18.15C Vancouver 18.15C VancouverAug 18, 2023 8:05 PM - Connect News
ਕਲੋਨਾ ਇੰਟਰਨੈਸ਼ਨਲ ਏਅਰਪੋਰਟ ਨੇ ਸ਼ੁੱਕਰਵਾਰ ਸਵੇਰੇ ਆਪਣੀ ਏਅਰ ਸਪੇਸ ਨੂੰ ਬੰਦ ਕਰ ਦਿੱਤਾ ਅਤੇ ਜ਼ਿਆਦਾਤਰ ਉਡਾਣਾਂ ਨੂੰ ਰੱਦ ਕਰ ਦਿੱਤਾ ਹੈ।
ਬ੍ਰਿਟਿਸ਼ ਕੋਲੰਬੀਆ ਦੀ ਓਕਾਨਾਗਨ ਵੈਲੀ ਵਿੱਚ ਸ਼ਹਿਰ ਦੇ ਆਲੇ-ਦੁਆਲੇ ਲੱਗੀ ਭਿਆਨਕ ਜੰਗਲੀ ਅੱਗ ਨਾਲ ਲੜ ਰਹੇ ਏਰੀਅਲ ਕਰੂ ਲਈ ਜਗ੍ਹਾ ਬਣਾਉਣ ਲਈ ਉਡਾਣਾਂ ਨੂੰ ਰੱਦ ਕੀਤਾ ਗਿਆ ਹੈ।
ਏਅਰਪੋਰਟ ਦੀ ਵੈਬਸਾਈਟ ਦੇ ਅਨੁਸਾਰ, ਕਲੋਨਾ 'ਚ ਆਉਣ ਅਤੇ ਬਾਹਰ ਜਾਣ ਵਾਲੀਆਂ ਜ਼ਿਆਦਾਤਰ ਉਡਾਣਾਂ ਸ਼ੁੱਕਰਵਾਰ ਦੁਪਹਿਰ ਤੱਕ ਰੱਦ ਕਰ ਦਿੱਤੀਆਂ ਗਈਆਂ ਹਨ।
ਜ਼ਿਕਰਯੋਗ ਹੈ ਕਿ ਬ੍ਰਿਟਿਸ਼ ਕੋਲੰਬੀਆ ਦਾ ਕਲੋਨਾ ਸ਼ਹਿਰ ਵੀ ਜੰਗਲੀ ਅੱਗ ਦੀ ਲਪੇਟ ਵਿਚ ਆ ਗਿਆ ਹੈ।
ਕਲੋਨਾ ਸ਼ਹਿਰ ਵਿਚ ਸਟੇਟ ਔਫ਼ ਐਮਰਜੈਂਸੀ ਐਲਾਨੀ ਗਈ ਹੈ।
ਸ਼ੁੱਕਰਵਾਰ ਨੂੰ ਕਲੋਨਾ ਦੇ ਕਲਿਫ਼ਟਨ ਰੋਡ ਨੌਰਥ ਅਤੇ ਨਜ਼ਦੀਕ ਹੋਰ ਇਲਾਕਿਆਂ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਇਲਾਕਾ ਛੱਡਣ ਦੇ ਆਦੇਸ਼ ਜਾਰੀ ਕੀਤੇ ਗਏ ਹਨ।
ਵੈਸਟ ਕਲੋਨਾ ਸ਼ਹਿਰ ਅਤੇ ਵੈਸਟਬੈਂਕ ਫ਼ਸਟ ਨੇਸ਼ਨ 'ਚ ਵੀ ਵੀਰਵਾਰ ਰਾਤ ਨੂੰ ਲੋਕਲ ਸਟੇਟ ਔਫ਼ ਐਮਰਜੈਂਸੀ ਐਲਾਨੀ ਗਈ ਸੀ।
ਵੈਸਟ ਕਲੋਨਾ ਦੀ ਆਬਾਦੀ ਕਰੀਬ 36,000 ਹੈ।
ਇਸ ਸ਼ਹਿਰ ਵਿਚ 2,400 ਘਰਾਂ ਨੂੰ ਖ਼ਾਲੀ ਕਰਨ ਦੇ ਆਦੇਸ਼ ਜਾਰੀ ਹੋਏ ਹਨ ਅਤੇ 4,800 ਘਰਾਂ ਨੂੰ ਅਲਰਟ ‘ਤੇ ਰੱਖਿਆ ਗਿਆ ਹੈ।
