6.36C Vancouver 6.36C VancouverOct 28, 2025 6:23 PM - Connect Newsroom
ਬੀ. ਸੀ. ਵਿਚ ਕਈ ਪੋਲਟਰੀ ਫਾਰਮਾਂ ਵਿਚ H5N1 ਏਵੀਅਨ ਫਲੂ ਦੇ ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ। ਬਰਡ ਫਲੂ ਦੇ ਕੇਸਾਂ ਵਿਚ ਵਾਧੇ ਦਾ ਕਾਰਨ ਜੰਗਲੀ ਪੰਛੀਆਂ ਦੇ ਪਰਵਾਸ ਦਾ ਸਮਾਂ ਹੈ, ਜਿਨ੍ਹਾਂ ਨਾਲ ਵਾਇਰਸ ਦੇ ਫੈਲਣ ਦਾ ਖ਼ਦਸ਼ਾ ਹੁੰਦਾ ਹੈ। ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਮੁਤਾਬਕ, ਪਿਛਲੇ ਦੋ ਹਫ਼ਤਿਆਂ ਵਿਚ ਪੁਸ਼ਟੀ ਹੋਏ ਸਾਰੇ ਮਾਮਲੇ ਫਰੇਜ਼ਰ ਵੈਲੀ ਦੇ ਨੌਂ ਵਪਾਰਕ ਪੋਲਟਰੀ ਫਾਰਮਾਂ ਵਿਚ ਸਾਹਮਣੇ ਆਏ ਹਨ, ਜਿਨ੍ਹਾਂ ਵਿਚੋਂ ਛੇ ਚਿਲੀਵੈਕ ਖੇਤਰ ਵਿਚ ਅਤੇ ਤਿੰਨ ਐਬਟਸਫੋਰਡ ਵਿਚ ਹਨ।
ਸੀ.ਐਂਫ.ਆਈ.ਏ. ਮੁਤਾਬਕ, ਇਸ ਸੀਜ਼ਨ ਦਾ ਪਹਿਲਾ ਕੇਸ 14 ਅਕਤੂਬਰ ਨੂੰ ਐਬਟਸਫੋਰਡ ਵਿਚ ਪੁਸ਼ਟੀ ਹੋਈ ਸੀ ਅਤੇ ਪਿਛਲੇ ਵੀਰਵਾਰ ਤੋਂ ਬਾਕੀ ਅੱਠ ਕੇਸ ਸਾਹਮਣੇ ਆਏ ਹਨ। ਬਰਡ ਫਲੂ ਦੇ ਇਹ ਨਵੇਂ ਕੇਸ ਸੂਬੇ ਦੇ ਪੋਲਟਰੀ ਉਦਯੋਗ ਲਈ ਇੱਕ ਮੁਸ਼ਕਲ ਦੌਰ ਤੋਂ ਬਾਅਦ ਆਏ ਹਨ।
ਹਾਲ ਹੀ ਦੇ ਸਾਲਾਂ ਵਿਚ ਬੀ.ਸੀ. ਵਿਚ ਲਗਭਗ 8.8 ਮਿਲੀਅਨ ਪੋਲਟਰੀ ਪੰਛੀ ਇਸ ਵਾਇਰਸ ਕਾਰਨ ਮਰੇ ਹਨ ਜਾਂ ਮਾਰੇ ਗਏ ਹਨ। ਉਥੇ ਹੀ, ਐਜਵੁੱਡ ਸਥਿਤ ਸ਼ੁਤਰਮੁਰਗ ਫਾਰਮ ਵਿਚ ਪਿਛਲੇ ਸਾਲ 31 ਦਸੰਬਰ ਨੂੰ ਪੁਸ਼ਟੀ ਕੀਤੇ ਗਏ ਮਾਮਲਿਆਂ ਨੂੰ ਅਜੇ ਵੀ ਸਰਗਰਮ ਮੰਨਿਆ ਜਾਂਦਾ ਹੈ ਅਤੇ ਇਹ ਮਾਮਲਾ ਸੁਪਰੀਮ ਕੋਰਟ ਔਫ ਕੈਨੇਡਾ ਵਿਚ ਹੈ।
