ਤੇਜ਼ ਹਵਾਵਾਂ ਕਾਰਨ ਕੈਲੀ ਲੇਕ, ਵਿਚ ਜੰਗਲੀ ਅੱਗ ਬਣ ਸਕਦੀ ਹੈ ਬੇਹੱਦ ਖਤਰਨਾਕ

ਬੀ. ਸੀ. ਵਾਈਲਡਫਾਇਰ ਸਰਵਿਸ ਦੀ ਇਨਫਾਰਮੇਸ਼ਨ ਔਫੀਸਰ ਕਾਰਲੇ ਡੇਸਰੋਜ਼ੀਅਰਜ਼ ਨੇ ਜਾਣਕਾਰੀ ਦਿੱਤੀ ਹੈ ਕਿ ਜੰਗਲੀ ਅੱਗ ਕੈਲੀ ਲੇਕ ਦੇ ਲੋਕਾਂ ਲਈ ਬਹੁਤ ਖਤਰਨਾਕ ਸਥਿਤੀ ਪੈਦਾ ਕਰ ਸਕਦੀ ਹੈ। ਇਸ ਲਈ ਲੋਕਾਂ ਨੂੰ ਧੂੰਆਂ ਅਤੇ ਅੱਗ ਦਿਖਾਈ ਦੇਣ ਤੱਕ ਦੀ ਉਡੀਕ ਨਹੀਂ ਕਰਨੀ ਚਾਹੀਦੀ ਕਿਉਂਕਿ ਤਦ ਤੱਕ ਬਾਹਰ ਨਿਕਲਣ ਦੇ ਕਈ ਰਸਤੇ ਬੰਦ ਹੋਣ ਜਾਣਗੇ। ਲੋਕਾਂ ਨੂੰ ਜਲਦੀ ਤੋਂ ਜਲਦੀ ਜ਼ਰੂਰੀ ਸਮਾਨ ਲੈ ਕੇ ਘਰ ਖਾਲੀ ਕਰਨ ਦੀ ਜ਼ਰੂਰਤ ਹੈ।

ਔਫੀਸ਼ੀਅਲਜ਼ ਮੁਤਾਬਕ ਡਾਸਨ ਕਰੀਕ ਦੇ ਸਾਊਥ ਵੱਲ ਅੱਗ ਫੈਲ ਰਹੀ ਹੈ। ਪੀਸ ਰਿਵਰ ਰੀਜਨਲ ਡਿਸਟ੍ਰਿਕਟ ਮੁਤਾਬਕ ਤੇਜ਼ ਹਵਾਵਾਂ ਕਿਸਕਾਟੀਨਾਵ ਰਿਵਰ ਵਾਈਲਡਫਾਇਰ ਨੂੰ ਕਮਿਊਨਿਟੀ ਵੱਲ ਲਿਆ ਰਹੀਆਂ ਹਨ। ਡਿਸਟ੍ਰਿਕਟ ਵਲੋਂ ਲੋਕਾਂ ਨੂੰ ਘਰ ਖਾਲੀ ਕਰਨ ਦੇ ਹੁਕਮ ਦਿੱਤੇ ਗਏ ਹਨ।

ਸੂਬੇ ਭਰ ਵਿਚ 70 ਜੰਗਲੀ ਅੱਗ ਬਲ ਰਹੀਆਂ ਹਨ ਜਿਨ੍ਹਾਂ ਵਿਚੋਂ 60 ਫੀਸਦੀ ਬੇਕਾਬੂ ਹਨ। ਦੱਸ ਦਈਏ ਕਿ ਕੈਲੀ ਲੇਕ ਸੂਬੇ ਦੇ ਨੌਰਥਈਸਟ ਵਿਚ ਡਾਸਨ ਕਰੀਕ ਤੋਂ ਕਰੀਬ 80 ਕਿਲੋਮੀਟਰ ਦੀ ਦੂਰੀ 'ਤੇ ਹੈ।