ਜੰਗਲੀ ਅੱਗਾਂ ਕਾਰਨ ਮੈਨੀਟੋਬਾ ਵਿੱਚ ਗਾਰਡਨ ਹਿੱਲ, ਸਨੋ ਲੇਕ ਤੋਂ ਲੋਕਾਂ ਨੂੰ ਖਾਲੀ ਕਰਨ ਦੇ ਦਿੱਤੇ ਗਏ ਹੁਕਮ

ਮੈਨੀਟੋਬਾ ਵਿਚ ਜੰਗਲੀ ਅੱਗ ਨਾਲ ਤਣਾਅ ਵੱਧ ਰਿਹਾ ਹੈ, ਇਥੇ ਗਾਰਡਨ ਹਿੱਲ ਫਸਟ ਨੇਸ਼ਨ ਨੂੰ ਵੀ ਇਸ ਖ਼ਤਰੇ ਦੀ ਲਪੇਟ ਵਿਚ ਆਉਣ ਦਾ ਖਤਰਾ ਹੈ ਜਿਸ ਦੇ ਨੇੜੇ ਲੱਗੀ ਜੰਗਲ ਦੀ ਅੱਗ ਕਾਬੂ ਤੋਂ ਬਾਹਰ ਦੱਸੀ ਜਾਂਦੀ ਹੈ। ਇਸ ਨਾਲ ਲੋਕਾਂ ਵਿਚ ਚਿੰਤਾ ਦਾ ਮਾਹੌਲ ਹੈ। ਇਥੇ ਕਰੀਬ 3,000 ਆਬਾਦੀ ਰਹਿੰਦੀ ਹੈ।

ਸੂਬਾ ਸਰਕਾਰ ਮੁਤਾਬਕ, ਕਮਿਊਨਿਟੀ ਕੋਲ ਬੁੱਧਵਾਰ ਦੁਪਹਿਰ ਤੱਕ ਲਗਭਗ 52 ਹੈਕਟੇਅਰ ਤੱਕ ਅੱਗ ਫੈਲ ਚੁੱਕੀ ਸੀ। ਉਥੇ ਹੀ, ਸਨੋ ਲੇਕ ਟਾਊਨ ਵਿਚ ਲੋਕਾਂ ਨੂੰ ਘਰ ਖਾਲੀ ਘਰ ਦੇ ਹੁਕਮ ਦਿੱਤੇ ਗਏ ਅਤੇ ਜੂਨ ਤੋਂ ਬਾਅਦ ਇਥੇ ਅਜਿਹਾ ਦੂਜੀ ਵਾਰ ਹੈ। ਬੁੱਧਵਾਰ ਰਾਤ ਸਨੋ ਲੇਕ ਟਾਊਨ ਵਿਚ ਅਚਾਨਕ ਪੂਰੀ ਨਿਕਾਸੀ ਦੇ ਆਦੇਸ਼ ਲਾਗੂ ਕੀਤੇ ਗਏ।

ਸੂਬੇ ਦੀ ਹਾਲ ਦੀ ਵਾਈਲਡਫਾਇਰ ਅਪਡੇਟ ਅਨੁਸਾਰ, ਟਾਊਨ ਕੋਲ ਤਿੰਨ ਵੱਖ-ਵੱਖ ਥਾਵਾਂ 'ਤੇ ਅੱਗਾਂ ਲੱਗ ਹੋਈਆਂ ਹਨ ਅਤੇ ਇਹ ਸਾਰੀਆਂ ਸ਼ਹਿਰ ਦੇ 25 ਕਿਲੋਮੀਟਰ ਦੇ ਦਾਇਰੇ ਵਿਚ ਹਨ।ਮੈਨੀਟੋਬਾ ਵਿਚ ਇਸ ਸਮੇਂ 98 ਥਾਵਾਂ 'ਤੇ ਜੰਗਲੀ ਅੱਗਾਂ ਬਲ ਰਹੀਆਂ ਹਨ, ਜਦੋਂ ਕਿ ਹੁਣ ਤੱਕ ਕੁੱਲ 252 ਜੰਗਲੀ ਅੱਗ ਲੱਗਣ ਦੀਆਂ ਘਟਨਾਵਾਂ ਹੋ ਚੁੱਕੀਆਂ ਹਨ।