ਐਮਵੀ ਹੌਂਡੀਅਸ ਕਰੂਜ਼ ਨਾਲ ਸਬੰਧਤ ਯਾਤਰੀ 'ਚ ਹੰਟਾਵਾਇਰਸ ਦੀ ਪੁਸ਼ਟੀ, ਬੀ.ਸੀ. ਹਸਪਤਾਲ ਵਿਚ ਇਲਾਜ ਜਾਰੀ

ਬੀ. ਸੀ. ਵਿਚ ਐਮਵੀ ਹੌਂਡੀਅਸ ਕਰੂਜ਼ ਨਾਲ ਸਬੰਧਤ ਆਈਸੋਲੇਟ 4 ਕੈਨੇਡੀਅਨਜ਼ ਵਿਚੋਂ ਇੱਕ ਵਿਚ ਹੰਟਾਵਾਇਰਸ ਦੇ ਪਾਜ਼ੇਟਿਵ ਕੇਸ ਦੀ ਪੁਸ਼ਟੀ ਹੋਈ ਹੈ। ਸੂਬਾਈ ਸਿਹਤ ਅਧਿਕਾਰੀ ਡਾ. ਬੌਨੀ ਹੈਨਰੀ ਮੁਤਾਬਕ, ਪ੍ਰਭਾਵਿਤ ਮਰੀਜ਼ 70 ਤੋਂ 75 ਸਾਲ ਦਾ ਯੂਕੋਨ ਦਾ ਰਹਿਣ ਵਾਲਾ ਹੈ ਅਤੇ ਉਸ ਦਾ ਵਿਕਟੋਰੀਆ ਦੇ ਇੱਕ ਹਸਪਤਾਲ ਵਿਚ ਇਲਾਜ ਚੱਲ ਰਿਹਾ ਹੈ।

ਯੂਕੋਨ ਨਾਲ ਹੀ ਸਬੰਧਤ ਦੋ ਹੋਰ ਲੋਕ ਵੀ ਹਸਪਤਾਲ ਵਿਚ ਹਨ, ਜਦੋਂ ਕਿ ਚੌਥਾ ਯਾਤਰੀ ਘਰ ਵਿਚ ਆਈਸੋਲੇਸ਼ਨ ਦੀ ਪਾਲਣਾ ਕਰ ਰਿਹਾ ਹੈ। ਇਸ ਵਿਚਕਾਰ ਅਧਿਕਰੀਆਂ ਨੇ ਦਾਅਵਾ ਕੀਤਾ ਹੈ ਕਿ ਆਮ ਜਨਤਾ ਨੂੰ ਫਿਲਹਾਲ ਇਸ ਤੋਂ ਕੋਈ ਖ਼ਤਰਾ ਨਹੀਂ ਹੈ। ਰਿਪੋਰਟ ਮੁਤਾਬਕ, ਕੈਨੇਡਾ ਪਰਤਣ ਮਗਰੋਂ ਬੀ. ਸੀ. ਵਿਚ ਕੁਆਰੰਟੀਨ ਕੀਤੇ ਗਏ 4 ਯਾਤਰੀਆਂ ਵਿਚੋਂ ਇੱਕ ਵਿਚ ਵੀਰਵਾਰ ਨੂੰ ਲੱਛਣ ਵਿਕਸਤ ਹੋਏ ਸਨ, ਸ਼ੁੱਕਰਵਾਰ ਨੂੰ ਟੈਸਟਿੰਗ ਕੀਤੀ ਗਈ ਅਤੇ ਇਸ ਮਗਰੋਂ ਨਤੀਜਿਆਂ ਦੀ ਪੁਸ਼ਟੀ ਲਈ ਸੈਂਪਲ ਵਿਨੀਪੈਗ ਸਥਿਤ National Microbiology Laboratory ਵਿਚ ਭੇਜੇ ਗਏ ਸਨ।

ਡਾ. ਹੈਨਰੀ ਮੁਤਾਬਕ, ਪਾਜ਼ੇਟਿਵ ਪਾਏ ਗਏ ਮਰੀਜ਼ ਦੀ ਹਾਲਤ ਫਿਲਹਾਲ ਸ਼ਥਿਰ ਹੈ ਅਤੇ ਉਸ ਦੇ ਲੱਛਣ ਵੀ ਹਲਕੇ ਤੋਂ ਦਰਮਿਆਨੇ ਹਨ ਪਰ ਹੈਲਥ ਕੇਅਰ ਵਰਕਰ ਦੀ ਟੀਮ ਵਲੋਂ ਮਰੀਜ਼ ਦੀ ਲਗਾਤਾਰ ਨਿਗਰਾਨੀ ਕੀਤੀ ਜਾ ਰਹੀ ਹੈ।