ਐਲਬਰਟਾ ਦੇ ਫਰੈਂਕੋਫੋਨ ਗਰੁੱਪਾਂ ਨੇ ਸੁਪਰੀਮ ਕੋਰਟ ਦੀ ਦੋਭਾਸ਼ੀ ਲੋੜ ਨੂੰ ਰਾਜਨੀਤਕ ਮੁੱਦਾ ਨਾ ਬਣਾਉਣ ਦੀ ਕੀਤੀ ਅਪੀਲ

ਪ੍ਰੀਮੀਅਰ ਡੈਨੀਅਲ ਸਮਿਥ ਵੱਲੋਂ ਸੁਪਰੀਮ ਕੋਰਟ ਦੇ ਜੱਜਾਂ ਲਈ ਦੋ-ਭਾਸ਼ੀ ਹੋਣ ਦੀ ਸ਼ਰਤ ਨੂੰ ਨਰਮ ਕਰਨ ਦੀ ਮੰਗ ਨੇ ਇੱਕ ਨਵੀਂ ਬਹਿਸ ਛੇੜ ਦਿੱਤੀ ਹੈ। ਸਮਿਥ ਦਾ ਤਰਕ ਹੈ ਕਿ ਇਹ ਨਿਯਮ ਪੱਛਮੀ ਕੈਨੇਡਾ ਦੇ ਲੋਕਾਂ ਵਿੱਚ ਬੇਗਾਨਗੀ ਦੀ ਭਾਵਨਾ ਪੈਦਾ ਕਰਦੇ ਹਨ, ਕਿਉਂਕਿ ਇਹ ਪੱਛਮੀ ਸੂਬਿਆਂ ਦੇ ਕਈ ਕਾਬਲ ਕਾਨੂੰਨੀ ਮਾਹਰਾਂ ਨੂੰ ਦੇਸ਼ ਦੀ ਸਰਵਉੱਚ ਅਦਾਲਤ ਤੱਕ ਪਹੁੰਚਣ ਤੋਂ ਰੋਕ ਸਕਦੇ ਹਨ।

ਐਲਬਰਟਾ ਦੇ ਦੋ ਮੁੱਖ ਫ੍ਰੈਂਕੋਫੋਨ ਗਰੁੱਪਸ ਫਰਾਂਸੀਸੀ ਵਕੀਲ ਐਸੋਸੀਏਸ਼ਨ ਅਤੇ ਫ੍ਰੈਂਚ ਕੈਨੇਡੀਅਨ ਐਸੋਸੀਏਸ਼ਨ ਨੇ ਸਾਂਝੇ ਤੌਰ ਨੇ ਸੁਪਰੀਮ ਕੋਰਟ ਦੇ ਜੱਜਾਂ ਲਈ ਦੋਭਾਸ਼ੀਵਾਦ ਦੀ ਲਾਜ਼ਮੀ ਸ਼ਰਤ ਨੂੰ ਸਿਆਸੀ ਮੁੱਦਾ ਬਣਾਉਣ ਵਿਰੁੱਧ ਆਵਾਜ਼ ਉਠਾਈ ਹੈ।ਫਰਾਂਸੀਸੀ ਵਕੀਲ ਐਸੋਸੀਏਸ਼ਨ ਦੀ ਮੁਖੀ ਐਲਸੀ ਗੈਗਨੇ ਨੇ ਪ੍ਰੀਮੀਅਰ ਦੇ ਤਰਕ ਨਾਲ ਅਸਹਿਮਤੀ ਜਤਾਈ ਹੈ।

ਉਨ੍ਹਾਂ ਕਿਹਾ ਕਿ ਸੁਪਰੀਮ ਕੋਰਟ ਦੇ ਜੱਜਾਂ ਲਈ ਦੋਵੇਂ ਭਾਸ਼ਾਵਾਂ ਦਾ ਗਿਆਨ ਹੋਣਾ ਜ਼ਰੂਰੀ ਹੈ ਤਾਂ ਜੋ ਉਹ ਸੁਣਵਾਈਆਂ ਨੂੰ ਸਹੀ ਢੰਗ ਨਾਲ ਸਮਝ ਸਕਣ, ਜੋ ਕਿ ਅੰਗਰੇਜ਼ੀ ਅਤੇ ਫਰੈਂਚ ਦੋਵਾਂ ਵਿੱਚ ਹੁੰਦੀਆਂ ਹਨ।