ਮੈਟਰੋ ਵੈਨਕੂਵਰ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਜਲਦ ਹੀ ਨਵੇਂ ਕਿਫਾਇਤੀ ਘਰ ਹੋਣਗੇ ਉਪਲੱਬਧ

ਮੈਟਰੋ ਵੈਨਕੂਵਰ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਜਲਦ ਹੀ ਨਵੇਂ ਕਿਫਾਇਤੀ ਘਰ ਉਪਲੱਬਧ ਹੋਣਗੇ, ਬੀ. ਸੀ. ਸਰਕਾਰ ਦਾ ਕਹਿਣਾ ਹੈ ਕਿ ਕੋਕਟਲਮ, ਉੱਤਰੀ ਵੈਨਕੂਵਰ ਅਤੇ ਵੈਨਕੂਵਰ ਵਿਚ 400 ਨਵੇਂ ਕਿਰਾਏ ਦੇ ਘਰ ਖੋਲ੍ਹੇ ਜਾ ਰਹੇ ਹਨ।

ਸੂਬੇ ਦੀ ਹਾਊਸਿੰਗ ਅਤੇ ਮਿਉਂਸਪਲ ਮਾਮਲਿਆਂ ਦੀ ਮੰਤਰੀ ਕ੍ਰਿਸਟੀਨ ਬੋਇਲ ਨੇ ਕਿਹਾ ਕਿ ਪੰਜ ਹਾਊਸਿੰਗ ਵਿਕਾਸ ਵਿਚ 400 ਨਵੇਂ ਕਿਰਾਏ ਦੇ ਘਰ ਉਪਲਬਧ ਕਰਨ ਵਿਚ ਮਦਦ ਕਰਨ ਲਈ ਬੀਸੀ ਹਾਊਸਿੰਗ ਰਾਹੀਂ ਲਗਭਗ $61 ਮਿਲੀਅਨ ਦੀ ਗ੍ਰਾਂਟ ਫੰਡਿੰਗ ਦਿੱਤੀ ਗਈ ਹੈ।

ਉੱਤਰੀ ਵੈਨਕੂਵਰ ਵਿਚ ਹੋਲੀਬਰੂਕ ਦੇ 86 ਘਰਾਂ ਵਾਲੀ ਰਿਹਾਇਸ਼ ਖੁੱਲ੍ਹ ਚੁੱਕੀ ਹੈ ਅਤੇ ਲੋਕਾਂ ਨੇ ਉਥੇ ਆਉਣਾ ਸ਼ੁਰੂ ਕਰ ਦਿੱਤਾ ਹੈ। ਵੈਨਕੂਵਰ ਦੇ 5085 ਮੈਕਹਾਰਡੀ ਅਤੇ ਕੋਕਟਲਮ ਦੇ 708 ਫੈਰੋ ਵਿਚ ਉਸਾਰੀ ਪੂਰੀ ਹੋ ਚੁੱਕੀ ਹੈ, ਜਦੋਂ ਕਿ ਵੈਨਕੂਵਰ ਵਿਚ ਦੋ ਹੋਰ ਜਗ੍ਹਾ 1656 ਐਡਾਨੈਕ ਅਤੇ 3132 ਰੋਸਮੋਂਟ ਵਿਖੇ ਉਸਾਰੀ ਚੱਲ ਰਹੀ ਹੈ ਜੋ 2027 ਵਿਚ ਸਤੰਬਰ ਤੋਂ ਨਵੰਬਰ ਵਿਚਕਾਰ ਪੂਰੀ ਹੋ ਜਾਵੇਗੀ। ਇਹ ਪ੍ਰੋਜੈਕਟਸ ਬੀ.ਸੀ. ਸਰਕਾਰ ਵਲੋਂ ਕੀਤੇ ਗਏ $19-ਬਿਲੀਅਨ ਦੇ ਹਾਊਸਿੰਗ ਇਨਵੈਸਟਮੈਂਟ ਦਾ ਹਿੱਸਾ ਹਨ।