ਸਾਊਥ ਸਰੀ ਦੇ ਰੈੱਡਵੁੱਡ ਪਾਰਕ ’ਚ ਚਾਕੂ ਲੈ ਕੇ ਵਿਅਕਤੀ ਦਾ ਪਿੱਛਾ ਕਰਦੇ ਦੀ ਵੀਡੀਓ ਕੈਮਰੇ 'ਚ ਹੋਈ ਕੈਦ

ਸਾਊਥ ਸਰੀ ਦੇ ਰੈੱਡਵੁੱਡ ਪਾਰਕ ਵਿਚ ਇੱਕ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਇੱਕ ਹਮਲਾਵਰ ਵੱਲੋਂ ਇੱਕ ਵਿਅਕਤੀ ਨੂੰ ਚਾਕੂ ਲੈ ਕੇ ਦੌੜਾਉਣ ਦੀ ਪੂਰੀ ਵੀਡੀਓ ਕੈਮਰੇ ਵਿਚ ਕੈਦ ਹੋਈ ਹੈ। ਇਹ ਘਟਨਾ ਬੁੱਧਵਾਰ ਸ਼ਾਮ ਕਰੀਬ 5 ਵਜੇ ਵਾਪਰੀ। ਪੁਲਿਸ ਮੁਤਾਬਕ, ਮੁਲਜ਼ਮ ਨੇ ਪਹਿਲਾਂ ਆਪਣੀ ਜੀਪ ਰੈਂਗਲਰ ਨਾਲ ਪੀੜਤ ਦੇ ਫੋਰਡ ਪਿਕਅੱਪ ਟਰੱਕ ਨੂੰ ਟੱਕਰ ਮਾਰੀ।

ਇਸ ਤੋਂ ਬਾਅਦ ਉਹ ਟਰੱਕ ਦੀ ਛੱਤ 'ਤੇ ਚਾਕੂ ਲੈ ਕੇ ਚੜ੍ਹ ਗਿਆ, ਜਦੋਂ ਪੀੜਤ ਭੱਜਿਆ ਤਾਂ ਮੁਲਜ਼ਮ ਹੱਥ ਵਿਚ ਚਾਕੂ ਲੈ ਕੇ ਉਸ ਦੇ ਪਿੱਛੇ ਪੈ ਗਿਆ। ਇਸ ਦੌਰਾਨ ਉੱਥੇ ਫੋਟੋਸ਼ੂਟ ਲਈ ਪਹੁੰਚੇ ਇੱਕ ਟੇਸਲਾ ਡਰਾਈਵਰ ਨੇ ਘਟਨਾ ਨੂੰ ਰਿਕੌਰਡ ਕੀਤਾ ਅਤੇ ਭੱਜ ਰਹੇ ਪੀੜਤ ਨੂੰ ਆਪਣੀ ਗੱਡੀ ਵਿਚ ਬਿਠਾ ਕੇ ਸੁਰੱਖਿਅਤ ਰੱਖਿਆ, ਜਦੋਂ ਤੱਕ ਪੁਲਿਸ ਮੌਕੇ 'ਤੇ ਨਹੀਂ ਪਹੁੰਚ ਗਈ। ਮੁਲਜ਼ਮ ਦੀ ਪਛਾਣ 37 ਸਾਲਾ ਰਿਚਰਡ ਮਾਰਕ James Evoy ਵਜੋਂ ਹੋਈ, ਜਿਸ ਨੂੰ ਸਰੀ ਪੁਲਿਸ ਨੇ ਹਮਲਾ ਕਰਨ ਅਤੇ criminal harassment ਦੇ ਪੰਜ ਦੋਸ਼ਾਂ ਨਾਲ ਚਾਰਜ ਕੀਤਾ ਹੈ।

ਪੁਲਿਸ ਮੁਤਾਬਕ, ਵੀਡੀਓ ਵਿਚ ਦਿਖਾਈ ਦੇਣ ਵਾਲੀ ਇੱਕ ਲੜਕੀ ਸਮੇਤ ਇਹ ਤਿੰਨੋਂ ਜਣੇ ਇੱਕ-ਦੂਜੇ ਨੂੰ ਪਹਿਲਾਂ ਤੋਂ ਜਾਣਦੇ ਸਨ। ਹਾਲਾਂਕਿ, ਪੁਲਿਸ ਨੇ ਝਗੜੇ ਦਾ ਕਾਰਨ ਨਹੀਂ ਦੱਸਿਆ ਪਰ ਰਿਪੋਰਟ ਮੁਤਾਬਕ, ਰਿਚਰਡ ਮਾਰਕ ਲੜਕੀ ਦਾ ਪੁਰਾਣਾ ਬੁਆਏਫ੍ਰੈਂਡ ਸੀ, ਜੋ ਇਸ ਗੱਲੋਂ ਖਾਰ ਖਾਂਦਾ ਸੀ ਕਿ ਉਹ ਦੋਵੇਂ ਇੱਕਠੇ ਘੁੰਮ ਰਹੇ ਸਨ।