ਏਪੀ ਢਿੱਲੋਂ ਦੇ ਘਰ ਦੇ ਬਾਹਰ ਹੋਈ ਗੋਲੀਬਾਰੀ ਮਾਮਲੇ ਵਿਚ, ਵਿਨੀਪੈੱਗ ਦੇ ਅਬਜੀਤ ਨੂੰ ਨਹੀਂ ਮਿਲੀ ਜ਼ਮਾਨਤ

ਬੀ.ਸੀ. ਦੇ ਕੋਲਵੁੱਡ ਵਿਚ ਪੰਜਾਬੀ ਗਾਇਕ ਏਪੀ ਢਿੱਲੋਂ ਦੇ ਘਰ ’ਤੇ ਹੋਈ ਗੋਲੀਬਾਰੀ ਦੇ ਸਬੰਧ ਵਿਚ ਚਾਰਜਿਸ ਦਾ ਸਾਹਮਣਾ ਕਰ ਰਹੇ ਵਿਨੀਪੈੱਗ ਦੇ ਅਬਜੀਤ ਕਿੰਗਰਾ ਦੀ ਬੁੱਧਵਾਰ ਨੂੰ ਵਿਕਟੋਰੀਆ ਅਦਾਲਤ ਨੇ ਜ਼ਮਾਨਤ ਅਰਜ਼ੀ ਰੱਦ ਕਰ ਦਿੱਤੀ।

ਮਾਮਲੇ ਦੇ ਖ਼ਤਮ ਹੋਣ ਤੱਕ ਉਸ ਦੇ ਹਿਰਾਸਤ ਵਿਚ ਹੀ ਰਹਿਣ ਦੀ ਉਮੀਦ ਹੈ। ਇਸ ਮਾਮਲੇ ਵਿਚ ਵਿਕਰਮ ਸ਼ਰਮਾ ਵੀ ਸ਼ਾਮਲ ਸੀ, ਜਿਸ ਖਿਲਾਫ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤਾ ਹੋਇਆ ਹੈ। ਪੁਲਿਸ ਦਾ ਕਹਿਣਾ ਸੀ ਕਿ ਸ਼ਰਮਾ ਵੀ ਵਿਨੀਪੈੱਗ ਵਿਚ ਰਹਿ ਰਿਹਾ ਸੀ ਪਰ ਮੰਨਿਆ ਜਾਂਦਾ ਹੈ ਕਿ ਉਹ ਭਾਰਤ ਫਰਾਰ ਹੋ ਚੁੱਕਾ ਹੈ।

ਗੌਰਤਲਬ ਹੈ ਕਿ ਏਪੀ ਢਿੱਲੋਂ ਦੇ ਵੈਨਕੂਵਰ ਆਈਲੈਂਡ ਦੀ ਕੋਲਵੁੱਡ ਸਿਟੀ ਵਿਚ ਸਥਿਤ ਘਰ ’ਤੇ ਪਿਛਲੇ ਸਾਲ ਦੋ ਸਤੰਬਰ ਨੂੰ ਗੋਲੀਆਂ ਚਲਾਈਆਂ ਗਈਆਂ ਸਨ ਅਤੇ ਨਾਲ ਹੀ ਡਰਾਈਵਵੇਅ ’ਤੇ ਖੜ੍ਹੇ ਦੋ ਵਾਹਨਾਂ ਨੂੰ ਅੱਗ ਦੇ ਹਵਾਲੇ ਕਰ ਦਿੱਤਾ ਗਿਆ ਸੀ। ਵੈਸਟ ਸ਼ੋਰ ਆਰ.ਸੀ.ਐਮ.ਪੀ. ਮੁਤਾਬਕ, ਅਬਜੀਤ ਕਿੰਗਰਾ ਨੂੰ ਓਨਟਾਰੀਓ ਵਿਚ ਗ੍ਰਿਫਤਾਰ ਕੀਤਾ ਗਿਆ ਸੀ।