ਬੀ.ਸੀ. ਦੇ ਉੱਤਰੀ ਤੱਟ 'ਤੇ ਭਾਰੀ ਮੀਂਹ, ਬਰਫਬਾਰੀ ਅਤੇ ਤੇਜ਼ ਹਵਾਵਾਂ ਦੀ ਭਵਿੱਖਬਾਣੀ

ਬੀ.ਸੀ. ਦਾ ਨੌਰਥ ਕੋਸਟ ਇੱਕ ਵਾਰ ਫਿਰ ਕੁਦਰਤ ਦੀ ਮਾਰ ਹੇਠ ਆਉਣ ਵਾਲਾ ਹੈ। ਇਨਵਾਇਰਮੈਂਟ ਕੈਨੇਡਾ ਨੇ ਚਿਤਵਨੀ ਜਾਰੀ ਕੀਤੀ ਹੈ ਕਿ ਐਟਮੌਸਫੇਰਿਕ ਰਿਵਰ ਸਿਸਟਮ ਸਰਗਰਮ ਹੋਣ ਕਾਰਨ ਇਸ ਖੇਤਰ ਵਿਚ ਭਾਰੀ ਮੀਂਹ ਅਤੇ ਬਰਫ਼ਬਾਰੀ ਹੋਣ ਦੀ ਉਮੀਦ ਹੈ।

ਮੌਸਮ ਵਿਭਾਗ ਅਨੁਸਾਰ, ਵੀਰਵਾਰ ਦੇਰ ਰਾਤ ਤੋਂ ਸ਼ਨੀਵਾਰ ਸਵੇਰ ਤੱਕ ਪ੍ਰਿੰਸ ਰੂਪਰਟ, ਟੈਰੇਸ ਅਤੇ ਕਿਟੀਮਟ ਵਰਗੇ ਇਲਾਕਿਆਂ ਵਿਚ 100 ਮਿਲੀਮੀਟਰ ਤੱਕ ਮੀਂਹ ਪੈਣ ਦੀ ਸੰਭਾਵਨਾ ਹੈ। ਇਸ ਤੋਂ ਇਲਾਵਾ ਪ੍ਰਮੁੱਖ ਹਾਈਵੇਅ 'ਤੇ 15 ਸੈਂਟੀਮੀਟਰ ਤੱਕ ਬਰਫਬਾਰੀ ਹੋ ਸਕਦੀ ਹੈ, ਨਾਲ ਹੀ ਟੈਰੇਸ ਵਿਚ ਕੁਝ ਫ੍ਰੀਜ਼ਿੰਗ ਰੇਨ ਦੇਖਣ ਨੂੰ ਮਿਲ ਸਕਦੀ ਹੈ। ਉਥੇ ਹੀ, ਹੈਡਾ ਗਵਾਈ ਅਤੇ ਪ੍ਰਿੰਸ ਰੂਪਰਟ ਤੋਂ ਪੋਰਟ ਮੈਕਨੀਲ ਤੱਕ 120 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਹਵਾਵਾਂ ਚੱਲਣ ਦੀ ਚਿਤਾਵਨੀ ਵੀ ਜਾਰੀ ਕੀਤੀ ਗਈ ਹੈ।

ਅਲਾਸਕਨ ਪੈਨਹੈਂਡਲ ਕੋਲ ਸਟੀਵਰਟ ਅਤੇ ਸਾਊਥ ਕਲੋਂਡਾਈਕ ਹਾਈਵੇ ਲਈ ਸਰਦੀਆਂ ਦੇ ਤੂਫ਼ਾਨ ਦੀ ਚੇਤਾਵਨੀ ਲਾਗੂ ਹੈ, ਜਿੱਥੇ 35 ਸੈਂਟੀਮਟਰ ਤੱਕ ਬਰਫਬਾਰੀ ਹੋ ਸਕਦੀ ਹੈ। ਕੈਸੀਅਰ ਮਾਊਂਟੇਨ ਖੇਤਰ ਵਿਚ 20 ਸੈਂਟੀਮੀਟਰ ਤੱਕ ਬਰਫਾਬਰੀ ਹੋਣ ਦੀ ਸੰਭਾਵਨਾ ਹੈ।