18.05C Vancouver 18.05C VancouverApr 6, 2026 6:44 PM - Connect Newsroom - Ramandeep Kaur with files from The Canadian Press
ਕੈਨੇਡੀਅਨ ਅਤੇ ਅਮਰੀਕੀ ਪੁਲਾੜ ਯਾਤਰੀਆਂ ਦੇ ਨਾਸਾ ਆਰਟੇਮਿਸ II ਮਿਸ਼ਨ ਨੇ ਅੱਜ ਮਨੁੱਖੀ ਇਤਿਹਾਸ ਵਿਚ ਇੱਕ ਨਵਾਂ ਅਧਿਆਇ ਜੋੜ ਦਿੱਤਾ ਹੈ। ਇਹ ਚਾਰੋ ਪੁਲਾੜ ਯਾਤਰੀ ਚੰਦਰਮਾ ਦੇ ਬੇਹੱਦ ਕਰੀਬ ਪਹੁੰਚ ਕੇ ਹੁਣ ਧਰਤੀ ਤੋਂ ਸਭ ਤੋਂ ਵੱਧ ਦੂਰੀ ਤੈਅ ਕਰਨ ਵਾਲੇ ਇਨਸਾਨ ਬਣ ਗਏ ਹਨ।
ਕੈਨੇਡੀਅਨ ਪੁਲਾੜ ਯਾਤਰੀ ਜੇਰੇਮੀ ਹੈਨਸਨ ਅਤੇ ਉਨ੍ਹਾਂ ਦੇ ਤਿੰਨ ਅਮਰੀਕੀ ਸਾਥੀ ਰੀਡ ਵਾਈਜ਼ਮੈਨ, ਵਿਕਟਰ ਗਲੋਵਰ ਅਤੇ ਕ੍ਰਿਸਟੀਨਾ ਕੋਚ ਨੇ ਅਪੋਲੋ 13 ਦੇ ਯਾਤਰੀਆਂ ਵੱਲੋਂ 1970 ਵਿਚ ਬਣਾਇਆ 400,171 ਕਿਲੋਮੀਟਰ ਦੂਰੀ ਦਾ ਰਿਕਾਰਡ ਤੋੜ ਦਿੱਤਾ ਹੈ।
ਨਾਸਾ ਅਨੁਸਾਰ, ਓਰੀਅਨ ਪੁਲਾੜ ਯਾਨ ਦੀ ਚੰਦਰਮਾ ਕੋਲੋਂ ਲੰਘਦੇ ਹੋਏ ਧਰਤੀ ਤੋਂ ਅੰਦਾਜ਼ਨ ਦੂਰੀ ਕਰੀਬ 406,000 ਕਿਲੋਮੀਟਰ ਹੋਵੇਗੀ। ਇਸ ਯਾਤਰਾ ਦੌਰਾਨ ਓਰੀਅਨ ਚੰਦਰਮਾ ਦੀ ਸਤਹ ਤੋਂ ਮਹਿਜ਼ 6,500 ਕਿਲੋਮੀਟਰ ਦੀ ਦੂਰੀ ਤੋਂ ਗੁਜ਼ਰ ਰਿਹਾ ਹੈ। ਜੇਰੇਮੀ ਹੈਨਸਨ ਮੁਤਾਬਕ, ਉੱਥੋਂ ਚੰਦਰਮਾ ਇੱਕ ਬਾਸਕਟਬਾਲ ਵਰਗਾ ਦਿਖਾਈ ਦੇਵੇਗਾ। ਪੁਲਾੜ ਯਾਤਰੀ ਇਸ ਦੌਰਾਨ ਚੰਦਰਮਾ ਦੇ ਪੁਰਾਣੇ ਜਵਾਲਾਮੁਖੀ ਦੇ ਲਾਵੇ ਅਤੇ ਟੋਇਆਂ ਦੀਆਂ ਤਸਵੀਰਾਂ ਲੈਣਗੇ।
ਖ਼ਾਸ ਗੱਲ ਇਹ ਹੈ ਕਿ ਉਹ ਚੰਦਰਮਾ ਦੇ ਉਸ ਓਹਲੇ ਵਾਲੇ ਹਿੱਸੇ ਨੂੰ ਵੀ ਦੇਖ ਸਕਣਗੇ ਜੋ ਪਹਿਲਾਂ ਦੇ ਪੁਲਾੜ ਯਾਤਰੀਆਂ ਲਈ ਦੇਖਣਾ ਬਹੁਤ ਮੁਸ਼ਕਲ ਸੀ। ਮੰਗਲਵਾਰ ਨੂੰ ਓਰੀਅਨ ਚੰਦਰਮਾ ਦੇ ਗ੍ਰੇਵਟੀ ਖੇਤਰ ਤੋਂ ਬਾਹਰ ਨਿਕਲ ਕੇ ਵਾਪਸ ਧਰਤੀ ਵੱਲ ਆਪਣਾ ਸਫ਼ਰ ਸ਼ੁਰੂ ਕਰੇਗਾ।
