18.27C Vancouver 18.27C VancouverJan 29, 2022 2:02 AM - The Canadian Press
ਬੀ.ਸੀ. 'ਚ ਸਿਹਤ ਅਧਿਕਾਰੀਆਂ ਵੱਲੋਂ ਕੋਵਿਡ-19 ਸੰਬੰਧੀ ਅਪਡੇਟ ਸਾਂਝੀ ਕੀਤੀ ਗਈ ਹੈ।
ਇਸ ਦੌਰਾਨ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਅਤੇ ਸਿਹਤ ਮੰਤਰੀ, ਐਡਰੀਅਨ ਡਿਕਸ ਨੇ ਕਿਹਾ ਕਿ ਅੱਜ 2 ਸਾਲ ਪੂਰੇ ਹੋ ਚੁੱਕੇ ਹਨ ਜਦ ਸੂਬੇ 'ਚ ਕੋਵਿਡ-19 ਸੰਬੰਧੀ ਪਹਿਲੀ ਪ੍ਰੈਸ ਕਾਨਫਰੰਸ ਕੀਤੀ ਗਈ ਸੀ।
ਡਾ. ਬੌਨੀ ਹੈਨਰੀ ਨੇ ਕਿਹਾ ਕਿ ਇਸ ਦੌਰਾਨ ਸੂਬੇ 'ਚ 276 ਪ੍ਰੈਸ ਕਾਨਫਰੰਸਿਸ ਹੋ ਚੁੱਕੀਆਂ ਹਨ ਅਤੇ ਕੋਵਿਡ-19 ਸੰਬੰਧੀ ਕਈ ਬਦਲਾਅ ਵੇਖਣ ਨੂੰ ਮਿਲੇ ਹਨ।
ਉਨ੍ਹਾਂ ਕਿਹਾ ਕਿ ਇਸੇ ਦੌਰਾਨ ਅਨੇਕਾਂ ਲੋਕਾਂ ਨੂੰ ਇਸ ਵਾਇਰਸ ਦੇ ਕਾਰਨ ਜਾਨ ਗਵਾਉਂਦੇ ਵੀ ਵੇਖਿਆ ਹੈ।
ਉਨ੍ਹਾਂ ਕਿਹਾ ਕਿ ਅੱਜ ਲੋੜ ਹੈ ਕਿ ਜਾਨ ਗਵਾਉਣ ਵਾਲੇ ਵਾਇਰਸ ਪੀੜਤਾਂ ਨੂੰ ਯਾਦ ਕੀਤਾ ਜਾਵੇ।
ਉਨ੍ਹਾਂ ਕਿਹਾ ਕਿ ਇਸੇ ਦੌਰਾਨ ਇਹ ਵੀ ਵੇਖਣ ਨੂੰ ਮਿਲਿਆ ਕਿ ਪਹਿਲੀ ਵੇਵ ਦੌਰਾਨ ਪੀ.ਸੀ.ਆਰ. ਟੈਸਟਿੰਗ ਅਤੇ ਕੰਟੈਕਟ ਟਰੇਸਿੰਗ 'ਤੇ ਬੇਹੱਦ ਧਿਆਨ ਦੇਣ ਦੀ ਲੋੜ ਸੀ ਪਰ ਉਸ ਤੋਂ ਬਾਅਦ ਲੋੜ ਅਨੁਸਾਰ ਇਨ੍ਹਾਂ ਦੀ ਲੋੜ 'ਚ ਵੀ ਬਦਲਾਅ ਕੀਤਾ ਗਿਆ ਹੈ।
ਡਾ. ਹੈਨਰੀ ਨੇ ਕਿਹਾ ਕਿ ਵਾਇਰਸ ਦੇ ਨਵੇਂ ਵੇਰੀਐਂਟਸ ਦੀ ਦਸਤਕ ਦੇ ਨਾਲ ਨਵੇਂ ਬਦਲਾਅ ਕਰਨੇ ਜਰੂਰੀ ਸਨ।
ਇਸੇ ਦੌਰਾਨ ਡਾ. ਹੈਨਰੀ ਨੇ ਇੱਕ ਟਾਈਮਲਾਈਨ ਵੀ ਸਾਂਝੀ ਕੀਤੀ ਜਿਸ 'ਚ ਉਨ੍ਹਾਂ ਦੱਸਿਆ ਕਿ 28 ਜਨਵਰੀ 2020 ਨੂੰ ਬੀ.ਸੀ. 'ਚ ਕੋਵਿਡ-19 ਦਾ ਪਹਿਲਾ ਕੇਸ ਰਿਪੋਰਟ ਹੋਇਆ ਸੀ ਅਤੇ ਫਿਰ ਲਿਨ ਵੈਲੀ 'ਚ 6 ਮਾਰਚ ਨੂੰ ਪਹਿਲਾ ਲੌਂਗ ਟਰਮ ਕੇਅਰ ਆਊਟਬ੍ਰੇਕ ਰਿਪੋਰਟ ਹੋਇਆ ਸੀ ਅਤੇ ਇਸੇ ਤਰ੍ਹਾਂ 6 ਮਈ ਨੂੰ ਸੂਬੇ ਦੇ ਰੀਸਟਾਰਟ ਸੰਬੰਧੀ ਐਲਾਨ ਹੋਇਆ ਸੀ।
ਇਸੇ ਤਰ੍ਹਾਂ ਉਨ੍ਹਾਂ ਵੇਵ 2, ਵੇਵ 3, ਵੇਵ 4 ਅਤੇ ਮੌਜੂਦਾ ਵੇਵ 5 ਦੇ ਵੇਰਵੇ ਵੀ ਸਾਂਝੇ ਕੀਤੇ।
ਉਨ੍ਹਾਂ ਇਸ ਮੌਕੇ ਵੈਕਸੀਨੇਸ਼ਨ ਦੇ ਆਉਣ ਨਾਲ ਵਾਇਰਸ ਖਿਲਾਫ ਲੜਾਈ 'ਚ ਮਿਲੀ ਮਦਦ ਦੀ ਮਹੱਤਤਾ ਬਾਰੇ ਵੀ ਜਿਕਰ ਕੀਤਾ।
ਉਨ੍ਹਾਂ ਕਿਹਾ ਕਿ ਸੂਬੇ ਵਿੱਚ 12 ਸਾਲ ਤੋਂ ਵਧੇਰੀ ਉਮਰ ਦੇ 90% ਤੋਂ ਵਧੇਰੇ ਲੋਕ ਪੂਰੀ ਤਰ੍ਹਾਂ ਵੈਕਸੀਨੇਟਿਡ ਹਨ।
ਵਾਇਰਸ ਦੇ ਰੂਪ ਬਦਲਦੇ ਰਹਿਣ ਤੇ ਹੋਰ ਵੇਵਸ ਦੇ ਦਸਤਕ ਦੇਣ ਦੇ ਆਸਾਰ
ਡਾ. ਬੌਨੀ ਹੈਨਰੀ ਨੇ ਅੱਜ ਕੋਵਿਡ-19 ਸੰਬੰਧੀ ਅਪਡੇਟ ਸਾਂਝੀ ਕਰਦੇ ਹੋਏ ਆਖਿਆ ਕਿ ਓਮੀਕਰੌਨ ਵੇਰੀਐਂਟ ਦੀ ਮੌਜੂਦਾ ਵੇਵ ਵਿਚਾਲੇ ਕੰਟੈਕਟ ਟਰੇਸਿੰਗ ਮੁਮਕਿਨ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਵਾਇਰਸ ਦੇ ਬਦਲਣ ਨਾਲ ਆਪਾਂ ਨੂੰ ਵੀ ਬਦਲਾਅ ਕਰਨ ਦੀ ਲੋੜ ਹੈ।
ਉਨ੍ਹਾਂ ਕਿਹਾ ਕਿ ਇਸ ਪੜ੍ਹਾਅ ਵਿੱਚੋਂ ਨਿਕਲਦੇ ਹੋਏ ਹੋਰ ਬਦਲਾਅ ਵੀ ਹੁੰਦੇ ਰਹਿਣਗੇ ਅਤੇ ਮੌਜੂਦਾ ਪਬੰਦੀਆਂ ਵਿੱਚ ਢਿੱਲ ਹੋਣਾ ਵੀ ਉਸੇ ਦਾ ਹਿੱਸਾ ਹੈ।
ਉਨ੍ਹਾਂ ਕਿਹਾ ਕਿ ਵਾਇਰਸ ਨਾਲ ਲੜ੍ਹਨ ਲਈ ਜਰੂਰੀ ਹੈ ਕਿ ਹੁਣ ਵੈਕਸੀਨ ਦੀਆਂ ਬੂਸਟਰ ਖੁਰਾਕਾਂ ਹਾਸਿਲ ਕੀਤੀਆਂ ਜਾਣ ਅਤੇ ਬੱਚਿਆਂ ਨੂੰ ਵੀ ਇਹ ਖੁਰਾਕਾਂ ਪ੍ਰਦਾਨ ਕੀਤੀਆਂ ਜਾਣ।
ਉਨ੍ਹਾਂ ਕਿਹਾ ਕਿ ਕੋਵਿਡ-19 ਫਿਲਹਾਲ ਖਤਮ ਨਹੀਂ ਹੋਇਆ ਹੈ ਅਤੇ ਇਹ ਕੁਝ ਸਮਾਂ ਇੱਥੇ ਹੀ ਰਹਿਣ ਵਾਲਾ ਹੈ।
ਡਾ. ਬੌਨੀ ਹੈਨਰੀ ਨੇ ਕਿਹਾ ਕਿ ਇਹ ਵਾਇਰਸ ਹਰ ਪਤਝੜ ਦੇ ਨਾਲ ਨਵਾਂ ਖਤਰਾ, ਨਵੇਂ ਵੇਰੀਐਂਟ ਅਤੇ ਨਵੀਂ ਵੇਵ ਲਿਆਉਣ ਦੀ ਤਾਕਤ ਰੱਖਦਾ ਹੈ।
ਪਰ ਉਨ੍ਹਾਂ ਕਿਹਾ ਕਿ ਇਸ ਦੇ ਲਈ ਆਪਾਂ ਨੂੰ ਵੀ ਪਹਿਲਾਂ ਤੋਂ ਤਿਆਰੀ ਰੱਖਣ ਦੀ ਲੋੜ ਹੈ।
ਡਾ. ਹੈਨਰੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਭਰੋਸਾ ਹੈ ਕਿ ਉਹ ਦਿਨ ਆਵੇਗਾ ਜਦ ਇਸ ਵਾਇਰਸ ਸੰਬੰਧੀ ਪੀ.ਐਚ.ਓ. ਦੀ ਲੋੜ ਨਹੀਂ ਹੋਵੇਗੀ।
