ਆਰਟੇਮਿਸ II ਮਿਸ਼ਨ ਨੇ ਬਣਾਇਆ ਨਵਾਂ ਰਿਕਾਰਡ, ਕੈਨੇਡੀਅਨ ਪੁਲਾੜ ਯਾਤਰੀ ਵੀ ਟੀਮ ਵਿੱਚ ਹੋਏ ਸ਼ਾਮਲ

ਕੈਨੇਡੀਅਨ ਸਪੇਸ ਏਜੰਸੀ ਮੁਤਾਬਕ, ਅੱਜ ਨਾਸਾ ਦਾ ਆਰਟੇਮਿਸ II ਮਿਸ਼ਨ ਚੰਦਰਮਾ ਦੇ ਸਭ ਤੋਂ ਕਰੀਬ ਤੋਂ ਲੰਘ ਕੇ ਇੱਕ ਨਵਾਂ ਰਿਕਾਰਡ ਬਣਾ ਰਿਹਾ ਹੈ। ਕੈਨੇਡੀਅਨ ਪੁਲਾੜ ਯਾਤਰੀ ਜੇਰੇਮੀ ਹੈਨਸਨ ਅਤੇ ਉਨ੍ਹਾਂ ਦੇ ਸਾਥੀ 1970 ਦੇ ਅਪੋਲੋ 13 ਮਿਸ਼ਨ ਤੋਂ ਵੀ ਅੱਗੇ ਨਿਕਲ ਗਏ ਹਨ। ਇਹ ਪਹਿਲੀ ਵਾਰ ਹੈ ਕਿ ਕੋਈ ਕੈਨੇਡੀਅਨ ਇੰਨੀ ਦੂਰ ਪੁਲਾੜ ਵਿਚ ਗਿਆ ਹੈ।

ਓਰੀਅਨ ਕੈਪਸੂਲ ਚੰਦਰਮਾ ਦੇ ਉਸ ਹਿੱਸੇ ਤੋਂ ਗੁਜ਼ਰ ਰਿਹਾ ਹੈ ਜੋ ਹਮੇਸ਼ਾ ਅੱਖਾਂ ਤੋਂ ਉਹਲੇ ਰਹਿੰਦਾ ਹੈ। ​ਇਸ ਮਿਸ਼ਨ ਦਾ ਮੁੱਖ ਮਕਸਦ ਚੰਦਰਮਾ ਦੇ ਆਲੇ-ਦੁਆਲੇ ਦੇ ਵਾਤਾਵਰਣ ਦੀ ਜਾਂਚ ਕਰਨਾ ਅਤੇ ਭਵਿੱਖ ਵਿਚ ਇਨਸਾਨ ਦੇ ਚੰਦਰਮਾ 'ਤੇ ਉਤਰਨ ਲਈ ਰਸਤਾ ਪਰਖਣਾ ਹੈ। ਇਸ ਦੀ ਸਫਲਤਾ ਭਵਿੱਖ ਦੇ Artemis III ਮਿਸ਼ਨ ਲਈ ਬੁਨਿਆਦ ਰੱਖੇਗੀ, ਜਿਸ ਵਿਚ ਇਨਸਾਨ ਮੁੜ ਚੰਦਰਮਾ ਦੀ ਸਤ੍ਹਾ 'ਤੇ ਕਦਮ ਰੱਖੇਗਾ।

ਗੌਰਤਲਬ ਹੈ ਕਿ ਤਿੰਨ ਅਮਰੀਕੀ ਪੁਲਾੜ ਯਾਤਰੀ ਅਤੇ ਇੱਕ ਕੈਨੇਡੀਅਨ ਪੁਲਾੜ ਯਾਤਰੀ ਨੇ 1 ਅਪ੍ਰੈਲ ਨੂੰ ਫਲੋਰੀਡਾ ਦੇ ਕੈਨੇਡੀ ਸਪੇਸ ਸੈਂਟਰ ਤੋਂ ਲਗਭਗ 10 ਦਿਨਾਂ ਦੇ ਮਿਸ਼ਨ ਲਈ ਉਡਾਣ ਭਰੀ ਸੀ। ਇਸ ਇਤਿਹਾਸਕ ਯਾਤਰਾ ਦੌਰਾਨ ਉਹ ਚੰਦਰਮਾ ਦੇ ਰਹੱਸਮਈ ਹਿੱਸੇ ਕੋਲੋਂ ਲੰਘਦੇ ਹੋਏ ਉਸ ਦੀਆਂ ਦੁਰਲੱਭ ਤਸਵੀਰਾਂ ਕੈਮਰੇ ਵਿਚ ਕੈਦ ਕਰਨਗੇ।