12.61C Vancouver 12.61C VancouverNov 3, 2025 7:38 PM - Connect Newsroom - Pervez Sandhu
ਬੀ.ਸੀ. ਕੋਰੋਨਰਸ ਸਰਵਿਸ ਵੱਲੋਂ ਸਿਤੰਬਰ ਮਹੀਨੇ ਦੇ ਸੂਬੇ ਵਿੱਚ ਅਨਰੈਗੂਲੇਟਿਡ ਡਰੱਗਸ ਕਾਰਨ ਹੋਈਆਂ ਮੌਤਾਂ ਦੀ ਗਿਣਤੀ ਸੰਬੰਧੀ ਅੰਕੜੇ ਸਾਂਝੇ ਕੀਤੇ ਗਏ ਹਨ।
ਸਿਤੰਬਰ 'ਚ 158 ਲੋਕਾਂ ਨੇ ਜਹਿਰੀਲੇ ਡਰੱਗਸ ਕਾਰਨ ਜਾਨ ਗਵਾ ਦਿੱਤੀ। ਜੁਲਾਈ ਅਤੇ ਅਗਸਤ ਦੇ ਮੁਕਾਬਲੇ ਸਿਤੰਬਰ 'ਚ ਅਜਿਹੀਆਂ ਡਰੱਗਸ ਸੰਬੰਧੀ ਮੌਤਾਂ ਦੀ ਗਿਣਤੀ ਉੱਤੇ ਗਈ ਹੈ।
ਜੁਲਾਈ 'ਚ ਅਨਰੈਗੂਲੇਟਿਡ ਡਰੱਗਸ ਸੰਬੰਧੀ ਮੌਤਾਂ ਦੀ ਗਿਣਤੀ 153 ਅਤੇ ਅਗਸਤ 'ਚ ਇਹ ਗਿਣਤੀ 149 ਦੱਸੀ ਗਈ ਸੀ।
ਹੁਣ ਤੱਕ ਸਾਲ 2025 'ਚ ਅਜਿਹੀਆਂ ਮੌਤਾਂ ਦੀ ਗਿਣਤੀ ਕੁੱਲ 1,384 ਤੱਕ ਪਹੁੰਚ ਗਈ ਹੈ।
ਸਿਰਫ ਸਿਤੰਬਰ ਮਹੀਨੇ 'ਚ ਹੀ ਔਸਤ ਅਨੁਸਾਰ ਹਰ ਰੋਜ਼ 5 ਤੋਂ ਵਧ ਲੋਕਾਂ ਨੇ ਅਜਿਹੇ ਡਰੱਗਸ ਦੀ ਵਰਤੋਂ ਕਾਰਨ ਜਾਨ ਗਵਾ ਦਿੱਤੀ।
ਅੰਕੜੇ ਦਰਸਾਉਂਦੇ ਹਨ ਕਿ ਬੀਤੇ ਕੁਝ ਸਾਲਾਂ ਵਾਂਗ ਇਸ ਸਾਲ ਵੀ 30 ਤੋਂ 59 ਸਾਲ ਦੇ ਦਰਮਿਆਨ ਦੀ ਉਮਰ ਵਾਲੇ ਲੋਕ ਵਧੇਰੀ ਗਿਣਤੀ 'ਚ ਜਹਿਰੀਲੇ ਡਰੱਗਸ ਦੀ ਭੇਂਟ ਚੜ੍ਹੇ ਹਨ।
ਇੱਕ ਪਾਸੇ ਜਿੱਥੇ ਕੁੱਲ ਮੌਤਾਂ 'ਚ ਇਸ ਉਮਰ ਵਰਗ ਦੇ ਲੋਕਾਂ ਦੀ ਮੌਤਾਂ ਦੀ ਗਿਣਤੀ 69% ਹੈ, ਉੱਥੇ ਹੀ ਇਸ 'ਚ 78% ਮੌਤਾਂ ਪੁਰਸ਼ਾਂ ਸੰਬੰਧੀ ਦੱਸੀਆਂ ਗਈਆਂ ਹਨ।
ਇਸ ਸਾਲ ਹੁਣ ਤੱਕ ਵੈਨਕੂਵਰ 'ਚ ਇਸ ਪ੍ਰਕਾਰ ਦੀਆਂ ਮੌਤਾਂ ਦੀ ਗਿਣਤੀ 314, ਸਰੀ 'ਚ 137 ਅਤੇ ਗ੍ਰੇਟਰ ਵਿਕਟੋਰੀਆ 'ਚ ਇਹ ਗਿਣਤੀ 93 ਤੱਕ ਪਹੁੰਚ ਗਈ ਹੈ।
ਸਾਲ 2025 'ਚ ਅਨਰੈਗੂਲੇਟਿਡ ਟੌਕਸਿਕ ਡਰੱਗਸ ਕਾਰਨ 18 ਸਾਲ ਅਤੇ ਉਸ ਤੋਂ ਘੱਟ ਉਮਰ ਦੇ ਲੋਕਾਂ ਦੀ ਮੌਤਾਂ ਦੀ ਗਿਣਤੀ 20 ਤੱਕ ਪਹੁੰਚ ਗਈ ਹੈ।
ਸਾਲ 2024 'ਚ ਇਸ ਪ੍ਰਕਾਰ ਦੀਆਂ ਕੁੱਲ ਮੌਤਾਂ ਦੀ ਗਿਣਤੀ 2,312 ਦੱਸੀ ਗਈ ਸੀ।
ਬੀ.ਸੀ. 'ਚ ਸਾਲ 2016 'ਚ ਟੌਕਸਿਕ ਡਰੱਗਸ ਸੰਬੰਧੀ ਮੌਤਾਂ ਕਾਰਨ ਪਬਲਿਕ ਹੈਲਥ ਐਮਰਜੈਂਸੀ ਐਲਾਨੀ ਗਈ ਸੀ।
ਉਸ ਵੇਲੇ ਤੋਂ ਹੁਣ ਤੱਕ 16,000 ਤੋਂ ਵਧੇਰੇ ਲੋਕ ਟੌਕਸਿਕ ਡਰੱਗਸ ਕਾਰਨ ਜਾਨ ਗਵਾ ਚੁੱਕੇ ਹਨ। ਹਾਲਾਂਕਿ ਇਸ ਸਾਲ ਦੇ ਅੰਕੜੇ ਬੀਤੇ ਦੋ ਸਾਲਾਂ ਮੁਕਾਬਲੇ ਕੁਝ ਗਿਰਾਵਟ ਦਰਸਾਉਂਦੇ ਹਨ ਅਤੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਾਨਾਂ ਬਚਾਉਣ ਲਈ ਉਨ੍ਹਾਂ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ।
