17.97C Vancouver 17.97C VancouverJul 7, 2026 2:37 PM - Connect Newsroom - Ramandeep Kaur with files from The Canadian Press
ਐਲਬਰਟਾ ਸਰਕਾਰ ਨੇ ਹਾਈਵੇਅ 63 ਦੀ ਮੁਰੰਮਤ ਲਈ 15 ਮਿਲੀਅਨ ਡਾਲਰ ਦੇਣ ਦਾ ਐਲਾਨ ਕੀਤਾ ਹੈ। ਇਸ ਰਕਮ ਦਾ ਇਸਤੇਮਾਲ ਫੋਰਟ ਮੈਕਮਰੀ ਵਿੱਚੋਂ ਲੰਘਦੇ ਹਾਈਵੇਅ ਦੇ ਹਿੱਸੇ ਸਮੇਤ ਹੋਰ ਥਾਵਾਂ 'ਤੇ ਖੱਡੇ ਭਰਨ ਅਤੇ ਸੜਕ ਸੁਧਾਰ ਲਈ ਕੀਤਾ ਜਾਵੇਗਾ। ਸਰਕਾਰ ਨੇ ਇਹ ਐਲਾਨ ਜੂਨ ਮਹੀਨੇ ਵਿੱਚ ਦਰਜਨਾਂ ਸਥਾਨਕ ਵਸਨੀਕਾਂ ਵੱਲੋਂ ਹਾਈਵੇਅ 63 'ਤੇ ਖੱਡੇ ਭਰ ਕੇ ਸਰਕਾਰ ਖ਼ਿਲਾਫ਼ ਕੀਤੇ ਰੋਸ ਪ੍ਰਦਰਸ਼ਨ ਤੋਂ ਬਾਅਦ ਕੀਤਾ ਗਿਆ ਹੈ।
ਆਵਾਜਾਈ ਅਤੇ ਆਰਥਿਕ ਗਲਿਆਰਿਆਂ ਦੇ ਮੰਤਰੀ ਡੇਵਿਨ ਡ੍ਰੀਸ਼ਨ ਨੇ ਕਿਹਾ ਕਿ ਸਰਕਾਰ ਸੂਬੇ ਦੇ ਹਾਈਵੇਅ ਰੱਖ-ਰਖਾਅ ਬਜਟ ਵਿੱਚ ਕੁੱਲ 22.4 ਮਿਲੀਅਨ ਡਾਲਰ ਤੋਂ ਵੱਧ ਦਾ ਵਾਧਾ ਕਰ ਰਹੀ ਹੈ। ਇਹ ਪਿਛਲੇ ਸਾਲ ਦੇ ਮੁਕਾਬਲੇ ਲਗਭਗ 60 ਫੀਸਦੀ ਵੱਧ ਹੈ, ਜਿਸ ਵਿੱਚੋਂ 15 ਮਿਲੀਅਨ ਡਾਲਰ ਸਿੱਧੇ ਤੌਰ 'ਤੇ ਹਾਈਵੇਅ 63 ਦੀ ਸੰਭਾਲ ਲਈ ਰੱਖੇ ਗਏ ਹਨ।
ਡੇਵਿਨ ਡ੍ਰੀਸ਼ਨ ਨੇ ਦੱਸਿਆ ਕਿ ਸਰਕਾਰ Wandering River ਨੇੜੇ ਸਾਊਥ ਵਾਲੇ ਪਾਸੇ ਹਾਈਵੇਅ 63 ਦੇ 48 ਕਿਲੋਮੀਟਰ ਹਿੱਸੇ ਨੂੰ ਮੁੜ ਪੱਕਾ ਕਰਨ ਦੇ ਠੇਕੇ ਦੀ ਪ੍ਰਕਿਰਿਆ ਤੇਜ਼ ਕਰ ਰਹੀ ਹੈ। ਇਸ ਤੋਂ ਇਲਾਵਾ ਫੋਰਟ ਮੈਕਮਰੀ ਖੇਤਰ ਵਿੱਚ ਹਾਈਵੇਅ 63 ਅਤੇ ਹਾਈਵੇਅ 881 ਦੇ ਕਰੀਬ 30 ਕਿਲੋਮੀਟਰ ਹਿੱਸੇ ਦੀ ਨਵੀਂ ਸੜਕ ਬਣਾਉਣ ਲਈ ਵੀ ਵੱਖਰਾ ਠੇਕਾ ਜਾਰੀ ਕੀਤਾ ਜਾ ਰਿਹਾ ਹੈ।
