ਪ੍ਰੀਮੀਅਰ ਸਮਿਥ ਨੇ ਸਾਊਥ ਕੋਰੀਆ ਨਾਲ ਇੱਕ ਸਾਂਝੇ ਬਿਆਨ 'ਤੇ ਕੀਤੇ ਹਸਤਾਖਰ

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਸਾਊਥ ਕੋਰੀਆ ਨਾਲ ਇੱਕ ਸਾਂਝੇ ਬਿਆਨ 'ਤੇ ਹਸਤਾਖਰ ਕੀਤੇ ਹਨ, ਜਿਸ ਤਹਿਤ ਸੂਬੇ ਤੋਂ ਐਕਸਪੋਰਟ ਹੋਣ ਵਾਲੇ ਕੱਚੇ ਤੇਲ 'ਤੇ ਲੱਗਣ ਵਾਲੀ 3 ਫੀਸਦੀ ਟੈਰਿਫ ਡਿਊਟੀ ਨੂੰ ਹਟਾ ਦਿੱਤਾ ਜਾਵੇਗਾ। ਐਲਬਰਟਾ ਸਰਕਾਰ ਅਨੁਸਾਰ, ਇਸ ਕਦਮ ਨਾਲ ਕੈਨੇਡਾ ਤੋਂ ਬਿਟੂਮਨ ਭੇਜਣ ਵਾਲੇ ਊਰਜਾ ਉਤਪਾਦਕ ਲਈ ਨਵੇਂ ਬਾਜ਼ਾਰ ਖੁੱਲ੍ਹਣਗੇ।ਪਿਛਲੇ ਸਾਲ ਐਲਬਰਟਾ ਨੇ ਸਾਊਥ ਕੋਰੀਆ ਨੂੰ ਲਗਭਗ $400 ਮਿਲੀਅਨ ਦਾ ਕੱਚਾ ਤੇਲ ਐਕਸਪੋਰਟ ਕੀਤਾ ਸੀ।

ਟੈਰਿਫ ਹਟਣ ਤੋਂ ਬਾਅਦ, ਇਹ ਅੰਕੜਾ ਸਾਲਾਨਾ $400 ਮਿਲੀਅਨ ਤੋਂ $1 ਬਿਲੀਅਨ ਤੱਕ ਪਹੁੰਚਣ ਦੀ ਉਮੀਦ ਹੈ। ਪ੍ਰੀਮੀਅਰ ਸਮਿਥ ਨੇ 2035 ਤੱਕ ਸੂਬੇ ਵਿੱਚ ਤੇਲ ਅਤੇ ਗੈਸ ਦੇ ਉਤਪਾਦਨ ਨੂੰ ਦੁੱਗਣਾ ਕਰਨ ਦਾ ਟੀਚਾ ਰੱਖਿਆ ਹੈ। ਉਨ੍ਹਾਂ ਨੇ ਇਸ ਮਕਸਦ ਲਈ ਪਾਈਪਲਾਈਨ ਸਮਰੱਥਾ ਵਧਾਉਣ 'ਤੇ ਜ਼ੋਰ ਦਿੱਤਾ ਹੈ।ਬ੍ਰਿਟਿਸ਼ ਕੋਲੰਬੀਆ ਦੇ ਤੱਟ ਤੱਕ ਪਾਈਪਲਾਈਨ ਦੀ ਪਹੁੰਚ ਵਧਣ ਨਾਲ ਸਾਊਥ ਕੋਰੀਆ ਨੂੰ ਕੀਤੇ ਜਾਣ ਵਾਲੇ ਤੇਲ ਦੇ ਐਕਸਪੋਰਟ ਵਿੱਚ ਪਿਛਲੇ ਸਾਲ ਦੇ ਮੁਕਾਬਲੇ 500 ਫੀਸਦੀ ਤੋਂ ਵੱਧ ਦਾ ਉਛਾਲ ਦੇਖਿਆ ਗਿਆ ਹੈ।

ਐਲਬਰਟਾ ਅਤੇ ਦੱਖਣੀ ਕੋਰੀਆ ਵਿਚਕਾਰ ਕੁੱਲ ਵਪਾਰ ਪਿਛਲੇ ਸਾਲ ਲਗਭਗ $1.8 ਬਿਲੀਅਨ ਰਿਹਾ ਸੀ। ਇਸ ਨਵੇਂ ਸਮਝੌਤੇ ਨਾਲ ਦੋਵਾਂ ਖੇਤਰਾਂ ਦੇ ਆਰਥਿਕ ਸਬੰਧ ਹੋਰ ਮਜ਼ਬੂਤ ਹੋਣਗੇ ਅਤੇ ਅਲਬਰਟਾ ਦੇ ਤੇਲ ਉਦਯੋਗ ਨੂੰ ਕੌਮਾਂਤਰੀ ਪੱਧਰ 'ਤੇ ਹੁਲਾਰਾ ਮਿਲੇਗਾ।