ਐਬਟਸਫੋਰਡ ਪੁਲਿਸ ਨੇ ਤੇਜ਼ ਰਫ਼ਤਾਰ ਨਾਲ ਗੱਡੀ ਚਲਾਉਣ ਵਾਲੇ 25 ਸਾਲਾ ਵਿਅਕਤੀ ਨੂੰ ਕੀਤਾ ਗ੍ਰਿਫ਼ਤਾਰ

ਐਬਟਸਫੋਰਡ ਪੁਲਿਸ ਨੇ ਸਪੀਡਿੰਗ ਦੇ ਮਾਮਲੇ ਵਿਚ ਇੱਕ ਪਿਕਅੱਪ ਟਰੱਕ ਡਰਾਈਵਰ ਦਾ ਲਾਇਸੈਂਸ 90 ਦਿਨਾਂ ਲਈ ਸਸਪੈਂਡ ਕਰਨ ਦੀ ਕਾਰਵਾਈ ਕੀਤੀ ਹੈ। ਨਾਲ ਹੀ ਉਸ ਦੀ ਕੋਰਟ ਵਿਚ 13 ਅਪ੍ਰੈਲ ਨੂੰ ਪਹਿਲੀ ਪੇਸ਼ੀ ਪਾਈ ਗਈ ਹੈ।

ਪੁਲਿਸ ਮੁਤਾਬਕ, ਮਾਮਲਾ ਮੰਗਲਵਾਰ ਰਾਤ ਦਾ ਹੈ, ਔਫੀਸਰ ਨੇ ਟਾਊਨਸ਼ਿਪਲਾਈਨ ਰੋਡ ਨੇੜੇ 25 ਸਾਲਾ ਡਰਾਈਵਰ ਨੂੰ ਹਾਈਵੇ 11'ਤੇ 80 ਕਿਲੋਮੀਟਰ ਪ੍ਰਤੀ ਘੰਟਾ ਦੇ ਜ਼ੋਨ ਵਿਚ 198 ਦੀ ਰਫ਼ਤਾਰ ਨਾਲ ਦੇਖਿਆ, ਜਿਸ ਨੂੰ ਕਾਬੂ ਕਰਨ ਲਈ ਹੋਰ ਔਫੀਸਰ ਬੁਲਾਉਣੇ ਪਏ ਪਰ ਡਰਾਈਵਰ ਰੁਕਣ ਦੀ ਬਜਾਏ ਡਾਊਨਸ ਰੋਡ ਵੱਲ ਨਿਕਲ ਗਿਆ, ਜਿੱਥੇ 60 ਦੀ ਸਪੀਡ ਵਾਲੇ ਜ਼ੋਨ ਵਿਚ ਉਸ ਦੀ ਰਫ਼ਤਾਰ 200 ਤੋਂ ਵੀ ਉੱਪਰ ਪਹੁੰਚ ਗਈ।

ਇਸ ਦੇ ਮੱਦੇਨਜ਼ਰ ਪੁਲਿਸ ਨੇ ਮਾਊਂਟ ਲੇਹਮੈਨ ਰੋਡ 'ਤੇ ਸਪਾਈਕ ਬੈਲਟ ਵਿਛਾਈ, ਥੋੜ੍ਹੀ ਦੇਰ ਬਾਅਦ ਡਰਾਈਵਰ ਨੇ ਆਪਣਾ ਕੰਟਰੋਲ ਗੁਆ ਦਿੱਤਾ ਅਤੇ ਐਲਡਰਗਰੋਵ ਵਿਚ 48 ਐਵੇਨਿਊ ਅਤੇ 272 ਸਟਰੀਟ 'ਤੇ ਇੱਕ ਲਾਈਟ ਪੋਲ ਨਾਲ ਉਸ ਦੀ ਗੱਡੀ ਟਕਰਾ ਗਈ, ਜਿਥੇ ਔਫੀਸਰ ਨੇ ਉਸ ਨੂੰ ਗ੍ਰਿਫਤਾਰ ਕੀਤਾ। ਪੁਲਿਸ ਮੁਤਾਬਕ, ਡਰਾਈਵਰ ਸ਼ਰਾਬ ਦੇ ਨਸ਼ੇ ਵਿਚ ਸੀ ਅਤੇ ਉਸ 'ਤੇ ਅਪਰਾਧਿਕ ਦੋਸ਼ ਲਗਾਏ ਜਾਣੇ ਬਾਕੀ ਹਨ।