ਬੀ.ਸੀ. ਦੇ ਲਿਟਨ ਇਲਾਕੇ 'ਚ ਆਰਸੀਐਮਪੀ ਟ੍ਰੇਲਰ ਦਾ ਦੋ ਪਹੀਆ ਖੁੱਲ੍ਹਣ ਕਾਰਨ ਲੱਗੀ ਭਿਆਨਕ ਅੱਗ

ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਸੂਬੇ ਦੇ ਲਿਟਨ ਇਲਾਕੇ ਦੇ ਜੰਗਲੀ ਖੇਤਰ ਵਿੱਚ ਲੱਗੀ ਭਿਆਨਕ ਅੱਗ ਦਾ ਪ੍ਰਕੋਪ ਵਧਣ ਕਾਰਨ ਉੱਥੇ ਐਮਰਜੈਂਸੀ ਹਾਲਾਤਾਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ ਅਤੇ ਸਥਾਨਕ ਲੋਕਾਂ ਨੂੰ ਉਥੋਂ ਤੁਰੰਤ ਸੁਰੱਖਿਅਤ ਥਾਵਾਂ 'ਤੇ ਚਲੇ ਜਾਣ ਦੀ ਸਲਾਹ ਜਾਰੀ ਕੀਤੀ ਗਈ ਹੈ।ਤੇਜ਼ੀ ਨਾਲ ਫੈਲੀ ਇਸ ਭਿਆਨਕ ਅੱਗ 'ਤੇ ਕਾਬੂ ਪਾਉਣ ਲਈ ਸਬੰਧਿਤ ਅਧਿਕਾਰੀਆਂ ਵੱਲੋਂ ਬਚਾਅ ਕਾਰਜ ਲਗਾਤਾਰ ਜਾਰੀ ਹਨ।

ਲਿਟਨ ਦੇ ਨੌਰਥ ਵਿਚ ਅੱਗ ਬਾਰੇ ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਇਹ ਹਾਈਵੇ 12 ਦੇ ਨਾਲ ਇੱਕ ਆਰਸੀਐਮਪੀ ਟ੍ਰੇਲਰ ਦਾ ਪਹੀਆ ਖੁੱਲ੍ਹਣ ਕਾਰਨ ਅਚਾਨਕ ਘਾਹ ਤੋਂ ਸ਼ੁਰੂ ਹੋਈ, ਵੀਰਵਾਰ ਸਵੇਰ ਤੱਕ ਇਹ ਅੱਗ ਲਗਭਗ 130 ਹੈਕਟੇਅਰ ਵਿਚ ਸੀ। ਸਟਾਫ ਸਾਰਜੈਂਟ ਕ੍ਰਿਸ ਕਲਾਰਕ ਨੇ ਕਿਹਾ ਕਿ ਅਧਿਕਾਰੀ ਅੱਗ ਬੁਝਾਉਣ ਲਈ ਰੁਕੇ ਪਰ ਹਾਲਾਤ ਅਨੁਕੂਲ ਨਹੀਂ ਸਨ।

ਉੱਥੇ ਹੀ ਦੂਜੇ ਪਾਸੇ ਵੈਨਕੂਵਰ ਤੋਂ ਲਗਭਗ 150 ਕਿਲੋਮੀਟਰ ਪੂਰਬ ਵੱਲ ਹੋਪ ਨੇੜੇ ਇੱਕ ਨਵੀਂ ਜੰਗਲ ਦੀ ਅੱਗ ਭੜਕ ਗਈ ਹੈ। ਬੀਸੀ ਵਾਈਲਡਫਾਇਰ ਸਰਵਿਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਅਜੇ ਇਸ ਜੰਗਲ ਦੀ ਅੱਗ ਦਾ ਨਾਮ ਨਹੀਂ ਦਿੱਤਾ ਹੈ, ਇਹ ਬੁੱਧਵਾਰ ਨੂੰ ਸ਼ੁਰੂ ਹੋਈ ਹੈ। ਵੀਰਵਾਰ ਸਵੇਰ ਇੱਕ ਅਪਡੇਟ ਵਿਚ ਡਿਪਾਰਟਮੈਂਟ ਨੇ ਕਿਹਾ ਕਿ ਅੱਗ ਲਗਭਗ 0.6 ਹੈਕਟੇਅਰ ਫੈਲੀ ਹੈ ਅਤੇ ਇਸ ਵੇਲੇ ਕਾਬੂ ਤੋਂ ਬਾਹਰ ਹੈ।

ਵਾਈਲਫਾਇਰ ਸਰਵਿਸ ਦਾ ਮੰਨਣਾ ਹੈ ਕਿ ਸਰਪੰਟ ਬੈਕ ਟਰੇਲ ਨੇੜੇ ਲੱਗੀ ਇਹ ਅੱਗ ਕਿਸੇ ਵਲੋਂ ਲਗਾਈ ਗਈ ਹੈ। ਏਜੰਸੀ ਨੇ ਕਿਹਾ ਕਿ ਮੌਜੂਦਾ ਸਮੇਂ ਉਨ੍ਹਾਂ ਦੇ ਅੱਗ ਬਝਾਊ ਅਮਲਾ ਬੀਸੀ ਵਿਚ 70 ਤੋਂ ਵੱਧ ਥਾਵਾਂ 'ਤੇ ਜੰਗਲ ਦੀ ਅੱਗ ਨਾਲ ਨਜਿੱਠ ਰਿਹਾ ਹੈ।