ਐਬਟਸਫੋਰਡ: ਨੌਜਵਾਨ ਨੂੰ ਤੇਜ਼ ਰਫ਼ਤਾਰ ਨਾਲ ਗੱਡੀ ਚਲਾਉਣ ਕਾਰਨ ਲੱਗਿਆ ਜ਼ੁਰਮਾਨਾ, ਹੋਵੇਗਾ ਲਾਇਸੈਂਸ ਰੱਦ

ਐਬਟਸਫੋਰਡ ਦੇ ਇੱਕ 17 ਸਾਲਾ ਨੌਜਵਾਨ ਨੂੰ ਹਾਈਵੇ 1 'ਤੇ 178 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਗੱਡੀ ਚਲਾਉਣ ਤੋਂ ਬਾਅਦ ਕਈ ਜੁਰਮਾਨਿਆਂ ਅਤੇ ਗੱਡੀ ਜ਼ਬਤ ਹੋਣ ਤੋਂ ਇਲਾਵਾ ਲਾਇਸੈਂਸ ਰੱਦ ਹੋਣ ਦੀ ਸੰਭਾਵਨਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਬੀ. ਸੀ. ਹਾਈਵੇ ਪੈਟਰੋਲ ਮੁਤਾਬਕ, ਘਟਨਾ 19 ਅਕਤੂਬਰ ਦੀ ਸਵੇਰ 7:45 ਵਜੇ ਕਲੀਅਰਬਰੁਕ ਰੋਡ ਨੇੜੇ ਵਾਪਰੀ।

ਅਧਿਕਾਰੀ ਨੇ ਬਾਰਸ਼ ਦੇ ਮੌਸਮ ਵਿਚ ਲੇਜ਼ਰ ਰੀਡਰ ਨਾਲ ਗ੍ਰੇਅ ਰੰਗ ਦੀ ਹੌਂਡਾ ਸੇਡਾਨ ਨੂੰ 100 ਕਿਲੋਮੀਟਰ ਜ਼ੋਨ ਵਿਚ 178 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਸਪੀਡ ਨਾਲ ਚੱਲਦੇ ਰਿਕਾਰਡ ਕੀਤਾ। ਪੁਲਿਸ ਨੇ ਕਿਹਾ ਕਿ ਡਰਾਈਵਰ ਨੂੰ ਅਜੇ ਇਸ ਸਾਲ ਜਨਵਰੀ ਵਿਚ ਹੀ ਕਲਾਸ 7 ਨੌਵਿਸ ਲਾਇਸੈਂਸ ਮਿਲਿਆ ਸੀ ਅਤੇ ਉਸ ਨਾਲ ਦੋ ਹੋਰ ਯਾਤਰੀ ਵੀ ਸਨ।

ਬੀ. ਸੀ. ਹਾਈਵੇ ਪੈਟਰੋਲ ਨੇ ਨੌਜਵਾਨ ਨੂੰ ਬਹੁਤ ਜ਼ਿਆਦਾ ਗਤੀ ਲਈ $483, ਲਾਇਸੈਂਸ ਦੇ ਉਲਟ ਗੱਡੀ ਵਿਚ ਵੱਧ ਯਾਤਰੀ ਬਿਠਾਉਣ ਲਈ $109 ਅਤੇ “N” ਸਾਇਨ ਨਾ ਲਗਾਉਣ ਲਈ $109 ਦਾ ਜੁਰਮਾਨਾ ਕੀਤਾ ਅਤੇ ਗੱਡੀ, ਜੋ ਉਸ ਦੇ ਪਿਤਾ ਦੇ ਨਾਮ 'ਤੇ ਰਜਿਸਟਰ ਸੀ ਉਸ ਨੂੰ ਸੱਤ ਦਿਨ ਲਈ ਜ਼ਬਤ ਕੀਤਾ ਗਿਆ। ਕਾਰਪੋਰਲ ਮਾਈਕਲ ਮੈਕਲਾਫਲਿਨ ਨੇ ਕਿਹਾ ਕਿ ਬੀ.ਸੀ. ਸੁਪਰਡੈਂਟ ਆਫ਼ ਮੋਟਰ ਵਹੀਕਲਜ਼ ਵਲੋਂ ਉਸ ਦਾ ਲਾਇਸੈਂਸ ਸਸਪੈਂਡ ਕੀਤੇ ਜਾਣ ਦੀ ਸੰਭਾਵਨਾ ਹੈ।