ਵੈਸਟਜੈਟ ਨੇ ਲੇਬਰ ਮੰਤਰੀ ਤੋਂ ਲੇਆਫਸ 'ਚ ਅੜਿੱਕੇ ਪੇਸ਼ ਕਰਦੇ ਨਿਯਮਾਂ 'ਚ ਛੋਟ ਦੀ ਕੀਤੀ ਮੰਗ

ਵੈਸਟਜੈਟ ਏਅਰਲਾਈਨਜ਼ ਨੇ ਆਖਿਆ ਹੈ ਕਿ ਉਨ੍ਹਾਂ ਵੱਲੋਂ ਫੈਡਰਲ ਲੇਬਰ ਮੰਤਰੀ ਤੋਂ ਕੈਨੇਡਾ ਲੇਬਰ ਕੋਡ (Canada Labour Code) ਦੇ ਨਿਯਮਾਂ 'ਚ ਢਿੱਲ ਦੇਣ ਦੀ ਮੰਗ ਕੀਤੀ ਗਈ ਹੈ।

ਅਜਿਹਾ ਗਰੁੱਪ ਟਰਮੀਨੇਸ਼ਨਜ਼ (group terminations) ਨੂੰ ਅੰਜਾਮ ਦੇਣ ਲਈ ਆਖਿਆ ਗਿਆ ਹੈ।

ਕੰਪਨੀ ਨੇ ਇੱਕ ਈਮੇਲ 'ਚ ਆਖਿਆ ਕਿ ਨਿਯਮਾਂ ਤੋਂ ਛੋਟ ਦੇ ਆਸਰੇ ਉਨ੍ਹਾਂ ਨੂੰ ਸਮੇਂ ਸਿਰ ਫੈਸਲੇ ਲੈਣ 'ਚ ਆਸਾਨੀ ਹੋਵੇਗੀ।

ਕੰਪਨੀ ਦਾ ਕਹਿਣਾ ਹੈ ਕਿ ਕੋਵਿਡ-19 ਕਾਰਨ ਬਣੇ ਹਾਲਾਤਾਂ ਵਿਚਾਲੇ ਟ੍ਰੈਵਲਿੰਗ ਡਿਮਾਂਡ (travelling demand) ਬੇਹੱਦ ਪ੍ਰਭਾਵਿਤ ਹੋਈ ਹੈ। ਇਸ ਸੰਬੰਧੀ ਫੈਡਰਲ ਸਰਕਾਰ ਨੂੰ ਇੱਕ ਚਿੱਠੀ ਭੇਜੀ ਗਈ ਹੈ।

ਇਹ ਚਿੱਠੀ 27 ਅਪ੍ਰੈਲ ਨੂੰ ਲੇਬਰ ਮੰਤਰੀ ਫਿਲੋਮੇਨਾ ਟੈਸੀ (Filomena Tassi) ਨੂੰ ਵਾਈਸ-ਪ੍ਰੈਜ਼ੀਡੈਂਟ ਮਾਈਕ ਪੋਰਟਰ ਵੱਲੋਂ ਭੇਜੀ ਗਈ ਸੀ।

ਉਨ੍ਹਾਂ ਚਿੱਠੀ 'ਚ ਮੰਗ ਪੇਸ਼ ਕੀਤੀ ਹੈ ਕਿ ਵੈਸਟਜੈਟ ਵੱਲੋਂ ਕੁਝ ਕਰਮਚਾਰੀਆਂ ਨੂੰ ਹਟਾਇਆ ਜਾਣਾ ਹੈ, ਪਰ ਕੁਝ ਨਿਯਮ ਅਜਿਹਾ ਕਰਨ 'ਚ ਗੰਭੀਰ ਅੜਿੱਕੇ ਪੇਸ਼ ਕਰ ਸਕਦੇ ਹਨ।

ਵੈਸਟਜੈਟ ਦੇ ਫਲਾਈਟ ਅਟੈਂਡੈਂਟਸ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਦੇ ਇੱਕ ਅਧਿਕਾਰੀ, ਕ੍ਰਿਸ ਰੌਇਨਬੁਸ਼ (Chris Rauenbusch) ਨੇ ਕਿਹਾ ਕਿ ਜੇਕਰ ਨਿਯਮਾਂ 'ਚ ਛੋਟ ਦਿੱਤੀ ਜਾਂਦੀ ਹੈ, ਤਾਂ 50 ਤੋਂ ਵਧੇਰੇ ਵਰਕਰਾਂ ਨੂੰ ਕੱਢੇ ਜਾਣ ਮੌਕੇ ਦਿੱਤਾ ਜਾਣ ਵਾਲਾ 16 ਹਫ਼ਤੇ ਦਾ ਨੋਟਿਸ ਦੇਣ ਤੋਂ ਵੀ ਛੋਟ ਮਿਲ ਜਾਵੇਗੀ, ਅਤੇ ਇਸ ਦੇ ਚਲਦਿਆਂ ਮਾਸ ਲੇਆਫਸ (mass layoffs) ਲਈ ਦਰਵਾਜ਼ੇ ਖੁੱਲ੍ਹ ਜਾਣਗੇ।

ਬੀਤੇ ਹਫ਼ਤੇ ਏਅਰ ਕੈਨੇਡਾ ਨੇ ਕਿਹਾ ਸੀ ਕਿ ਉਹ 20,000 ਦੇ ਕਰੀਬ ਕਰਮਚਾਰੀਆਂ ਨੂੰ ਲੇਆਫ ਕਰਨਗੇ। ਪਰ ਵੈਸਟਜੈਟ ਦਾ ਕਹਿਣਾ ਹੈ ਕਿ ਕਰਮਚਾਰੀਆਂ ਨੂੰ ਕੱਢਣ ਸੰਬੰਧੀ ਗਿਣਤੀ ਦਾ ਫ਼ਿਲਹਾਲ ਫੈਸਲਾ ਨਹੀਂ ਲਿਆ ਗਿਆ ਹੈ।