ਸਰੀ ਵਿੱਚ ਵਾਹਨ ਦੀ ਟੱਕਰ ਨਾਲ 45 ਸਾਲਾ ਔਰਤ ਦੀ ਹੋਈ ਮੌਤ

ਸਰੀ ਪੁਲਿਸ ਸਰਵਿਸ ਨੇ ਵ੍ਹੈਲੀ ਵਿਚ 132 ਸਟ੍ਰੀਟ ਦੇ 10400-ਬਲੌਕ ਵਿਚ ਹੋਏ ਹਾਦਸੇ ਵਿਚ ਮਾਰੀ ਗਈ ਮਹਿਲਾ ਦੀ ਉਮਰ 45 ਸਾਲ ਹੋਣ ਦੀ ਪੁਸ਼ਟੀ ਕੀਤੀ ਹੈ। ਪੁਲਿਸ ਅਨੁਸਾਰ, ਪੈਦਲ ਚੱਲ ਰਹੀ ਮਹਿਲਾ ਇੱਕ ਗੱਡੀ ਦੀ ਲਪੇਟ ਵਿਚ ਆ ਗਈ।

ਇਹ ਹਾਦਸਾ ਸਵੇਰੇ ਲਗਭਗ 7:33 ਵਜੇ ਵਾਪਰਿਆ। ਮੌਕੇ 'ਤੇ ਪਹੁੰਚੇ ਬੀ.ਸੀ. ਐਮਰਜੈਂਸੀ ਹੈਲਥ ਸਰਵਿਸ ਦੇ ਕਰਮਚਾਰੀਆਂ ਨੇ ਮਹਿਲਾ ਨੂੰ ਬਚਾਉਣ ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ ਪਰ ਉਸ ਨੇ ਜ਼ਖ਼ਮਾਂ ਦੀ ਤਾਬ ਨਾ ਸਹਾਰਦੇ ਹੋਏ ਦਮ ਤੋੜ ਦਿੱਤਾ। ਐਸ.ਪੀ.ਐਸ. ਨੇ ਕਿਹਾ ਕਿ ਗੱਡੀ ਦਾ ਡਰਾਈਵਰ ਮੌਕੇ 'ਤੇ ਹੀ ਮੌਜੂਦ ਰਿਹਾ ਅਤੇ ਉਹ ਜਾਂਚ ਵਿਚ ਪੁਲਿਸ ਦਾ ਪੂਰਾ ਸਹਿਯੋਗ ਕਰ ਰਿਹਾ ਹੈ।

ਸਰੀ ਪੁਲਿਸ ਦੀ ਕੋਲਿਜ਼ਨ ਇਨਵੈਸਟਿਗੇਸ਼ਨ ਯੂਨਿਟ ਨੇ ਮੌਕੇ ਨੂੰ ਅਟੈਂਡ ਕੀਤਾ, ਜਿਸ ਮਗਰੋਂ ਇਨਵੈਸਟੀਗੇਟਰਸ ਦਾ ਕਹਿਣਾ ਹੈ ਕਿ ਸ਼ੁਰੂਆਤੀ ਜਾਂਚ ਵਿਚ ਇੰਪੇਅਰਮੈਂਟ ਇਸ ਹਾਦਸੇ ਦਾ ਕਾਰਨ ਨਹੀਂ ਹੈ ਪਰ ਅਸਲ ਕਾਰਨਾਂ ਦਾ ਪਤਾ ਲਗਾਇਆ ਜਾ ਰਿਹਾ ਹੈ। ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ ਬੁੱਧਵਾਰ ਸ਼ਾਮ 6.30 ਵਜੇ ਦੇ ਕਰੀਬ ਵ੍ਹੈਲੀ ਬੁਲੇਵਾਰਡ ਨੇੜੇ 102 ਐਵੇਨਿਊ 'ਤੇ ਇੱਕ 81 ਸਾਲਾ ਬਜ਼ੁਰਗ ਮਹਿਲਾ ਦੀ ਗੱਡੀ ਦੀ ਲਪੇਟ ਵਿਚ ਆਉਣ ਨਾਲ ਮੌਤ ਹੋ ਗਈ ਸੀ।