ਬੀ.ਸੀ. 'ਚ ਕੋਵਿਡ-19 ਸੰਬੰਧੀ ਮਾਮਲਿਆਂ ਦੇ ਟੁੱਟੇ ਰਿਕਾਰਡ; ਐਕਟਿਵ ਮਾਮਲੇ 16,000 ਤੋਂ ਪਾਰ; ਸੂਬੇ 'ਚ ਸਕੂਲ ਖੁੱਲ੍ਹਣ ਦੀਆਂ ਤਰੀਕਾਂ 'ਚ ਕੀਤੇ ਬਦਲਾਅ

ਅੱਜ ਬੀ.ਸੀ. 'ਚ ਕੋਵਿਡ-19 ਦੇ 2,944 ਮਾਮਲੇ ਰਿਪੋਰਟ ਹੋਏ ਹਨ। ਇਸ ਨਾਲ ਬੀ.ਸੀ. ਵਿੱਚ ਇੱਕ ਵਾਰ ਫਿਰ ਤੋਂ ਇੱਕੋ ਦਿਨ ਵਿੱਚ ਕੋਵਿਡ-19 ਮਾਮਲਿਆਂ ਦਾ ਰਿਕਾਰਡ ਵਾਧਾ ਦਰਜ ਹੋਇਆ ਹੈ। 24 ਦਿਸੰਬਰ ਤੋਂ ਬਾਅਦ ਤੋਂ 5 ਵਾਇਰਸ ਪੀੜਤਾਂ ਦੀ ਮੌਤ ਰਿਪੋਰਟ ਹੋਈ ਹੈ। ਹੁਣ ਬੀ.ਸੀ. 'ਚ ਕੋਵਿਡ-19 ਦੇ ਕੁੱਲ ਮਾਮਲਿਆਂ ਦੀ ਗਿਣਤੀ 2,31,117 ਤਕ ਪਹੁੰਚ ਗਈ ਹੈ। ਸੂਬੇ 'ਚ ਵਾਇਰਸ ਸੰਬੰਧੀ ਮੌਤਾਂ ਦੀ ਗਿਣਤੀ 2,419 ਹੋ ਚੁੱਕੀ ਹੈ। ਬੀ.ਸੀ. 'ਚ ਵਾਇਰਸ ਸੰਬੰਧੀ ਐਕਟਿਵ ਮਾਮਲਿਆਂ ਦੀ ਗਿਣਤੀ 16,000 ਤੋਂ ਪਾਰ ਪਹੁੰਚ ਗਈ ਹੈ। ਸੂਬੇ ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਨੇ ਫਰੇਜ਼ਰ ਹੈਲਥ ਵਿੱਚ 7,192, ਵੈਨਕੂਵਰ ਕੋਸਟਲ ਹੈਲਥ ਵਿੱਚ 5,462, ਵੈਨਕੂਵਰ ਆਈਲੈਂਡ ਹੈਲਥ ਵਿੱਚ 1,363, ਇੰਟੀਰੀਅਰ ਹੈਲਥ ਵਿੱਚ 1,576 ਅਤੇ ਨੌਰਦਰਨ ਹੈਲਥ ਵਿੱਚ 431 ਐਕਟਿਵ ਮਾਮਲੇ ਹੋਣ ਦੀ ਜਾਣਕਾਰੀ ਦਿੱਤੀ। ਕੁੱਲ 193 ਲੋਕ ਹਸਪਤਾਲ 'ਚ ਦਾਖਿਲ ਹਨ, ਤੇ ਇਸ 'ਚ 66 ਨੂੰ ਆਈ.ਸੀ.ਯੂ. 'ਚ ਰੱਖਿਆ ਗਿਆ ਹੈ।

ਬੀ.ਸੀ. 'ਚ ਸਕੂਲ ਖੁੱਲ੍ਹਣ ਸੰਬੰਧੀ ਕੁਝ ਬਦਲਾਅ

ਬੀ.ਸੀ. ਦੇ ਵਿੱਚ ਕੋਵਿਡ-19 ਦੇ ਓਮੀਕਰੌਨ ਵੇਰੀਐਂਟ ਦੇ ਫੈਲਾਅ ਵਿਚਾਲੇ ਬੱਚਿਆਂ ਦੀ ਸਕੂਲਾਂ 'ਚ ਵਾਪਸੀ 'ਚ ਕੁਝ ਬਦਲਾਅ ਕੀਤੇ ਗਏ ਹਨ। ਅੱਜ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਅਤੇ ਸਿੱਖਿਆ ਮੰਤਰੀ ਜੈਨੀਫਰ ਵਾਈਟਸਾਈਡ ਨੇ ਇਸ ਸੰਬੰਧੀ ਜਾਣਕਾਰੀ ਸਾਂਝੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਬੀ.ਸੀ. 'ਚ ਕੇ ਤੋਂ 12 ਸਕੂਲਾਂ ਨੂੰ ਖੋਲ੍ਹਣ 'ਚ ਫੇਜ਼ਡ ਐਪਰੋਚ ਵਰਤੀ ਜਾਵੇਗੀ। ਅਸੈਂਸ਼ੀਅਲ ਵਰਕਰਾਂ ਅਤੇ ਹੈਲਥ ਕੇਅਰ ਵਰਕਰਾਂ ਦੇ ਬੱਚਿਆਂ ਵੱਲੋਂ 4 ਜਨਵਰੀ ਤੋਂ ਸਕੂਲਾਂ 'ਚ ਪਹੁੰਚ ਕੀਤੀ ਜਾ ਸਕੇਗੀ। ਸਾਰੇ ਸਕੂਲਾਂ ਨੂੰ ਸਾਰੇ ਬੱਚਿਆਂ ਲਈ 10 ਜਨਵਰੀ ਤੋਂ ਖੋਲ੍ਹਿਆ ਜਾਵੇਗਾ। ਡਾ. ਹੈਨਰੀ ਨੇ ਕਿਹਾ ਕਿ ਇਸ ਨਾਲ ਕੁਝ ਸਮਾਂ ਹਾਸਿਲ ਹੋ ਸਕੇਗਾ ਕਿ ਕਲਾਸਾਂ 'ਚ ਪਹੁੰਚ ਨੂੰ ਹੋਰ ਸੁਰੱਖਿਅਤ ਬਣਾਇਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਪਬਲਿਕ ਹੈਲਥ ਨੋਟੀਫਿਕੇਸ਼ਨ ਨੂੰ ਵੀ ਹੋਰ ਪੁਖਤਾ ਬਣਾਇਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਸਕੂਲਾਂ 'ਚ ਟੈਸਟਿੰਗ ਸਟ੍ਰੇਟਜੀ ਨੂੰ ਵੀ ਹੋਰ ਬਿਹਤਰ ਬਣਾਉਣ 'ਤੇ ਕਦਮ ਚੁੱਕੇ ਜਾਣਗੇ।

ਡਾ. ਹੈਨਰੀ ਨੇ ਮੰਨਿਆ ਕਿ ਕਈ ਟੈਸਟਿੰਗ ਸੈਂਟਰਾਂ 'ਤੇ ਭਾਰੀ ਭੀੜ

ਅੱਜ ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਨੇ ਕੋਵਿਡ-19 ਸੰਬੰਧੀ ਹਾਲਾਤਾਂ ਦੀ ਜਾਣਕਾਰੀ ਸਾਂਝੀ ਕਰਦੇ ਹੋਏ ਮੰਨਿਆ ਕਿ ਸੂਬੇ 'ਚ ਕਈ ਥਾਵਾਂ 'ਤੇ ਟੈਸਟਿੰਗ ਸੈਂਟਰਾਂ 'ਤੇ ਭਾਰੀ ਭੀੜ ਜਮ੍ਹਾਂ ਹੋ ਰਹੀ ਹੈ, ਅਤੇ ਇਸ ਨਾਲ ਲੰਮੀ ਉਡੀਕ ਦੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਟੈਸਟਿੰਗ ਸੈਂਟਰਾਂ ਨੂੰ ਵੱਧ ਤੋਂ ਵੱਧ ਕਪੈਸਟੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਅਜਿਹੇ 'ਚ ਸਾਡਾ ਬੀ.ਸੀ.ਸੀ.ਡੀ.ਸੀ. ਸਿੰਪਟਮ ਚੈਕਰ ਵੀ ਇੱਕ ਚੰਗਾ ਟੂਲ ਸਾਬਿਤ ਹੋ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਬਾਕੀ ਟੈਸਟਿੰਗ ਸੈਂਟਰਾਂ ਨੂੰ ਸਪਲੀਮੈਂਟ ਕਰਨ ਲਈ ਰੈਪਿਡ ਟੈਸਟਸ ਦੀ ਵੀ ਵਰਤੋਂ ਕੀਤੀ ਜਾ ਰਹੀ ਹੈ। ਡਾ. ਹੈਨਰੀ ਨੇ ਕਿਹਾ ਕਿ ਵੈਕਸੀਨੇਸ਼ਨ ਹਾਸਿਲ ਕਰਨ ਵਾਲੇ ਲੋਕਾਂ ਨੂੰ ਹੁਣ ਵੀ ਇਸ ਵਾਇਰਸ ਸੰਬੰਧੀ ਮਾਮੂਲੀ ਲੱਛਣ ਹੋ ਰਹੇ ਹਨ ਅਤੇ ਅਜਿਹੇ ਲੋਕ ਖੁਦ ਨੂੰ ਘਰਾਂ 'ਚ ਇਕੱਲੇ 'ਚ ਰੱਖ ਕੇ ਸੈਲਫ-ਮੌਨੀਟਰ ਕਰ ਸਕਦੇ ਹਨ। ਇਸ ਮੌਕੇ ਡਾ. ਬੌਨੀ ਹੈਨਰੀ ਨੇ ਇਹ ਵੀ ਕਿਹਾ ਕਿ ਓਮੀਕਰੌਨ ਵੇਰੀਐਂਟ ਦਾ ਇੰਕਿਉਬੇਸ਼ਨ ਪੀਰੀਅਡ ਵਧੇਰੇ ਰਫਤਾਰ ਵਾਲਾ ਹੈ।