ਐਲਬਰਟਾ ਦੇ ਮੈਡੀਟੇਸ਼ਨ ਸੈਂਟਰ ’ਚ ਟੈਂਟ ਡਿੱਗਣ ਕਾਰਨ ਇਕ ਵਿਅਕਤੀ ਦੀ ਮੌਤ, ਕਈ ਜ਼ਖ਼ਮੀ

ਨੌਰਥਵੈਸਟ ਐਡਮਿੰਟਨ ਦੀ ਇਕ ਛੋਟੀ ਕਮਿਊਨਿਟੀ ਵਿਚ ਬੀਤੇ ਦਿਨ ਟੈਂਟ ਡਿਗਣ ਕਾਰਨ ਵਾਪਰੇ ਹਾਦਸੇ ਬਾਰੇ ਹੋਰ ਜਾਣਕਾਰੀ ਸਾਹਮਣੇ ਆਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਬੋਧੀ ਮੱਠ ਸੈਂਟਰ ਲਈ ਬਣਾਇਆ ਭਾਰੀ ਟੈਂਟ ਡਿਗਣ ਕਾਰਨ 1 ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਹੋਰ 50 ਜ਼ਖਮੀ ਹੋ ਗਏ। ਇੱਥੇ ਤਕਰੀਬਨ 200 ਲੋਕ ਇਕੱਠੇ ਹੋਏ ਸਨ।

ਬਸਬੀ ਵਿਚ ਵੈਸਟਲਾਕ ਮੈਡੀਟੇਸ਼ਨ ਸੈਂਟਰ ਨੌਰਥਵੈਸਟ ਐਡਮਿੰਟਨ ਤੋਂ ਕਰੀਬ 70 ਕਿਲੋਮੀਟਰ ਦੂਰ ਹੈ। ਆਰ.ਸੀ.ਐੱਮ.ਪੀ. ਸੀ.ਪੀ.ਐੱਲ. ਟਰੌਏ ਸਾਵਿਨਕੋਫ ਮੁਤਾਬਕ ਅਜੇ ਤੱਕ ਇਹ ਹੀ ਜਾਣਕਾਰੀ ਮਿਲੀ ਹੈ ਕਿ ਤੂਫਾਨ ਕਾਰਨ ਇਹ ਭਾਰੀ ਟੈਂਟ ਡਿੱਗ ਗਿਆ। ਇਸ ਕਾਰਨ ਇਸ ਦੇ ਕੋਲ ਅਤੇ ਅੰਦਰ ਬੈਠੇ ਲੋਕ ਜ਼ਖਮੀ ਹੋ ਗਏ। ਕੁਝ ਲੋਕਾਂ ਨੂੰ ਗੰਭੀਰ ਸੱਟਾਂ ਲੱਗੀਆਂ ਹਨ ਅਤੇ ਉਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ।

ਸੂਬੇ ਦੇ ਪਬਲਿਕ ਸੇਫਟੀ ਮੰਤਰੀ ਐਲਿਸ ਨੇ ਇਸ ਹਾਦਸੇ ਬਾਰੇ ਸੋਸ਼ਲ ਮੀਡੀਆ ’ਤੇ ਜਾਣਕਾਰੀ ਸਾਂਝੀ ਕੀਤੀ ਹੈ। ਦੱਸ ਦਈਏ ਕਿ ਵੈਸਟਲਾਕ ਦੇ ਏਰੀਏ ਵਿਚ ਬੀਤੀ ਸ਼ਾਮ ਮੌਸਮ ਕਾਫੀ ਖਰਾਬ ਸੀ। ਪੁਲਿਸ ਅਤੇ ਆਕੂਪੇਸ਼ਨਲ ਹੈਲਥ ਤੇ ਸੇਫਟੀ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।