ਐਬਟਸਫੋਰਡ ਪੁਲਿਸ ਨੇ ਸ਼ਹਿਰ ਵਿਚ ਸੁਰੱਖਿਆ ਅਤੇ ਫਿਰੌਤੀ ਦੇ ਪੀੜਤਾਂ ਦੀ ਮਦਦ ਲਈ ਵਧਾਈ ਸਰਗਰਮੀ

ਐਬਟਸਫੋਰਡ ਪੁਲਿਸ ਨੇ ਸ਼ਹਿਰ ਵਿਚ ਸੁਰੱਖਿਆ ਅਤੇ ਖਾਸ ਕਰ ਫਿਰੌਤੀ ਦੇ ਪੀੜਤਾਂ ਦੀ ਮਦਦ ਲਈ ਆਪਣੀ ਸਰਗਰਮੀ ਵਧਾ ਦਿੱਤੀ ਹੈ।ਐਬਟਸਫੋਰਡ ਪੁਲਿਸ ਡਿਪਾਰਟਮੈਂਟ ਨੇ ਦੱਸਿਆ ਕਿ ਪਿਛਲੇ 24 ਘੰਟਿਆਂ ਦੌਰਾਨ ਉਨ੍ਹਾਂ ਦੀਆਂ ਫਰੰਟਲਾਈਨ ਟੀਮਾਂ ਨੇ ਕਿਰਿਆਸ਼ੀਲ ਪੈਟਰੋਲਿੰਗ ਕੀਤੀ ਹੈ, ਇਸ ਦੌਰਾਨ ਐਕਸਟੋਸ਼ਨ ਪੀੜਤਾਂ ਦੀ ਸੁਰੱਖਿਆ ਲਈ ਗਸ਼ਤ ਅਧਿਕਾਰੀਆਂ ਵਲੋਂ ਘਰਾਂ ਅਤੇ ਕਾਰੋਬਾਰਾਂ ਦੇ ਸੁਰੱਖਿਆ ਜਾਂਚਾਂ ਲਈ ਦਿਨ ਅਤੇ ਰਾਤ ਸਮੇਂ 34 ਵਾਰ ਪੈਟਰੋਲਿੰਗ ਕੀਤੀ ਗਈ।

ਗਸ਼ਤ ਦੌਰਾਨ ਪੁਲਿਸ ਨੇ ਵੱਖ-ਵੱਖ ਮਾਮਲਿਆਂ ਵਿਚ ਲੋੜੀਂਦੇ ਛੇ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ, ਜਿਨ੍ਹਾਂ ਵਿਰੁੱਧ ਆਊਟਸਟੈਂਡਿੰਗ ਵਾਰੰਟ ਜਾਰੀ ਸਨ। ਇਸ ਤੋਂ ਇਲਾਵਾ ਟ੍ਰੈਫਿਕ ਇਨਫੋਰਸਮੈਂਟ ਦੇ ਨਤੀਜੇ ਵਜੋਂ ਪੁਲਿਸ ਨੇ 4 ਤੇਜ਼ ਰਫ਼ਤਾਰ ਅਤੇ 4 ਨਸ਼ੇ ਵਿਚ ਗੱਡੀ ਚਲਾਉਣ ਵਾਲੇ ਡਰਾਈਵਰਾਂ ਵਿਰੁੱਧ ਕਾਰਵਾਈ ਕੀਤੀ, ਇਸ ਦੌਰਾਨ 26 ਉਲੰਘਣਾ ਟਿਕਟ ਵੀ ਜਾਰੀ ਕੀਤੇ ਗਏ।

ਐਬਟਸਫੋਰਡ ਪੁਲਿਸ ਨੇ ਦੱਸਿਆ ਕਿ ਜਨਤਕ ਸੁਰੱਖਿਆ ਵਧਾਉਣ ਲਈ ਸ਼ਹਿਰ ਵਿਚ ਰਾਤ ਸਮੇਂ ਅਚਾਨਕ ਰੋਡ ਚੈੱਕ ਕੀਤੇ ਜਾ ਰਹੇ ਹਨ। ਪਬਲਿਕ ਸੇਫਟੀ ਲਈ ਪੁਲਿਸ ਕੁਝ ਥਾਵਾਂ 'ਤੇ ਵਰਦੀ ਵਿਚ ਅਤੇ ਕੁਝ ਥਾਵਾਂ 'ਤੇ ਸਾਦੇ ਕੱਪੜਿਆਂ ਵਿਚ ਵੀ ਕੰਮ ਕਰ ਰਹੀ ਹੈ।