ਟਰੰਪ ਨੇ ਪਨਾਮਾ ਨਹਿਰ ਨੂੰ ਵਾਪਸ ਕਬਜ਼ੇ ਵਿਚ ਲੈਣ ਦੀ ਦਿੱਤੀ ਧਮਕੀ

ਅਮਰੀਕਾ ਦੇ ਨਵੇਂ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਪਨਾਮਾ ਨਹਿਰ ਨੂੰ ਵਾਪਸ ਕਬਜ਼ੇ ਵਿਚ ਲੈਣ ਦੀ ਧਮਕੀ ਦਿੱਤੀ ਹੈ। ਇਸ ਨਹਿਰ ’ਤੇ ਅਮਰੀਕਾ ਦਾ 1999 ਤੱਕ ਕੰਟਰੋਲ ਸੀ। ਟਰੰਪ ਦਾ ਇਲਜ਼ਾਮ ਹੈ ਕਿ ਪਨਾਮਾ ਇਸ ਨਹਿਰ ਦੀ ਵਰਤੋਂ ਕਰਨ ਲਈ ਅਮਰੀਕਾ ਤੋਂ ਜ਼ਿਆਦਾ ਚਾਰਜ ਲੈ ਰਿਹਾ ਹੈ ਅਤੇ ਇਸ ਨਹਿਰ ’ਤੇ ਚੀਨ ਆਪਣਾ ਪ੍ਰਭਾਵ ਵਧਾ ਰਿਹਾ ਹੈ।

ਟਰੰਪ ਨੇ ਇਹ ਟਿੱਪਣੀਆਂ ਐਤਵਾਰ ਨੂੰ ਅਰੀਜ਼ੋਨਾ ਵਿਚ ਆਪਣੇ ਸਮਰਥਕਾਂ ਨੂੰ ਸੰਬੋਧਨ ਕਰਦੇ ਕੀਤੀਆਂ, ਇਸ ਤੋਂ ਬਾਅਦ ਉਨ੍ਹਾਂ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ’ਤੇ ਏ.ਆਈ. ਜਨਰੇਟਡ ਤਸਵੀਰ ਵੀ ਪੋਸਟ ਕੀਤੀ, ਜਿਸ ਦੇ ਕੈਪਸ਼ਨ ਵਿਚ ਟਰੰਪ ਨੇ ਲਿਖਿਆ ‘ਵੈਲਕਮ ਟੂ ਦਿ ਯੂਨਾਈਟੇਡ ਸਟੇਟ ਕੈਨਲ।

ਇਸ ’ਤੇ ਪਨਾਮਾ ਦੇ ਰਾਸ਼ਟਰਪਤੀ ਜੋਸੇ ਰਾਉਲ ਮੁਲੀਨੋ ਨੇ ਪਲਟਵਾਰ ਕੀਤਾ। ਉਨ੍ਹਾਂ ਇੱਕ ਰਿਕਾਰਡ ਮੈਸੇਜ ਵਿਚ ਕਿਹਾ ਕਿ ਪਨਾਮਾ ਨਹਿਰ ਅਤੇ ਇਸ ਦੇ ਆਸਪਾਸ ਦੀ ਇੱਕ-ਇੱਕ ਇੰਚ ਜ਼ਮੀਨ ਪਨਾਮਾ ਦੀ ਹੈ ਅਤੇ ਇਹ ਭਵਿੱਖ ਵਿਚ ਵੀ ਪਨਾਮਾ ਦੀ ਹੀ ਰਹੇਗੀ।

ਗੌਰਤਲਬ ਹੈ ਕਿ 1977 ਵਿਚ ਅਮਰੀਕਾ ਅਤੇ ਪਨਾਮਾ ਵਿਚਕਾਰ ਇਕ ਸੰਧੀ ਹੋਈ ਸੀ, ਜਿਸ ਤੋਂ ਬਾਅਦ ਇਸ ਨਹਿਰ ’ਤੇ ਦੋਵਾਂ ਦੇਸ਼ਾਂ ਦਾ ਸਾਂਝਾ ਕੰਟਰੋਲ ਸੀ। ਹਾਲਾਂਕਿ ਅਮਰੀਕਾ ਨੇ 31 ਦਸੰਬਰ 1999 ਨੂੰ ਇਹ ਨਹਿਰ ਪੂਰੀ ਤਰ੍ਹਾਂ ਪਨਾਮਾ ਦੇ ਹਵਾਲੇ ਕਰ ਦਿੱਤੀ ਸੀ।