਿਕ, ਜ਼ਖਮੀ ਇਕਾਨਮੀ ਅਤੇ ਸਿਸਟਮਿਕ ਨਸਲਵਾਦ ਦੇ ਸੰਕਟ ਨਾਲ ਲੜਨ 'ਚ ਮਦਦ ਪ੍ਰਦਾਨ ਕਰੇਗੀ।
ਅਮਰੀਕਾ ਦੀ ਰਾਸ਼ਟਰਪਤੀ ਦੌੜ 'ਚ ਅਹਿਮ ਦਾਅਵੇਦਾਰ ਜੋ ਬਾਈਡਨ ਨੇ ਕੱਲ ਆਪਣੇ ਰਨਿੰਗ ਮੇਟ ਦਾ ਐਲਾਨ ਕੀਤਾ ਸੀ।
ਕੈਲੀਫੋਰਨੀਆ ਤੋਂ ਸੈਨੇਟਰ ਕਮਲਾ ਹੈਰਿਸ ਨੂੰ ਰਨਿੰਗ ਮੇਟ ਵਜੋਂ ਚੁਣਿਆ ਗਿਆ ਹੈ।
ਇਸ ਨੂੰ ਇਤਿਹਾਸਿਕ ਫ਼ੈਸਲਾ ਦੱਸਿਆ ਜਾ ਰਿਹਾ ਹੈ, ਜਿਸ ਤੋਂ ਬਾਅਦ ਇਕ ਸਿਆਹ ਰੰਗ ਦੀ ਔਰਤ ਪਹਿਲੀ ਵਾਰ ਕਿਸੇ ਵੱਡੀ ਪਾਰਟੀ ਦੇ ਰਾਸ਼ਟਰਪਤੀ ਟਿਕਟ 'ਤੇ ਸਾਹਮਣੇ ਆਵੇਗੀ।
55 ਸਾਲਾ ਹੈਰਿਸ ਪਾਰਟੀ ਦੇ ਪ੍ਰਮੁੱਖ ਚਿਹਰਿਆਂ ਵਿੱਚੋਂ ਇੱਕ ਮੰਨੀ ਜਾਂਦੀ ਹਨ, ਅਤੇ ਹੁਣ ਉਨ੍ਹਾਂ ਨੂੰ ਉਪ ਰਾਸ਼ਟਰਪਤੀ ਦੇ ਅਹੁਦੇ ਲਈ ਸਾਹਮਣੇ ਲਿਆਂਦਾ ਗਿਆ ਹੈ।
