20.55C Vancouver 20.55C VancouverJul 25, 2020 8:00 PM -
ਸਿਵਲ ਕਰਮਚਾਰੀਆਂ ਨੂੰ ਕੋਵਿਡ-19 ਦੌਰਾਨ ਤਨਖਾਹ ਦੇ ਨਾਲ ਘਰ ਰਹਿਣ ਦੀ ਆਗਿਆ ਦੇਣ ਦੀ ਨੀਤੀ ਕਾਰਣ ਫ਼ੈਡਰਲ ਸਰਕਾਰ ਨੂੰ ਇਸ ਸਾਲ ਅਜੇ ਤੱਕ ਉਤਪਾਦਕਤਾ ਵਿੱਚ ਘੱਟੋ-ਘੱਟ $439 ਮਿਲੀਅਨ ਦਾ ਘਾਟਾ ਪੈ ਚੁੱਕਾ ਹੈ।
ਪਾਰਲੀਮੈਂਟਰੀ ਬੱਜਟ ਅਫ਼ਸਰ ਦੀ ਰੀਪੋਰਟ ਮੁਤਾਬਕ, ਇਸ ਘਾਟੇ ਦਾ ਜ਼ਿਆਦਾਤਰ ਹਿੱਸਾ 15 ਮਾਰਚ ਤੋਂ 31 ਮਈ ਦੇ ਵਿਚਕਾਰ, ਕੈਨੇਡਾ ਰੈਵੀਨਿਊ ਏਜੰਸੀ ਦੇ ਉਹਨਾਂ ਕਰਮਚਾਰੀਆਂ ਦੇ ਘਰ ਰਹਿਣ ਦਾ ਨਤੀਜਾ ਸੀ, ਜੋ ਕੰਮ ਕਰਨ ਦੇ ਅਯੋਗ ਸਨ।
ਸਿਰਫ਼ ਇਸ ਇੱਕ ਡਿਪਾਰਟਮੇਂਟ ਵੱਲੋਂ ਆਪਣੇ ਕਰਮਚਾਰੀਆਂ ਨੂੰ ਤਨਖਾਹ ਸਮੇਤ ਛੁੱਟੀਆਂ ਦੇਣ ਕਾਰਣ $311 ਮਿਲੀਅਨ ਦਾ ਨੁਕਸਾਨ ਹੋਇਆ। $33.8 ਮਿਲੀਅਨ ਦੇ ਘਾਟੇ ਨਾਲ ਕਰੈਕਸ਼ਨਲ ਸਰਵਿਸਿਜ਼ ਕੈਨੇਡਾ ਦੂਸਰੇ ਸਥਾਨ 'ਤੇ ਹੈ।
ਰਿਪੋਰਟ ਮੁਤਾਬਕ ਕੈਨੇਡਾ ਰੈਵੀਨਿਊ ਏਜੰਸੀ ਨੇ ਬਜਟ ਨਿਗਰਾਨ ਨੂੰ ਦੱਸਿਆ ਕਿ ਕੰਮ 'ਤੇ ਸੀਮਾਵਾਂ ਛੁੱਟੀ ਲੈਣ ਦਾ ਸਭ ਤੋਂ ਆਮ ਕਾਰਨ ਸੀ।
ਪੀ.ਬੀ.ਓ. ਦੀ ਇਹ ਰਿਪੋਰਟ ਐਡਮਿੰਟਨ ਕੰਜ਼ਰਵੇਟਿਵ ਐਮ.ਪੀ. ਕੈਲੀ ਮੈਕਾਲੇ ਦੀ ਬੇਨਤੀ 'ਤੇ ਤਿਆਰ ਕੀਤੀ ਗਈ ਸੀ, ਜੋ ਨੀਤੀ (ਜਿਸਨੂੰ ਪੇਅ ਕੋਡ 699 ਵਜੋਂ ਜਾਣਿਆ ਜਾਂਦਾ ਹੈ) ਦੇ ਵਿੱਤੀ ਪ੍ਰਭਾਵ ਨੂੰ ਜਾਣਨਾ ਚਾਹੁੰਦੇ ਸਨ।
ਇਹ ਨੀਤੀ ਫ਼ੈਡਰਲ ਕਰਮਚਾਰੀਆਂ ਨੂੰ ਸੰਕਟਕਾਲਾਂ ਦੌਰਾਨ ਤਨਖਾਹ-ਸਮੇਤ ਛੁੱਟੀ ਦਿੰਦੀ ਹੈ ਜਿਵੇਂ ਕਿ ਕੋਵਿਡ-19 ਨਾਲ ਬਿਮਾਰ ਹੋਣਾ, ਕੁਆਰਟੀਨਾਈਨ ਕਰਨਾ, ਉਸ ਤਕਨਾਲਜੀ ਤੱਕ ਪਹੁੰਚ ਕਰਨ ਦੇ ਯੋਗ ਨਾ ਹੋਣਾ ਜਿਸਦੀ ਉਹਨਾਂ ਨੂੰ ਆਪਣੇ ਕੰਮ ਨੂੰ ਪੂਰਾ ਕਰਨ ਅਤੇ ਨਿਰਭਰਾਂ ਦੀ ਦੇਖਭਾਲ ਕਰਨ ਲਈ ਲੋੜ ਹੈ।
