12.67C Vancouver 12.67C VancouverNov 27, 2023 6:03 PM - The Canadian Press
ਕੈਨੇਡੀਅਨ ਏਅਰਲਾਈਨ ਏਅਰ ਟਰਾਂਜ਼ਿਟ ਦੇ 2100 ਦੇ ਕਰੀਬ ਵਰਕਰ ਨਵੇਂ ਸਾਲ ਦੇ ਸ਼ੁਰੂ ਵਿੱਚ ਹੜਤਾਲ 'ਤੇ ਜਾ ਰਹੇ ਹਨ। ਕੈਨੇਡੀਅਨ ਯੂਨੀਅਨ ਆਫ਼ ਪਬਲਿਕ ਇੰਪਲਾਈਜ਼ ਨੇ ਸੋਮਵਾਰ ਨੂੰ ਇਸ ਦੀ ਜਾਣਕਾਰੀ ਦਿੱਤੀ।
ਯੂਨੀਅਨ ਨੇ ਕਿਹਾ ਕਿ ਕੰਮ ਕਰਨ ਦੇ ਹਾਲਾਤ ਅਤੇ ਤਨਖਾਹ ਨੂੰ ਲੈ ਕੇ ਡੀਲ ਨਾ ਹੋਣ ਦੀ ਸੂਰਤ ਵਿੱਚ 99.8% ਵਰਕਰਾਂ ਨੇ ਹੜਤਾਲ 'ਤੇ ਜਾਣ ਦੇ ਪੱਖ ਵਿੱਚ ਵੋਟ ਕੀਤੀ ਹੈ, ਜਿਸ ਨਾਲ ਏਅਰ ਟਰਾਂਜ਼ਿਟ ਦੇ 2,100 ਫਲਾਈਟ ਅਟੈਂਡੈਂਟ 3 ਜਨਵਰੀ ਤੋਂ ਹੜਤਾਲ ਕਰਨ ਦੀ ਸਥਿਤੀ ਵਿੱਚ ਹਨ।
ਯੂਨੀਅਨ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਯਾਤਰੀਆਂ ਨੂੰ ਕੋਈ ਪ੍ਰੇਸ਼ਾਨੀ ਨਾ ਹੋਵੇ ਇਸ ਲਈ ਡੀਲ 'ਤੇ ਪਹੁੰਚਣ ਲਈ ਅਜੇ ਵੀ ਕਾਫੀ ਸਮਾਂ ਹੈ ਨਹੀਂ ਤਾਂ ਹੜਤਾਲ ਦੀ ਸਥਿਤੀ ਵਿੱਚ ਏਅਰ ਟਰਾਂਜ਼ਿਟ ਦੀਆਂ ਸਾਰੀਆਂ ਉਡਾਣਾਂ ਰੱਦ ਹੋਣ ਦੀ ਸੰਭਾਵਨਾ ਹੈ।
ਏਅਰਲਾਈਨ ਨੇ ਕਿਹਾ ਕਿ ਸਾਨੂੰ ਭਰੋਸਾ ਹੈ ਕਿ ਇਸ ਤੋਂ ਪਹਿਲਾਂ ਸਮਝੌਤਾ ਹੋ ਜਾਵੇਗਾ। ਗੌਰਤਲਬ ਹੈ ਕਿ ਯੂਨੀਅਨ ਨਵੀਂ ਲੇਬਰ ਡੀਲ ਲਈ ਅਪ੍ਰੈਲ ਤੋਂ ਏਅਰਲਾਈਨ ਨਾਲ ਗੱਲਬਾਤ ਕਰ ਰਹੀ ਹੈ, ਇਸ ਵਿੱਚ ਕਈ ਵੱਖ-ਵੱਖ ਮੁੱਦੇ ਸ਼ਾਮਲ ਹਨ ਪਰ ਇਨ੍ਹਾਂ ਵਿੱਚ ਸਭ ਤੋਂ ਪ੍ਰਮੁੱਖ ਮੁਆਵਜ਼ੇ ਦਾ ਮੁੱਦਾ ਹੈ।
ਏਅਰ ਟਰਾਂਜ਼ਿਟ ਯੂਨੀਅਨ ਦੇ ਪ੍ਰਧਾਨ ਡੋਮਿਨਿਕ ਲੇਵੇਸੂਰ ਨੇ ਕਿਹਾ ਕਿ ਅੱਧੇ ਤੋਂ ਵੱਧ ਵਰਕਰਜ਼ ਦੀ ਸ਼ੁਰੂਆਤੀ ਤਨਖਾਹ ਮਹਿਜ $26,577 ਪ੍ਰਤੀ ਸਾਲ ਹੈ, ਜਿਸ ਕਾਰਨ ਉਨ੍ਹਾਂ ਨੂੰ ਰੋਜ਼ਾਨਾ ਦੀਆਂ ਜ਼ਰੂਰਤਾਂ ਪੂਰਾ ਕਰਨ ਲਈ ਦੂਜੀ ਜਾਂ ਇੱਥੋਂ ਤੱਕ ਤੀਜੀ ਨੌਕਰੀ ਕਰਨ ਲਈ ਮਜਬੂਰ ਹੋਣਾ ਪਿਆ ਹੈ।
