ਐਬਟਸਫੋਰਡ ਵਿੱਚ ਤੜਕੇ ਘਰ ਦੇ ਬਾਹਰ ਚੱਲੀਆਂ ਗੋਲੀਆਂ, ਪੁਲਿਸ ਵਲੋਂ ਕੀਤੀ ਜਾ ਰਹੀ ਜਾਂਚ

ਐਬਟਸਫੋਰਡ ਵਿਚ ਅੱਜ ਤੜਕੇ ਇੱਕ ਘਰ ਦੇ ਬਾਹਰ ਗੋਲੀਆਂ ਚੱਲੀਆਂ, ਇਹ ਵਾਰਦਾਤ ਸ਼ਹਿਰ ਵਿਚ ਜੈਨਜ਼ਨ ਸਟਰੀਟ ਦੇ 2500-ਬਲਾਕ ਵਿਚ ਹੋਈ। ਪੁਲਿਸ ਨੇ ਇਸ ਨੂੰ ਟਾਰਗੇਟਡ ਅਤੇ ਜ਼ਬਰੀ ਵਸੂਲੀ ਨਾਲ ਸਬੰਧਤ ਮਾਮਲਾ ਦੱਸਿਆ ਹੈ। ਅਧਿਕਾਰੀਆਂ ਮੁਤਾਬਕ, ਤੜਕੇ 3.30 ਵਜੇ ਦੇ ਆਸਪਾਸ ਉਨ੍ਹਾਂ ਨੂੰ ਗੋਲੀਬਾਰੀ ਦੀ ਸੂਚਨਾ ਮਿਲੀ।

ਰਿਹਾਇਸ਼ ਦੇ ਡਰਾਈਵਵੇਅ 'ਤੇ ਖੜ੍ਹੀਆਂ ਦੋ ਗੱਡੀਆਂ ਨੂੰ ਗੋਲੀਆਂ ਨਾਲ ਨਿਸ਼ਾਨਾ ਬਣਾਇਆ ਗਿਆ ਸੀ। ਐਬਟਸਫੋਰਡ ਪੁਲਿਸ ਦੇ ਬੁਲਾਰੇ, ਸਾਰਜੈਂਟ ਪਾਲ ਵਾਕਰ ਨੇ ਕਿਹਾ ਕਿ ਘਰ ਵਿਚ ਮੌਜੂਦ ਸਾਰੇ ਲੋਕ ਉਸ ਸਮੇਂ ਸੁੱਤੇ ਹੋਏ ਸਨ ਅਤੇ ਕਿਸੇ ਨੂੰ ਕੋਈ ਨੁਕਸਾਨ ਨਹੀਂ ਪੁੱਜਾ। ਜਾਂਚਕਰਤਾ ਨੇ ਸ਼ੱਕੀਆਂ ਬਾਰੇ ਸੁਰਾਗ ਜੁਟਾਉਣ ਲਈ ਲੋਕਾਂ ਤੋਂ ਜਾਂਚ ਵਿਚ ਸਹਿਯੋਗ ਦੀ ਅਪੀਲ ਕੀਤੀ ਹੈ।

ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਜੇ ਕੋਈ ਵੀ ਸਵੇਰੇ 3:15 ਵਜੇ ਤੋਂ 4 ਵਜੇ ਵਿਚਕਾਰ ਜੈਨਜ਼ਨ ਸਟਰੀਟ ਦੇ ਇਲਾਕੇ ਵਿਚ ਜਾਂ ਨੇੜੇ ਸੀ ਤੇ ਇਸ ਦੌਰਾਨ ਉਸ ਨੇ ਕੋਈ ਸ਼ੱਕੀ ਗਤੀਵਿਧੀ ਦੇਖੀ ਹੋ ਸਕਦੀ ਹੈ ਜਾਂ ਇਸ ਦੀ ਡੈਸ਼ਕੈਮ ਫੁਟੇਜ ਕੈਪਚਰ ਕੀਤੀ ਹੋ ਸਕਦੀ ਹੈ ਤਾਂ ਉਸ ਨੂੰ ਐਬਟਸਫੋਰਡ ਪੁਲਿਸ ਨਾਲ ਸੰਪਰਕ ਕਰਨ ਲਈ ਕਿਹਾ ਜਾਂਦਾ ਹੈ।