ਬੀ.ਸੀ.ਵਿੱਚ ਪ੍ਰਿੰਸਟਨ ਗੋਲਫ ਕੋਰਸ ਨੇੜੇ ਲੱਗੀ ਜੰਗਲੀ ਅੱਗ,ਕਈ ਲੋਕਾਂ ਨੂੰ ਘਰ ਛੱਡਣ ਦੇ ਹੁਕਮ

ਬੀ.ਸੀ.ਦੇ ਪ੍ਰਿੰਸਟਨ ਗੋਲਫ ਕੋਰਸ ਨੇੜੇ ਜੰਗਲੀ ਅੱਗ ਕਾਰਨ ਬੀਤੇ ਦਿਨੀਂ ਲੋਕਾਂ ਲਈ ਨਿਕਾਸੀ ਦੇ ਹੁਕਮ ਜਾਰੀ ਹੋਏ ਹਨ। ਪ੍ਰਿੰਸਟਨ ਨੇੜੇ ਜੰਗਲ ਦੀ ਅੱਗ ਬੇਕਾਬੂ ਹੋਣ ਕਾਰਨ ਇਲਾਕੇ ਦੀਆਂ ਲਗਭਗ 30 ਰਿਹਾਇਸ਼ਾਂ ਨੂੰ ਖਾਲੀ ਕਰਵਾਉਣ ਦਾ ਹੁਕਮ ਦਿੱਤਾ ਗਿਆ ਹੈ।

ਬੀ.ਸੀ. ਵਾਈਲਡਫਾਇਰ ਸਰਵਿਸ ਨੇ ਕਿਹਾ ਕਿ ਅਗਸਤ ਲੇਕ ਜੰਗਲੀ ਅੱਗ ਪ੍ਰਿੰਸਟਨ ਗੋਲਫ ਕਲੱਬ ਦੇ ਨੇੜੇ ਹੈ, ਜੋ 14 ਹੈਕਟੇਅਰ ਤੱਕ ਫੈਲ ਚੁੱਕੀ ਹੈ। ਇਸ 'ਤੇ ਕਾਬੂ ਪਾਉਣ ਲਈ ਲਗਭਗ 40 ਫਾਇਰਫਾਈਟਰ ਅਤੇ ਤਿੰਨ ਹੈਲੀਕਾਪਟਰ ਮੌਕੇ 'ਤੇ ਹਨ।

ਪ੍ਰਿੰਸਟਨ ਦੇ ਮੇਅਰ ਸਪੈਂਸਰ ਕੋਇਨ ਨੇ ਕਿਹਾ ਕਿ ਉਨ੍ਹਾਂ ਸ਼ੁਰੂ ਤੋਂ ਹੀ ਅੱਗ ਦੇ ਵਧਣ ਨੂੰ ਦੇਖਿਆ ਹੈ, ਸ਼ਨੀਵਾਰ ਦੁਪਹਿਰ 2 ਵਜੇ ਦੇ ਕਰੀਬ ਜਦੋਂ ਇਹ ਸ਼ੁਰੂ ਹੋਈ ਤਾਂ ਇਹ ਇੱਕ ਕਾਰ ਦੇ ਸਾਈਜ਼ ਜਿੰਨੀ ਸੀ ਤੇ 20 ਮਿੰਟਾਂ ਵਿਚ ਹੀ ਇਹ ਦੁੱਗਣੀ ਹੋ ਗਈ।ਕੋਇਨ ਨੇ ਕਿਹਾ ਕਿ 30 ਘਰਾਂ ਨੂੰ ਖਾਲੀ ਕਰਵਾਉਣ ਦਾ ਹੁਕਮ ਲਾਗੂ ਕੀਤੇ ਗਏ, ਜਦੋਂ ਕਿ ਲਗਭਗ 40 ਘਰ ਖਾਲੀ ਕਰਵਾਉਣ ਦੀ ਚਿਤਾਵਨੀ ਹੇਠ ਹਨ,ਜਿਨ੍ਹਾਂ ਵਿਚ ਉਨ੍ਹਾਂ ਦਾ ਘਰ ਵੀ ਸ਼ਾਮਲ ਹੈ।