ਮੈਸੀ ਦੇ ਨਾ ਆਉਣ 'ਤੇ ਪ੍ਰਸ਼ੰਸਕਾਂ ਨਾਲ ਕਲਾਸ-ਐਕਸ਼ਨ ਮੁਕੱਦਮੇ ਦਾ ਨਿਪਟਾਰਾ ਕਰੇਗਾ ਵ੍ਹਾਈਟਕੈਪਸ

ਵੈਨਕੂਵਰ ਵ੍ਹਾਈਟਕੈਪਸ ਵਿਰੁੱਧ ਮੈਚ ਵਿਚ ਪਿਛਲੇ ਸਾਲ ਲਿਓਨਲ ਮੈਸੀ ਅਤੇ ਇੰਟਰ ਮਿਆਮੀ ਦੇ ਹੋਰ ਖਿਡਾਰੀਆਂ ਦੇ ਨਾ ਖੇਡਣ ਕਾਰਨ ਨਾਰਾਜ਼ ਪ੍ਰਸ਼ੰਸਕਾਂ ਵਲੋਂ ਦਾਇਰ ਕਲਾਸ-ਐਕਸ਼ਨ ਮਕੱਦਮੇ ਵਿਚ ਵ੍ਹਾਈਟਕੈਪਸ ਕਲੱਬ ਸਮਝੌਤੇ ਲਈ ਸਹਿਮਤ ਹੋ ਗਿਆ ਹੈ। ਹਾਲਾਂਕਿ, ਇਸ ਸਮਝੌਤੇ ਨੂੰ ਅਜੇ ਅਦਾਲਤ ਤੋਂ ਮਨਜ਼ੂਰੀ ਮਿਲਣੀ ਬਾਕੀ ਹੈ ਪਰ ਇਸ ਤਜਵੀਜ਼ ਵਿਚ ਕਈ ਅਹਿਮ ਬਿੰਦੂ ਸ਼ਾਮਲ ਹਨ।

ਵ੍ਹਾਈਟਕੈਪਸ ਅਤੇ ਐਮਐਲਐਸ ਨੇ ਸਾਂਝੇ ਤੌਰ 'ਤੇ $475,000 ਚੈਰੀਟੇਬਲ ਡੋਨੇਸ਼ਨ ਦੇਣ ਅਤੇ ਟਿਕਟਾਂ ਦੀਆਂ ਸ਼ਰਤਾਂ ਨੂੰ ਅਪਡੇਟ ਕਰਨ ਦਾ ਪ੍ਰਸਤਾਵ ਦਿੱਤਾ ਹੈ, ਜਿਸ ਵਿਚ ਹੁਣ ਤੋਂ ਇਹ ਸਪੱਸ਼ਟ ਲਿਖਿਆ ਜਾਵੇਗਾ ਕਿ ਖਿਡਾਰੀਆਂ ਦੀ ਮੌਜੂਦਗੀ ਦੀ ਗਰੰਟੀ ਨਹੀਂ ਹੈ। ਕਲੱਬ ਨੇ ਕਿਹਾ ਕਿ ਇਹ ਸਮਝੌਤਾ ਸਿਰਫ਼ ਮਾਮਲੇ ਨੂੰ ਨਿਪਟਾਉਣ ਲਈ ਕੀਤਾ ਗਿਆ ਹੈ। ਜਿਹੜੇ ਪ੍ਰਸ਼ੰਸਕ ਇਸ ਤੋਂ ਖੁਸ਼ ਨਹੀਂ ਹਨ ਉਨ੍ਹਾਂ ਕੋਲ ਇਸ ਤੋਂ ਬਾਹਰ ਰਹਿਣ ਲਈ 28 ਜਨਵਰੀ ਤੱਕ ਦਾ ਸਮਾਂ ਹੈ।

ਗੌਰਤਲਬ ਹੈ ਕਿ 25 ਮਈ 2024 ਨੂੰ ਹੋਏ ਮੈਚ ਲਈ ਪ੍ਰਸ਼ੰਸਕਾਂ ਨੇ ਮੈਸੀ, ਲੁਈਸ ਸੁਆਰੇਜ਼ ਅਤੇ ਸਰਜੀਓ ਬੁਸਕੇਟਸ ਵਰਗੇ ਸਿਤਾਰਿਆਂ ਨੂੰ ਦੇਖਣ ਲਈ ਟਿਕਟਾਂ ਆਮ ਨਾਲੋਂ ਮਹਿੰਗੀਆਂ ਖ਼ਰੀਦੀਆਂ ਸਨ। ਮੈਚ ਤੋਂ ਸਿਰਫ਼ ਦੋ ਦਿਨ ਪਹਿਲਾਂ ਇੰਟਰ ਮਿਆਮੀ ਨੇ ਐਲਾਨ ਕੀਤਾ ਕਿ ਰੁਝੇਵਿਆਂ ਕਾਰਨ ਕੋਈ ਵੀ ਸਟਾਰ ਖਿਡਾਰੀ ਵੈਨਕੂਵਰ ਨਹੀਂ ਆਵੇਗਾ। ਇਸ ਤੋਂ ਨਾਰਾਜ਼ 51,000 ਤੋਂ ਵੱਧ ਪ੍ਰਸ਼ੰਸਕਾਂ ਨੇ ਸਟੇਡੀਅਮ ਵਿਚ "ਮੇਸੀ ਕਿੱਥੇ ਹੈ" ਦੇ ਨਾਅਰੇ ਲਗਾਏ ਸਨ।