News

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਦੀ ਯੂ.ਸੀ.ਪੀ.ਸਰਕਾਰ ਨੇ ਬੁੱਧਵਾਰ ਵਿਧਾਨ ਸਭਾ ਵਿੱਚ ਇੱਕ ਨਵਾਂ ਬਿੱਲ ਪੇਸ਼ ਕੀਤਾ,ਜਿਸ ਦਾ ਮਕਸਦ ਸੂਬੇ ਵਿੱਚ 'ਮੈਡੀਕਲ ਅਸਿਸਟੈਂਸ ਇਨ ਡਾਈਂਗ' (MAID) ਦੀ ਚੋਣ ਕਰਨ ਵਾਲੇ ਨਿਯਮਾਂ ਨੂੰ ਕਾਫ਼ੀ ਸੀਮਤ ਕਰਨਾ ਹੈ। ਹੁਣ MAID ਦੀ ਸਹੂਲਤ ਸਿਰਫ਼ ਉਨ੍ਹਾਂ ਲੋਕਾਂ ਨੂੰ ਮਿਲੇਗੀ ਜਿਨ੍ਹਾਂ ਦੀ ਮੌਤ ਇੱਕ ਸਾਲ ਦੇ ਅੰਦਰ ਕੁਦਰਤੀ ਕਾਰਨਾਂ ਨਾਲ ਹੋਣ ਦੀ ਪੂਰੀ ਸੰਭਾਵਨਾ ਹੈ। ਨਵੇਂ ਨਿਯਮਾਂ ਤਹਿਤ ਸਿਰਫ਼ ਮਾਨਸਿਕ ਬਿਮਾਰੀ ਦੇ ਆਧਾਰ 'ਤੇ ਇੱਛਾ ਮੌਤ ਲੈਣ 'ਤੇ ਪੂਰੀ ਪਾਬੰਦੀ ਲਗਾਈ ਗਈ ਹੈ।

ਬੀ.ਸੀ. ਹਾਈਵੇਅ ਪੈਟਰੋਲ ਨੇ ਐਬਟਸਫੋਰਡ ਦੇ ਇੱਕ 16 ਸਾਲਾ ਕਲਾਸ 7 ਲਰਨਰ ਡਰਾਈਵਰ ਦਾ ਲਾਇਸੈਂਸ 12 ਮਹੀਨਿਆਂ ਲਈ ਸਸਪੈਂਡ ਕੀਤਾ ਹੈ। ਪੁਲਿਸ ਮੁਤਾਬਕ, 21 ਜੁਲਾਈ 2025 ਨੂੰ ਪੌਪਕਮ ਨੇੜੇ ਟਰਾਂਸ ਕੈਨੇਡਾ ਹਾਈਵੇਅ 'ਤੇ ਇਸ ਨੌਜਵਾਨ ਵਲੋਂ ਆਪਣੇ ਮਤਰੇਈ ਮਾਂ ਦੀ ਬੀ.ਐਮ.ਡਬਲਿਊ ਕਾਰ 100 ਦੀ ਲਿਮਟ ਵਾਲੇ ਜ਼ੋਨ ਵਿਚ 180 ਕਿਲੋਮੀਟਰ ਪ੍ਰਤੀ ਘੰਟ ਦੀ ਰਫ਼ਤਾਰ ਨਾਲ ਦੌੜਾਈ ਗਈ ਸੀ। ਜਦੋਂ ਪੁਲਿਸ ਨੇ ਰੋਕਣ ਦਾ ਇਸ਼ਾਰਾ ਕੀਤਾ ਤਾਂ ਉਸ ਨੇ ਗੱਡੀ ਰੋਕਣ ਦੀ ਬਜਾਏ ਭਜਾ ਲਈ ਅਤੇ ਹਾਈਵੇਅ ਤੋਂ ਬਾਹਰ ਨਿਕਲਦੇ ਸਮੇਂ ਗੱਡੀ ਇੱਕ ਡੰਪ ਟਰੱਕ ਵਿਚ ਮਾਰ ਦਿੱਤੀ, ਜਿਸ ਤੋਂ ਬਾਅਦ ਉਸ ਵਿਚ ਸਵਾਰ ਸਾਰੇ ਟੀਨੇਜ ਨੇ ਮੌਕੇ ਤੋਂ ਭੱਜਣ ਦੀ ਕੋਸ਼ਿਸ਼ ਵੀ ਕੀਤੀ।

ਐਡਮਿੰਟਨ ਦੇ ਲੇਡੁਕ ਨੇੜੇ 22 ਸਾਲਾ ਸਿੱਖ ਨੌਜਵਾਨ ਬੀਰਇੰਦਰ ਸਿੰਘ ਦੇ ਹੋਏ ਕਤਲ ਦੇ ਮਾਮਲੇ ਵਿਚ ਵਰਲਡ ਸਿੱਖ ਆਰਗਨਾਈਜ਼ੇਸ਼ਨ ਔਫ ਕੈਨੇਡਾ ਨੇ ਇਸ ਦੀ ਜਾਂਚ ਸੰਭਾਵਿਤ ਹੇਟ ਕ੍ਰਾਈਮ ਦੇ ਪਹਿਲੂ ਤੋਂ ਕੀਤੇ ਜਾਣ ਦੀ ਮੰਗ ਕੀਤੀ ਹੈ। ਡਬਲਿਊ.ਐਸ.ਓ. ਦੇ ਪ੍ਰਧਾਨ ਦਾਨਿਸ਼ ਸਿੰਘ ਨੇ ਕਿਹਾ ਕਿ ਕੈਨੇਡਾ ਵਿਚ ਸਿੱਖਾਂ ਵਿਰੁੱਧ ਵੱਧ ਰਹੀ ਨਫ਼ਰਤ ਅਤੇ ਜ਼ਹਿਰੀਲੇ ਪ੍ਰਚਾਰ ਦੇ ਮੱਦੇਨਜ਼ਰ ਇਹ ਜਾਂਚ ਬਹੁਤ ਜ਼ਰੂਰੀ ਹੈ।

ਕੈਨੇਡਾ ਨੇ ਸਾਲ 2025 ਦੌਰਾਨ ਆਬਾਦੀ ਵਿਚ ਲਗਭਗ 102,000 ਲੋਕਾਂ ਦੀ ਕਮੀ ਦਰਜ ਕੀਤੀ ਹੈ, ਇਹ 1940 ਦੇ ਦਹਾਕੇ ਤੋਂ ਬਾਅਦ ਪਹਿਲੀ ਵਾਰ ਹੈ ਜਦੋਂ ਸਾਲਾਨਾ ਆਧਾਰ 'ਤੇ ਆਬਾਦੀ ਵਧਣ ਦੀ ਬਜਾਏ ਘਟੀ ਹੈ। ਇਸ ਗਿਰਾਵਟ ਦਾ ਮੁੱਖ ਕਾਰਨ ਅਸਥਾਈ ਨਿਵਾਸੀਆਂ ਦੀ ਗਿਣਤੀ ਵਿਚ ਆਈ ਭਾਰੀ ਕਮੀ ਹੈ। ਫੈਡਰਲ ਸਰਕਾਰ ਵੱਲੋਂ 2024 ਅਤੇ 2025 ਵਿਚ ਲਏ ਗਏ ਸਖ਼ਤ ਫੈਸਲਿਆਂ ਕਾਰਨ ਵੱਡੀ ਗਿਣਤੀ ਵਿਚ ਲੋਕ ਦੇਸ਼ ਛੱਡ ਕੇ ਗਏ ਹਨ।

ਮਾਂਟਰੀਅਲ ਵਿਚ ਤਿੰਨ ਸਾਲ ਪਹਿਲਾਂ ਇੱਕ ਬਿਲਡਿੰਗ ਵਿਚ ਅੱਗ ਲੱਗਣ ਕਾਰਨ 4 ਲੜਕੀਆਂ ਸਮੇਤ 7 ਲੋਕਾਂ ਦੀ ਹੋਈ ਮੌਤ ਦੇ ਸਬੰਧ ਵਿਚ ਪੁਲਿਸ ਨੇ ਇਸ ਇਮਾਰਤ ਦੇ ਮਾਲਕ ਨੂੰ ਕਤਲ ਦੇ ਸੱਤ ਦੇ ਦੋਸ਼ਾਂ ਨਾਲ ਚਾਰਜ ਕੀਤਾ ਹੈ। ਮ੍ਰਿਤਕਾਂ ਦੀ ਉਮਰ 18 ਤੋਂ 76 ਸਾਲ ਸੀ।