19.17C Vancouver 19.17C VancouverMay 9, 2026 6:14 PM - Pervez Sandhu - Connect Newsroom
ਬੌਟਸਵਾਨਾ 'ਚ ਹੋਈ ਅਥਲੈਟਿਕਸ ਦੀ ਵਰਲਡ ਰਿਲੇ ਚੈਂਪੀਅਨਸ਼ਿਪ 'ਚ ਕੈਨੇਡਾ ਦੀ ਵਿਮੈਨ ਟੀਮ ਨੇ 4 ਗੁਣਾ 400 ਮੀਟਰ ਦੌੜ 'ਚ ਕਾਂਸੀ ਦਾ ਤਗਮਾ ਆਪਣੇ ਨਾਮ ਕੀਤਾ।
ਇਸ ਦੇ ਨਾਲ ਹੀ ਟੀਮ ਨੇ ਬੀਜਿੰਗ 'ਚ ਹੋਣ ਵਾਲੀ ਸਾਲ 2027 ਦੀ ਵਰਲਡ ਅਥਲੈਟਿਕਸ ਚੈਂਪੀਅਨਸ਼ਿਪ ਲਈ ਵੀ ਕੁਆਲੀਫਾਈ ਕਰ ਲਿਆ।
ਖਾਸ ਗੱਲ ਇਹ ਸੀ ਕਿ ਇਸ ਟੀਮ 'ਚ ਪੰਜਾਬੀ ਮੂਲ ਦੀ ਧਾਵਕ ਜਸਨੀਤ ਨਿੱਜਰ ਵੀ ਸ਼ਾਮਿਲ ਸੀ।
ਜ਼ੋ ਸ਼ੈਰਰ, ਲੌਰਨ ਗੇਲ, ਜਸਨੀਤ ਨਿੱਜਰ ਅਤੇ ਸਵਾਨਾ ਸਦਰਲੈਂਡ ਦੀ ਟੀਮ ਨੇ 3 ਮਿੰਟ 22.66 ਸੈਕਿੰਡਸ ਦੇ ਟਾਈਮਿੰਗ ਨਾਲ ਬਰੌਂਜ਼ ਮੈਡਲ ਹਾਸਿਲ ਕੀਤਾ।
ਮੈਡਲ ਜੇਤੂ ਪ੍ਰਫਾਰਮੈਂਸ ਤੋਂ ਬਾਅਦ ਜ਼ੋ ਸ਼ੈਰਰ ਦਾ ਕਹਿਣਾ ਸੀ ਕਿ ਟੀਮ ਦਾ ਟੀਚਾ ਬਿਹਤਰ ਤਰੀਕੇ ਨਾਲ ਕੰਪੀਟ ਕਰਨ ਅਤੇ ਬਾਕੀ ਟੀਮਾਂ ਨੂੰ ਜਬਰਦਸਤ ਟੱਕਰ ਦੇਣ ਦਾ ਸੀ, ਅਤੇ ਟੀਮ ਨੂੰ ਮੈਡਲ ਜਿੱਤਣ ਦਾ ਵਿਸ਼ਵਾਸ ਸੀ।
ਡੈਲਟਾ ਤੋਂ ਸਿਟੀ ਕਾਉਂਸਲਰ ਅਤੇ ਜਸਨੀਤ ਨਿੱਜਰ ਦੇ ਕੋਚ ਜੈਸੀ ਦੋਸਾਂਝ ਨੇ ਵੀ ਟੀਮ ਅਤੇ ਖਾਸ ਤੌਰ 'ਤੇ ਜਸਨੀਤ ਦੇ ਪ੍ਰਦਰਸ਼ਨ 'ਤੇ ਖੁਸ਼ੀ ਪ੍ਰਗਟਾਈ।
ਟੀਮ ਦੇ ਲਈ ਚੌਥੇ ਨੰਬਰ 'ਤੇ ਭੱਜਣ ਵਾਲੀ ਸਵਾਨਾ ਸਦਰਲੈਂਡ ਦਾ ਕਹਿਣਾ ਸੀ ਕਿ ਪਹਿਲਾਂ ਭੱਜੀਆਂ ਤਿੰਨੇ ਟੀਮ ਮੈਂਬਰਸ ਨੇ ਕਮਾਲ ਕਰ ਦਿੱਤਾ ਸੀ, ਅਤੇ ਉਹ ਜਾਣਦੀ ਸੀ ਕਿ ਹੁਣ ਆਖਿਰ ਵਿੱਚ ਮੈਡਲ ਦੀ ਜਿੰਮੇਵਾਰੀ ਉਸ 'ਤੇ ਹੈ ਅਤੇ ਉਸ ਨੇ ਆਖਰੀ ਲੈਪ ਲਈ ਪੂਰੀ ਵਾਹ ਲਗਾ ਦਿੱਤੀ।
ਇਸ ਤੋਂ ਪਹਿਲਾਂ ਟੀਮ ਨੇ ਇਸੇ ਈਵੈਂਟ ਦੀਆਂ ਹੀਟਸ ਦੌਰਾਨ 3 ਮਿੰਟ 23.52 ਸੈਕਿੰਡਸ ਦਾ ਟਾਈਮਿੰਗ ਕਲਾਕ ਕੀਤਾ ਸੀ, ਪਰ ਟੀਮ ਨੇ ਫਾਈਨਲ 'ਚ ਆਪਣੇ ਪ੍ਰਦਰਸ਼ਨ 'ਚ ਹੋਰ ਵੀ ਸੁਧਾਰ ਕਰ ਵਿਖਾਇਆ।
ਕੋਚ ਜੈਸੀ ਦੋਸਾਂਝ ਨੇ ਦੱਸਿਆ ਕਿ ਜਸਨੀਤ ਨਿੱਜਰ ਵੀ ਆਪਣੇ ਪ੍ਰਦਰਸ਼ਨ ਤੋਂ ਬੇਹੱਦ ਖੁਸ਼ ਹੈ।
