ਐਲਬਰਟਾ ਸਰਕਾਰ ਜੂਨੀਅਰ ਹਾਕੀ ਖਿਡਾਰੀਆਂ ਦੀ ਮੌਤ ਵਾਲੇ ਹਾਈਵੇ ਚੌਰਾਹੇ ਦੀ ਕਰੇਗੀ ਸਮੀਖਿਆ

ਐਲਬਰਟਾ ਸਰਕਾਰ ਨੇ ਸਟੈਵਲੀ ਦੇ ਇੰਟਰਸੈਕਸ਼ਨ ਦੀ ਜਾਂਚ ਕਰਨ ਦਾ ਫੈਸਲਾ ਕੀਤਾ ਹੈ ਜਿੱਥੇ ਸੋਮਵਾਰ ਨੂੰ ਸੜਕ ਹਾਦਸੇ ਵਿਚ ਦੱਖਣੀ ਐਲਬਰਟਾ ਮਸਟੈਂਗਸ ਟੀਮ ਦੇ ਤਿੰਨ ਜੂਨੀਅਰ ਹਾਕੀ ਖਿਡਾਰੀਆਂ ਦੀ ਮੌਤ ਹੋ ਗਈ । ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਖਿਡਾਰੀ ਆਪਣੀ ਪ੍ਰੈਕਟਿਸ ਲਈ ਜਾ ਰਹੇ ਸਨ।

ਸੋਮਵਾਰ ਸਵੇਰੇ ਸਟੈਵਲੀ ਦੇ ਹਾਈਵੇਅ 2 ਅਤੇ 55 ਐਵੇਨਿਊ 'ਤੇ ਖਿਡਾਰੀਆਂ ਦੀ ਕਾਰ ਇਕ ਬੱਜਰੀ ਨਾਲ ਲੱਦੇ ਹੋਏ ਸੈਮੀ-ਟਰੱਕ ਨਾਲ ਟਕਰਾ ਗਈ ਸੀ। ਇਸ ਵਿਚ ਜਾਨ ਗੁਆਉਣ ਵਾਲੇ ਦੋ ਖਿਡਾਰੀ 18 ਸਾਲ ਦੇ ਸਨ, ਜੋ ਬੀ. ਸੀ. ਦੇ ਰਹਿਣ ਵਾਲੇ ਸਨ ਅਤੇ ਇਕ 17 ਸਾਲਾ ਖਿਡਾਰੀ ਯੂ.ਐਸ. ਦੇ ਅਲਾਬਾਮਾ ਤੋਂ ਸੀ। ਸੈਮੀ ਟਰੱਕ ਦੇ ਡਰਾਈਵਰ ਨੂੰ ਇਸ ਦੌਰਾਨ ਹਲਕੀਆਂ ਸੱਟਾਂ ਲੱਗੀਆਂ।

ਐਲਬਰਟਾ ਦੇ ਟ੍ਰਾਂਸਪੋਰਟੇਸ਼ਨ ਮੰਤਰਾਲੇ ਨੇ ਕਿਹਾ ਕਿ ਉਹ ਇਸ ਘਾਤਕ ਹਾਦਸੇ ਨੂੰ ਬਹੁਤ ਗੰਭੀਰਤਾ ਨਾਲ ਲੈ ਰਹੇ ਹਨ। ਇਸ ਲਈ ਉਹ ਦੇਖਣਗੇ ਕਿ ਇੰਟਰਸੈਕਸ਼ਨ 'ਤੇ ਵਾਹਨਾਂ ਦੀ ਆਵਾਜਾਈ ਅਤੇ ਪੁਰਾਣੇ ਹਾਦਸਿਆਂ ਦਾ ਰਿਕਾਰਡ ਕਿਹੋ ਜਿਹਾ ਰਿਹਾ ਹੈ ਅਤੇ ਇਹ ਵੀ ਦੇਖਿਆ ਜਾਵੇਗਾ ਕਿ ਰਾਤ ਜਾਂ ਧੁੰਦ ਸਮੇਂ ਰੌਸ਼ਨੀ ਦਾ ਪ੍ਰਬੰਧ ਠੀਕ ਹੁੰਦਾ ਹੈ। ਜੇਕਰ ਇੱਥੇ ਕੁਝ ਬਦਲਾਅ ਕਰਨ ਦੀ ਜ਼ਰੂਰਤ ਹੋਈ ਤਾਂ ਕੀਤੇ ਜਾਣਗੇ।