ਲਾਪੂ ਲਾਪੂ ਡੇਅ ਫੈਸਟੀਵਲ ਦੇ ਮਾਮਲੇ ਦੀ ਸੁਣਵਾਈ ਜਨਵਰੀ ਤੱਕ ਕੀਤੀ ਗਈ ਮੁਲਤਵੀ

ਵੈਨਕੂਵਰ ਦੇ ਲਾਪੂ ਲਾਪੂ ਡੇਅ ਫੈਸਟੀਵਲ ਮੌਕੇ 11 ਲੋਕਾਂ ਨੂੰ ਕਾਰ ਨਾਲ ਟੱਕਰ ਮਾਰ ਕੇ ਮਾਰਨ ਦੇ ਦੋਸ਼ੀ ਵਿਅਕਤੀ ਦੀ ਸੁਣਵਾਈ ਜਨਵਰੀ ਤੱਕ ਮੁਲਤਵੀ ਕਰ ਦਿੱਤੀ ਗਈ ਹੈ। ਇਹ ਦੇਰੀ ਮੁਲਜ਼ਮ Adam Kai-Ji Lo ਦੇ ਬਚਾਅ ਪੱਖ ਦੇ ਵਕੀਲ ਨੂੰ ਕ੍ਰਾਊਨ ਵਲੋਂ ਸਾਹਮਣੇ ਲਿਆਂਦੇ ਗਏ ਹਜ਼ਾਰਾਂ ਪੰਨਿਆਂ ਦੇ ਸਬੂਤਾਂ ਦਾ ਰਿਵਿਊ ਕਰਨ ਲਈ ਕੀਤੀ ਗਈ ਹੈ। Kai-Ji Lo ਅੱਜ ਵੀਡੀਓ ਰਾਹੀਂ ਵੈਨਕੂਵਰ ਸੂਬਾਈ ਅਦਾਲਤ ਵਿਚ ਪੇਸ਼ ਹੋਇਆ ਸੀ।

ਸਰਕਾਰੀ ਵਕੀਲ ਅਤੇ Lo ਦੇ ਵਕੀਲ ਵਲੋਂ ਬਣੀ ਸਹਿਮਤੀ ਤਹਿਤ ਸੁਣਵਾਈ ਦੀ ਤਾਰੀਖ਼ 12 ਜਨਵਰੀ ਨਿਰਧਾਰਤ ਕੀਤੀ ਗਈ ਹੈ। ਗੌਰਤਲਬ ਹੈ ਕਿ 26 ਅਪ੍ਰੈਲ ਨੂੰ ਇੱਕ ਐਸ.ਯੂ.ਵੀ. -ਲਾਪੂ ਲਾਪੂ ਡੇਅ ਫੈਸਟੀਵਲ ਦੀ ਭੀੜ ਵਿਚ ਲੋਕਾਂ ਨੂੰ ਕੁਚਲਦੀ ਚਲੀ ਗਈ ਸੀ। ਇਸ ਘਟਨਾ ਦੇ ਨਤੀਜੇ ਵਜੋਂ 11 ਲੋਕਾਂ ਦੀ ਮੌਤ ਹੋ ਗਈ ਅਤੇ ਘੱਟੋ-ਘੱਟ 31 ਹੋਰ ਜ਼ਖਮੀ ਹੋ ਗਏ ਸਨ।

ਉਸ ਨੂੰ ਘਟਨਾ ਵਾਲੇ ਦਿਨ ਇੱਕ ਰਾਹਗੀਰ ਵਲੋਂ ਫੜਿਆ ਗਿਆ ਸੀ ਜਦੋਂ ਉਹ ਵਾਹਨ ਤੋਂ ਬਾਹਰ ਨਿਕਲਿਆ ਅਤੇ ਪੁਲਿਸ ਦੇ ਆਉਣ ਤੱਕ ਉਸ ਨੂੰ ਫੜੀ ਰੱਖਿਆ। Lo, 11 ਸੈਕਿੰਡ ਡਿਗਰੀ ਮਰਡਰ ਦੇ ਦੋਸ਼ਾਂ ਅਤੇ 31 ਹੋਰ ਕਤਲ ਦੀ ਕੋਸ਼ਿਸ਼ ਦੇ ਦੋਸ਼ ਦਾ ਸਾਹਮਣਾ ਕਰ ਰਿਹਾ ਹੈ।