ਵਾਸ਼ਿੰਗਟਨ ਦੌਰੇ 'ਤੇ ਅਲਬਰਟਾ ਦੇ ਪ੍ਰੀਮੀਅਰ ਜੇਸਨ ਕੈਨੀ, ਇਸ ਮੁੱਦੇ 'ਤੇ ਕਰਨਗੇ ਗੱਲਬਾਤ

ਵਾਸ਼ਿੰਗਟਨ ਦੌਰੇ 'ਤੇ ਗਏ ਅਲਬਰਟਾ ਦੇ ਪ੍ਰੀਮੀਅਰ ਜੇਸਨ ਕੈਨੀ ਆਪਣੇ ਸੂਬੇ ਲਈ ਡੀਲ ਹਾਸਲ ਕਰਨ ਦੇ ਰੌਅ ਵਿਚ ਹਨ। ਕੈਨੀ ਕੈਪੀਟਲ ਹਿੱਲ ਦੇ ਸੰਸਦ ਮੈਂਬਰਾਂ ਨੂੰ ਯਕੀਨ ਦਿਵਾਉਣ ਦੀ ਕੋਸ਼ਿਸ਼ ਕਰਨਗੇ ਨਾਰਥ ਐਮਰੀਕਨ ਐਨਰਜੀ ਸਕਿਓਰਿਟੀ ਲਈ ਉਨ੍ਹਾਂ ਦਾ ਸੂਬਾ ਸਭ ਤੋਂ ਬਿਹਤਰ ਹੈ।

ਕੈਨੀ ਊਰਜਾ ਤੇ ਕੁਦਰਤੀ ਸਰੋਤਾਂ ਬਾਰੇ ਸੈਨੇਟ ਕਮੇਟੀ ਦੇ ਸਾਹਮਣੇ ਮੰਗਲਵਾਰ ਨੂੰ ਆਪਣਾ ਸੰਬੋਧਨ ਕਰਨ ਤੋਂ ਪਹਿਲਾਂ ਸੋਮਵਾਰ ਨੂੰ ਪੱਤਰਕਾਰਾਂ ਨਾਲ ਮੁਲਾਕਾਤ ਕਰ ਰਹੇ ਹਨ।

ਪ੍ਰੀਮੀਅਰ ਜੇਸਨ ਕੈਨੀ ਦੇ ਵਫ਼ਦ ਵਿਚ ਅਲਬਰਟਾ ਦੇ ਊਰਜਾ ਮੰਤਰੀ ਸੋਨਯਾ ਸੇਵੇਜ ਅਤੇ ਵਾਤਾਵਰਣ ਮੰਤਰੀ ਜੇਸਨ ਨਿਕਸਨ ਸ਼ਾਮਲ ਹਨ। ਕੈਨੀ ਬੁੱਧਵਾਰ ਨੂੰ ਵਾਪਸ ਪਰਤਣਗੇ। ਇਸ ਦੇ ਨਾਲ ਹੀ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੀਆਂ ਪਈਆਂ ਵੋਟ ਦੇ ਨਤੀਜੇ ਵੀ ਆ ਜਾਣਗੇ, ਜਿਸ ਵਿਚ ਪਤਾ ਲੱਗੇਗਾ ਕਿ ਜੇਸਨ ਕੈਨੀ ਪਾਰਟੀ ਦੇ ਨੇਤਾ ਅਤੇ ਪ੍ਰੀਮੀਅਰ ਵਜੋਂ ਰਹਿਣਗੇ ਜਾਂ ਨਹੀਂ। ਗੌਰਤਲਬ ਹੈ ਕਿ ਸੱਤਾਧਾਰੀ ਪਾਰਟੀ ਨੂੰ ਹਾਲ ਹੀ ਦੇ ਮਹੀਨਿਆਂ ਵਿਚ ਅੰਦਰੂਨੀ ਕਲੇਸ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇੰਨਾ ਹੀ ਨਹੀਂ ਕੈਨੀ ਨੂੰ ਉਨ੍ਹਾਂ ਦੇ ਆਪਣੇ ਕਾਕਸ ਦੇ ਅੰਦਰੋਂ ਵੀ ਜਨਤਕ ਵਿਰੋਧੀ ਸੁਰ ਸੁਣ ਰਹੇ ਸਨ। ਲੀਡਰਸ਼ਿਪ ਸਮੀਖਿਆ ਦੇ ਨਤੀਜਿਆਂ ਵਿਚ ਬੁੱਧਵਾਰ ਨੂੰ ਇਨ੍ਹਾਂ ਸਭ 'ਤੇ ਵਿਰ੍ਹਾਮ ਚਿੰਨ੍ਹ ਲੱਗਣ ਦੀ ਉਮੀਦ ਹੈ।