ਪੱਛਮੀ ਅਤੇ ਉੱਤਰੀ ਕੈਨੇਡਾ ਵਿੱਚ ਕ੍ਰਿਸਮਸ ਤੋਂ ਪਹਿਲਾਂ ਕੜਾਕੇ ਦੀ ਠੰਡ ਅਤੇ ਬਰਫਬਾਰੀ

ਕੈਨੇਡਾ ਦੇ ਵੈਸਟਰਨ ਅਤੇ ਨੌਰਥਨ ਇਲਾਕਿਆਂ ਵਿਚ ਇਸ ਵਾਰ ਕ੍ਰਿਸਮਸ ਦਾ ਤਿਉਹਾਰ ਕੜਾਕੇ ਦੀ ਠੰਢ ਦੇ ਸਾਏ ਹੇਠ ਮਨਾਇਆ ਜਾ ਰਿਹਾ ਹੈ। ਇਨਵਾਇਰਮੈਂਟ ਕੈਨੇਡਾ ਨੇ ਚਿਤਾਵਨੀ ਦਿੱਤੀ ਹੈ ਕਿ ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਦੇ ਕੁਝ ਹਿੱਸਿਆਂ ਵਿਚ ਠੰਡੀਆਂ ਹਵਾਵਾਂ ਨਾਲ ਤਾਪਮਾਨ ਮਾਈਨਸ 45 ਤੋਂ ਮਾਈਨਸ 50 ਡਿਗਰੀ ਸੈਲਸੀਅਸ ਤੱਕ ਆ ਸਕਦਾ ਹੈ।

ਸੈਂਟਰਲ ਐਲਬਰਟਾ ਵਿਚ ਕ੍ਰਿਸਮਸ ਦੀ ਸਵੇਰ ਤੱਕ 10 ਤੋਂ 20 ਸੈਂਟੀਮੀਟਰ ਤੱਕ ਬਰਫ਼ਬਾਰੀ ਹੋਣ ਦੀ ਉਮੀਦ ਹੈ। ਮੌਸਮ ਵਿਭਾਗ ਨੇ ਡਰਾਈਵਰਾਂ ਨੂੰ ਸੜਕਾਂ ਦੀ ਖ਼ਰਾਬ ਹਾਲਤ ਨੂੰ ਦੇਖਦੇ ਹੋਏ ਆਪਣੇ ਸਫ਼ਰ ਦੇ ਪ੍ਰੋਗਰਾਮ ਵਿਚ ਬਦਲਾਅ ਕਰਨ ਦੀ ਸਲਾਹ ਦਿੱਤੀ ਹੈ। ਬ੍ਰਿਟਿਸ਼ ਕੋਲੰਬੀਆ ਵਿਚ ਉੱਤਰ ਦੇ ਅੰਦਰੂਨੀ ਹਿੱਸਿਆਂ ਵਿਚ ਕ੍ਰਿਸਮਸ ਵਾਲੇ ਦਿਨ ਦੁਪਹਿਰ ਤੱਕ ਤਾਪਮਾਨ ਮਾਈਨਸ 45 ਡਿਗਰੀ ਤੱਕ ਡਿੱਗਣ ਦੀ ਸੰਭਾਵਨਾ ਜਤਾਈ ਗਈ ਹੈ।

ਉਥੇ ਹੀ ਪਿਛਲੇ ਕਈ ਦਿਨਾਂ ਤੋਂ ਬਹੁਤ ਜ਼ਿਆਦਾ ਠੰਢ ਵਿਚ ਜਕੜੇ ਯੂਕੋਨ ਵਿਚ ਤਾਪਮਾਨ ਮਾਈਨਸ 45 ਤੋਂ ਮਾਈਨਸ 55 ਡਿਗਰੀ ਤੱਕ ਡਿੱਗਣ ਦੀ ਸੰਭਾਵਨਾ ਹੈ। ਹਾਲਾਂਕਿ, ਇਨਵਾਇਰਮੈਂਟ ਕੈਨੇਡਾ ਦਾ ਕਹਿਣਾ ਹੈ ਯੂਕੋਨ ਵਿਚ ਵੀਕੈਂਡ ਤੱਕ ਤਾਪਮਾਨ ਵਿਚ 10 ਤੋਂ 20 ਡਿਗਰੀ ਦਾ ਸੁਧਾਰ ਹੋ ਸਕਦਾ ਹੈ, ਜਿਸ ਨਾਲ ਪਾਰਾ ਮਾਈਨਸ 50 ਦੇ ਪੱਧਰ ਤੋਂ ਨਿਕਲ ਕੇ ਮਾਈਨਸ 35 ਜਾਂ ਮਾਈਨਸ 40 ਦੇ ਆਸ-ਪਾਸ ਆ ਸਕਦਾ ਹੈ।