News

ਬਰਨਬੀ ਪੁਲਿਸ ਨੇ ਇੱਕ ਇਲਾਕੇ ਵਿਚ ਸੇਮ ਲੋਕੇਸ਼ਨ 'ਤੇ ਹੋਈ ਡਕੈਤੀ ਦੀਆਂ ਦੋ ਘਟਨਾਵਾਂ ਦੀ ਦੋ ਸਾਲਾਂ ਦੀ ਜਾਂਚ ਮਗਰੋਂ ਦੋ ਲੋਕਾਂ ਨੂੰ ਚਾਰਜ ਕੀਤਾ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ 29 ਜਨਵਰੀ 2023 ਨੂੰ ਉਨ੍ਹਾਂ ਨੂੰ ਹੋਲਡਮ ਐਵੇਨਿਊ ਨੇੜੇ ਹੇਸਟਿੰਗਜ਼ ਸਟ੍ਰੀਟ 'ਤੇ ਇੱਕ ਸੁਵਿਧਾ ਸਟੋਰ ਵਿਚ ਡਕੈਤੀ ਦੀ ਰਿਪੋਰਟ ਮਿਲੀ, ਪੁਲਿਸ ਨੂੰ ਦੱਸਿਆ ਗਿਆ ਕਿ ਦੋ ਸ਼ੱਕੀਆਂ ਨੇ ਸਟੋਰ ਵਿਚ ਪ੍ਰਵੇਸ਼ ਕੀਤਾ ਅਤੇ ਪੀੜਤ ਨੂੰ ਬੰਨ੍ਹ ਦਿੱਤਾ, ਜਿਸ ਤੋਂ ਬਾਅਦ ਉਹ ਕੈਸ਼ ਅਤੇ ਸਿਗਰੇਟ ਲੈ ਕੇ ਫਰਾਰ ਹੋ ਗਏ।

ਸਰੀ ਦੇ ਪੈਨੋਰਮਾ ਰਿਜ ਇਲਾਕੇ ਵਿਚ ਇੱਕ ਘਰ 'ਤੇ ਹੋਈ ਗੋਲੀਬਾਰੀ ਵਿਚ ਫਿਰੌਤੀ ਦੇ ਲਿੰਕ ਦਾ ਖੁਲਾਸਾ ਹੋਣ ਮਗਰੋਂ ਬੀਸੀ ਕੰਜ਼ਰਵੇਟਿਵ ਪਾਰਟੀ ਦੇ ਵਿਧਾਇਕਾਂ ਨੇ ਸਰਕਾਰ ਤੋਂ ਇਸ ਮਾਮਲੇ ਵਿਚ ਤਤਕਾਲ ਐਕਸ਼ਨ ਦੀ ਮੰਗ ਕੀਤੀ ਹੈ।ਕੰਜ਼ਰਵੇਟਿਵ ਦੇ ਅਟਾਰਨੀ ਜਨਰਲ ਆਲੋਚਕ ਸਟੀਵ ਕੂਨਰ ਨੇ ਕਿਹਾ ਕਿ ਇਹ ਮਾਮਲਾ ਕਾਫੀ ਗੰਭੀਰ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਰਾਸ਼ਟਰਪਤੀ ਟਰੰਪ ਵਲੋਂ ਸਟੀਲ ਅਤੇ ਐਲੂਮੀਨੀਅਮ 'ਤੇ ਟੈਰਿਫ 50 ਫੀਸਦੀ ਕੀਤੇ ਜਾਣ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਪੂਰੀ ਤਰ੍ਹਾਂ ਵਪਾਰ ਨਿਯਮਾਂ ਦੇ ਉਲਟ ਅਤੇ ਨਾਜਾਇਜ਼ ਹੈ।

ਆਸਟ੍ਰੇਲੀਆ ਵਿਚ ਜਾਂਚ ਏਜੰਸੀਆਂ ਨੇ ਦੋ ਕੈਨੇਡੀਅਨਾਂ ਸਮੇਤ 7 ਲੋਕਾਂ ਨੂੰ ਨਸ਼ਾ ਤਸਕਰੀ ਦੇ ਮਾਮਲੇ ਵਿਚ ਗ੍ਰਿਫਤਾਰ ਕੀਤਾ ਹੈ। ਦੋਸ਼ ਹੈ ਕਿ ਇਹ ਗਿਰੋਹ ਕੋਕੀਨ, ਮੈਥਾਮਫੇਟਾਮਾਈਨ ਵਰਗੇ ਨਸ਼ਿਆਂ ਦੀ ਤਸਕਰੀ ਵਿਚ ਮਦਦ ਲਈ ਆਸਟ੍ਰੇਲੀਆ ਵਿਚ ਭਰੋਸੇਯੋਗ ਲੋਕਾਂ ਦਾ ਇਸਤੇਮਾਲ ਕਰ ਰਿਹਾ ਸੀ।

ਭਾਰਤ ਵਿਚ ਕੱਲ੍ਹ ਹੋਏ ਆਈ.ਪੀ.ਐਲ. ਵਿਚ ਰੌਇਲ ਚੈਲੇਂਜਰਜ਼ ਬੈਂਗਲੁਰੂ ਦੀ ਹੋਈ ਜਿੱਤ ਤੋਂ ਬਾਅਦ ਅੱਜ ਬੈਂਗਲੁਰੂ ਵਿਚ ਟੀਮ ਦੀ ਵਿਕਟਰੀ ਪਰੇਡ ਦੌਰਾਨ ਭਗਦੜ ਮਚ ਗਈ। ਇਸ ਵਿਚ ਹੁਣ ਤੱਕ 11 ਲੋਕਾਂ ਦੀ ਮੌਤ ਅਤੇ 33 ਲੋਕ ਜ਼ਖ਼ਮੀ ਹੋ ਗਏ ਹਨ।

ਕੈਨੇਡਾ ਦੀ ਜੌਬਸ ਅਤੇ ਫੈਮਿਲੀ ਮਿਨਿਸਟਰ ਪੈਟੀ ਹਾਜਦੂ ਨੇ ਕੈਨੇਡਾ ਪੋਸਟ ਅਤੇ ਡਾਕ ਕਰਮਚਾਰੀਆਂ ਦੀ ਨੁਮਾਇੰਦਗੀ ਕਰਦੀ ਯੂਨੀਅਨ ਨੂੰ ਫੈਡਰਲ ਵਿਚੋਲਗੀ ਦੀ ਮਦਦ ਨਾਲ ਸੌਦੇਬਾਜ਼ੀ ਦੀ ਮੇਜ਼ 'ਤੇ ਵਾਪਸ ਜਾਣ ਦੇ ਹੁਕਮ ਦਿੱਤੇ ਹਨ। ਮਿਨਿਸਟਰ ਨੇ ਕਿਹਾ ਕਿ ਕਿਸੇ ਵੀ ਧਿਰ ਲਈ ਸਮਝੌਤੇ 'ਤੇ ਪਹੁੰਚਣ ਵਾਸਤੇ ਆਰਬਿਟਰੇਸ਼ਨ ਪਸੰਦੀਦਾ ਰਸਤਾ ਨਹੀਂ ਹੈ, ਇਸ ਲਈ ਗੱਲਬਾਤ ਦੇ ਯਤਨ ਜਾਰੀ ਰਹਿਣੇ ਚਾਹੀਦੇ ਹਨ।

ਪ੍ਰੀਮੀਅਰ ਡੇਵਿਡ ਈਬੀ ਨੇ ਕਿਹਾ ਹੈ ਕਿ ਉਹ ਬੀਸੀ ਵਿਚੋਂ ਨਵੀਂ ਤੇਲ ਪਾਈਪਲਾਈਨ ਨਹੀਂ ਲੰਘਣ ਦੇਣਗੇ। ਈਬੀ ਨੇ ਕਿਹਾ ਕਿ ਉਨ੍ਹਾਂ ਦਾ ਇਸ ਸਬੰਧੀ ਵਿਚਾਰ ਨਹੀਂ ਬਦਲਣ ਵਾਲਾ, ਇਸ ਟਿੱਪਣੀ ਨਾਲ ਉਨ੍ਹਾਂ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦੇ ਉਸ ਸੁਝਾਅ ਨੂੰ ਖਾਰਜ ਕਰ ਦਿੱਤਾ, ਜਿਸ ਵਿਚ ਫੋਰਡ ਨੇ ਕਿਹਾ ਸੀ ਕਿ ਈਬੀ ਨਵੀਂ ਤੇਲ ਪਾਈਪਲਾਈਨ ਲਈ ਆਪਣਾ ਵਿਚਾਰ ਬਦਲਣਗੇ।

ਉੱਤਰ-ਪੂਰਬ ਬੀ.ਸੀ. ਦੇ ਕਿਸਕਾਟੀਨਾਵ ਰਿਵਰ ਇਲਾਕੇ ਵਿਚ ਜੰਗਲੀ ਅੱਗ ਫੈਲਣ ਕਾਰਨ ਨਿਕਾਸੀ ਦੇ ਨਵੇਂ ਹੁਕਮ ਜਾਰੀ ਕੀਤੇ ਗਏ ਹਨ। e ਪੀਸ ਰਿਵਰ ਰੀਜਨਲ ਡਿਸਟ੍ਰਿਕਟ ਨੇ ਅਲਰਟ ਕਰਦਿਆਂ ਦੱਸਿਆ ਕਿ ਆਉਣ ਵਾਲੇ ਦਿਨਾਂ ਵਿਚ ਅੱਗ ਦਾ ਖਤਰਾ ਹੋਰ ਵਧਣ ਵਾਲਾ ਹੈ। ਡਿਸਟ੍ਰਿਕਟ ਨੇ ਬੀਤੀ ਰਾਤ ਘਰ ਖਾਲੀ ਕਰਨ ਲਈ ਚੌਥਾ ਹੁਕਮ ਜਾਰੀ ਕੀਤਾ। ਖੁਸ਼ਕ, ਗਰਮ ਅਤੇ ਤੇ਼ਜ਼ ਹਵਾਵਾਂ ਕਾਰਨ ਅੱਗ ਹੋਰ ਭੜਕ ਰਹੀ ਹੈ। ਮੌਸਮ ਏਜੰਸੀ ਮੁਤਾਬਕ ਵੀਰਵਾਰ ਨੂੰ 50 ਕਿਲੋ ਮੀਟਰ ਪ੍ਰਤੀ ਘੰਟੇ ਅਤੇ ਸ਼ੁੱਕਰਵਾਰ ਨੂੰ 60 ਕਿਲੋ ਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਹਵਾਵਾਂ ਚੱਲਣਗੀਆਂ,ਜੋ ਕੈਲੀ ਲੇਕ ਅਤੇ ਐਲਬਰਟਾ ਦੀ ਸਰਹੱਦ ਵੱਲ ਅੱਗ ਨੂੰ ਲੈ ਜਾ ਸਕਦੀਆਂ ਹਨ। ਮੰਗਲਵਾਰ ਤੱਕ ਸੂਬੇ ਵਿਚ 70 ਜੰਗਲੀ ਅੱਗ ਬਲ ਰਹੀਆਂ ਸਨ, ਜਿਨ੍ਹਾਂ ਵਿਚੋਂ ਅੱਧੀਆਂ ਬੇਕਾਬੂ ਹਨ।

ਕੈਨੇਡਾ-ਅਮਰੀਕਾ ਨਾਲ ਟਰੇਡ ਵਾਰ ਵਿਚਕਾਰ ਚੀਨ ਨਾਲ ਸੰਪਰਕ ਸਾਧ ਰਿਹਾ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਸਰਕਾਰ ਕੈਨੇਡੀਅਨ ਖੇਤੀਬਾੜੀ ਅਤੇ ਸੀ ਫੂਡ ਉਤਪਾਦ 'ਤੇ ਚੀਨੀ ਟੈਰਿਫ ਨੂੰ ਹਟਾਉਣ ਲਈ ਚੀਨ ਦੇ ਅਧਿਕਾਰੀਆਂ ਨਾਲ ਮੰਤਰੀ ਪੱਧਰ 'ਤੇ ਗੱਲ ਕਰ ਰਹੀ ਹੈ ਅਤੇ ਇਹ ਮੁੱਦਾ ਫੈਡਰਲ ਸਰਕਾਰ ਲਈ ਸਭ ਤੋਂ ਵੱਧ ਤਰਜੀਹ ਹੈ।