ਆਸਟ੍ਰੇਲੀਅਨ ਓਪਨ: ਕੈਨਿਨ ਸਿਰ ਸਜਿਆ ਤਾਜ, ਮੁਗੁਰੁਜ਼ਾ ਹਾਰੀ

ਸਾਲ ਦੇ ਪਹਿਲੇ ਟੈਨਿਸ ਗਰੈਂਡ ਸਲੈਮ ਆਸਟ੍ਰੇਲੀਅਨ ਓਪਨ 'ਚ ਅਮਰੀਕਾ ਦੀ ਸੋਫੀਆ ਕੈਨਿਨ ਨੇ ਇਤਿਹਾਸਿਕ ਜਿੱਤ ਦਰਜ ਕਰ, ਖਿਤਾਬ ਆਪਣੇ ਨਾਮ ਕੀਤਾ। ਫਾਈਨਲ ਮੁਕਾਬਲੇ 'ਚ ਅਮਰੀਕਾ ਦੀ ਕੈਨਿਨ ਨੇ ਸਪੇਨ ਦੀ ਗਾਰਬਿਨ ਮੁਗੁਰੁਜ਼ਾ ਨੂੰ ਮਾਤ ਦਿੱਤੀ। ਤਿੰਨ ਸੈਟ ਤਕ ਚੱਲੇ ਮੈਚ 'ਚ ਸੋਫੀਆ ਕੈਨਿਨ 4-6, 6-2, 6-2 ਦੇ ਫਰਕ ਨਾਲ ਜੇਤੂ ਰਹੀ। ਇਹ ਸੋਫੀਆ ਕੈਨਿਨ ਦੀ ਪਹਿਲੀ ਗਰੈਂਡ ਸਲੈਮ ਜਿੱਤ ਹੈ।

ਕੈਨਿਨ ਦੀ ਇਤਿਹਾਸਿਕ ਜਿੱਤ

ਸੋਫੀਆ ਕੈਨਿਨ ਦੀ ਉਮਰ 21 ਸਾਲ ਹੈ, ਅਤੇ ਇਸ ਗਰੈਂਡ ਸਲੈਮ ਜਿੱਤ ਦੇ ਨਾਲ ਸੋਫੀਆ ਕੈਨਿਨ ਪਿਛਲੇ 12 ਸਾਲ 'ਚ ਆਸਟ੍ਰੇਲੀਅਨ ਓਪਨ ਜਿੱਤਣ ਵਾਲੀ ਸਬ ਤੋਂ ਯੁਵਾ ਖਿਡਾਰਨ ਬਣ ਗਈ ਹੈ। ਇਸਤੋਂ ਪਹਿਲਾਂ ਸਾਲ 2008 'ਚ ਮਾਰੀਆ ਸ਼ਾਰਾਪੋਵਾ ਨੇ ਇਹ ਕਮਾਲ ਕੀਤਾ ਸੀ। ਜਿੱਤ ਦਰਜ ਕਰਨ ਤੋਂ ਬਾਅਦ ਕੈਨਿਨ ਬੇਹਦ ਉਤਸ਼ਾਹਿਤ ਸੀ। ਉਨ੍ਹਾਂ ਕਿਹਾ ਕਿ ਓਹ ਆਪਣੇ ਖੁਦ ਤੋਂ ਬੇਹਦ ਖੁਸ਼ ਹੈ। ਨਾਲ ਹੀ ਉਨ੍ਹਾਂ ਆਪਣੇ ਪਿਤਾ, ਆਪਣੀ ਟੀਮ ਅਤੇ ਉਨ੍ਹਾਂ ਦਾ ਸਾਥ ਨਿਭਾਉਣ ਵਾਲਿਆਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਸਖਤ ਮਹਿਨਤ ਅਤੇ ਨਿਰੰਤਰ ਅਭਿਆਸ ਤੋਂ ਬਾਅਦ ਇਹ ਕਾਮਯਾਬੀ ਹਾਸਿਲ ਹੋਈ ਹੈ। ਯਾਦ ਰਹੇ ਸੋਫੀਆ ਕੈਨਿਨ ਨੇ ਫਾਈਨਲ 'ਚ ਐਂਟਰੀ ਲਈ ਸੈਮੀਫਾਈਨਲ 'ਚ ਵਿਸ਼ਵ ਨੰਬਰ 1 ਖਿਡਾਰਨ ਐਸ਼ਲੀ ਬਾਰਟੀ ਨੂੰ ਮਾਤ ਦਿੱਤੀ ਸੀ।

ਰੈਂਕਿੰਗ 'ਚ ਉਛਾਲ

ਇਸ ਜਿੱਤ ਦੇ ਨਾਲ ਹੀ ਸੋਫੀਆ ਕੈਨਿਨ ਦੀ ਰੈਂਕਿੰਗ 'ਚ ਵੀ ਸੁਧਾਰ ਹੋਵੇਗਾ। ਵਿਸ਼ਵ ਨੰਬਰ 15 ਤੋਂ ਓਹ ਹੁਣ ਟਾਪ 10 ਦੇ ਵਿੱਚ ਸ਼ਾਮਿਲ ਹੋ ਜਾਵੇਗੀ। ਇਸਤੋਂ ਅਲਾਵਾ ਸਿਰਫ ਅਮਰੀਕਾ ਦੀ ਰੈਂਕਿੰਗ 'ਚ ਸੋਫੀਆ ਕੈਨਿਨ ਸੇਰੇਨਾ ਵਿਲੀਅਮਸ ਨੂੰ ਪਛਾੜ ਕੇ ਨੰਬਰ 1 ਬਣ ਜਾਵੇਗੀ। ਇਸ ਜਿੱਤ ਦੇ ਨਾਲ ਹੀ ਸੋਫੀਆ ਕੈਨਿਨ ਨੂੰ $4 ਮਿਲੀਅਨ (ਆਸਟ੍ਰੇਲੀਆਈ) ਦੀ ਇਨਾਮੀ ਰਾਸ਼ੀ ਮਿਲੀ ਹੈ। ਰੂਸ 'ਚ ਜਨਮੀ ਅਤੇ ਨਿਊ ਯਾਰਕ 'ਚ ਵੱਡੀ ਹੋਈ ਸੋਫੀਆ ਕੈਨਿਨ ਨੇ ਕਰੜੇ ਸੰਘਰਸ਼ ਵਾਲੇ ਦਿਨ ਵੀ ਵੇਖੇ, ਜਦ ਉਸਦੇ ਪਿਤਾ ਟੈਕਸੀ ਦਾ ਕੰਮ ਕਰਦੇ ਸਨ, ਪਰ ਸ਼ਨੀਵਾਰ ਨੂੰ ਉਸਨੇ ਆਪਣੇ ਪਿਤਾ ਦੀ ਮੌਜੂਦਗੀ 'ਚ ਗਰੈਂਡ ਸਲੈਮ ਖਿਤਾਬ ਜਿੱਤ ਵਿਖਾਇਆ।

ਮੁਗੁਰੁਜ਼ਾ ਨੇ ਕੀਤਾ ਨਿਰਾਸ਼

ਸਪੇਨ ਦੀ ਨਾਮੀ ਟੈਨਿਸ ਖਿਡਾਰਨ ਗਾਰਬਿਨ ਮੁਗੁਰੁਜ਼ਾ, ਵਿਸ਼ਵ ਦੀ ਸਾਬਕਾ ਨੰਬਰ 1 ਖਿਡਾਰਨ ਰਹਿ ਚੁੱਕੀ ਹੈ। ਉਨ੍ਹਾਂ ਸਾਲ 2016 'ਚ ਫ੍ਰੈਂਚ ਓਪਨ ਅਤੇ ਸਾਲ 2017 'ਚ ਵਿੰਬੈਲਡਨ ਗਰੈਂਡ ਸਲੈਮ ਖਿਤਾਬ ਆਪਣੇ ਨਾਮ ਕੀਤੇ ਸਨ। ਪਰ ਸ਼ਨੀਵਾਰ ਨੂੰ ਖੇਡੇ ਗਏ ਖਿਤਾਬੀ ਮੈਚ ਵਿੱਚ ਮੁਗੁਰੁਜ਼ਾ ਨੇ ਆਪਣੇ ਪ੍ਰਸ਼ੰਸਕਾਂ ਨੂੰ ਨਿਰਾਸ਼ ਕੀਤਾ। ਪਹਿਲਾ ਸੈਟ ਆਪਣੇ ਨਾਮ ਕਰਨ ਤੋਂ ਬਾਅਦ, ਦੂਜੇ ਅਤੇ ਤੀਜੇ ਸੈਟ 'ਚ ਮੁਗੁਰੁਜ਼ਾ ਦੀ ਲੈਅ ਵਿਗੜ ਗਈ, ਅਤੇ ਸੋਫੀਆ ਕੈਨਿਨ ਦੇ ਅਟੈਕਿੰਗ ਖੇਡ ਦੇ ਅੱਗੇ ਮੁਗੁਰੁਜ਼ਾ ਦੀ ਕੋਈ ਵਾਹ ਨਾ ਗਈ। ਹਾਲਾਂਕਿ ਪਿਛਲੇ ਕੁਝ ਮੈਚਾਂ ਦੌਰਾਨ ਐਲੀਨਾ ਸਵੀਤੋਲਿਨਾ, ਕੀਕੀ ਬਰਟਨਸ, ਐਨਸਤੇਸੀਆ ਪਾਵਲੀਚੈਂਕੋਵਾ ਅਤੇ ਸਿਮੋਨਾ ਹਾਲੇਪ ਵਰਗੀਆਂ ਵੱਡੀਆਂ ਖਿਡਾਰਨਾਂ ਨੂੰ ਮਾਤ ਦੇਕੇ ਫਾਈਨਲ 'ਚ ਐਂਟਰੀ ਕਰਨ ਵਾਲੀ ਮੁਗੁਰੁਜ਼ਾ ਨੂੰ ਖਿਤਾਬੀ ਮੈਚ ਵਿੱਚ ਫੇਵਰਿਟ ਮੰਨਿਆ ਜਾ ਰਿਹਾ ਸੀ, ਪਰ ਸਪੈਨਿਸ਼ ਖਿਡਾਰਨ 'ਤੇ ਅਮਰੀਕੀ ਖਿਡਾਰਨ ਦਾ ਖੇਡ ਭਾਰੀ ਪੈ ਗਿਆ।